Aatsitassanut Ikummatissanullu Aqutsisoqarfik teknikkinut allaffissornermullu ilisarnaatilimmik sulisussarsiorpoq
Suliassaqarfimmi ineriartupiloortumi unammilligassat piareersimaffigaagit? Taamaappat Aatsitassanut Ikummatissanullu Aqutsisoqarfiup Teknikkinut Nakkutilliinermullu Immikkoortortaqarfiani suleqatigiligassatsinnik sulisussarsiorpugut.
Aatsitassanut Ikummatissanullu Aqutsisoqarfik Nuummi allaffeqarpoq, 8-nik immikkoortortaqarfinni marlunni agguarsimasunik sulisoqarluni: Teknikkinut Nakkutilliinermullu Immikkoortortaqarfik kiisalu Pisinnaatitsissutinut Immikkoortortaqarfik. Aatsitassanut Ikummatissanullu Aqutsisoqarfik Inuussutissarsiornermut, Niuernermut, Aatsitassanut Inatsisit Atuutsinneqarnerannut Naligiissitaanermullu Naalakkersuisoqarfiup ataani oqartussaavoq.
Aatsitassanut Ikummatissanullu Aqutsisoqarfiup nunarput tamakkerlugu aatsitassarsiornissamut akuersissutit 140-it missaanniittut aqutarai. Suliassaqarfitsinniipput ilaatigut annikitsumik aatsitassarsiornissamut akuersissutit, ujaqqeriviit, sioqqanik milluaaneq, aatsitassarsiorluni misissuinissamut aatsitassarsiorfissanullu akuersissutit.
Piginnaasaqarfinnut ilisarnaatit
Aqutsisoqarfimmi sulinermi suliassaqarfiit akimorlugit ineriartortitsinermut suliassat aamma ingerlatsinermut suliassat sungiusimasanut tunngassutillit ataqatigiissinneqartarput. Suliassat oqartussat allat suleqatigalugit isumagineqarput, tamatumanilu pisortat ingerlatsineranni, ujarassiornerup, teknikkip avatangiisillu iluanni ileqquusumik suliaqarfiit killissai akimorlugit suleqatigiinnissamut suliniutinillu aqutsinissamut pikkorissunik suleqateqarnissaq pisariaqarpoq. Ulluinnaat aamma aatsitassarsiorfiutileqatigiiffiit aammalu teknikkinut siunnersortit qanimut oqaloqatigalugit ingerlassaaq. Aqutsisoqarfimmi mikisumi atituunik suliassaqarfeqartumi soqutigisat akerleriittunut sammisut qeqqanni ingerlaniartarnissat misigisassavat. Suliassaqarfiit amerlanertigut atituumik sulianut ilinniarsimasanut tunngassuteqarput, tassani suleqatiginnillaqqissuseqarneq kiisalu aaqqissuussaasumik periaaseqarneq, ajornartorsiutinik iluarsiiniarnermi inuttut piginnaasani pingaaruteqarlutik.
Aqutsisoqarfimmiipput sulisut assigiinngitsorujussuarnik tunuliaqutillit, assersuutigalugu ujarassiuut, naalagaaffimmut tunngasunik ilisimasallit, politiitut ilinniarsimasut, oqaatsinut ilisimatuut aamma inatsisilerituut – aammalu assigiinngitsuuneq iluaqutissartaqartutut isigaarput. Taamaattumik suleqatitaassatta assigisariaqanngilaatigut – akerlianik suleqatitaassarput isikkivinnik nutaanik piginnaasaqarfinnillu taperseeqataasinnaaguni pitsaassaaq.
Kalaallit oqaasii kulturiallu ilisimasaqarfigigukku annertuumik iluaqutaassaaq. Qinnuteqartunut Kalaallit Nunaata avataanersunut tunngatillugu, sungiusimasamit allaanerusumik kulturikkut atugaqarluni sulinissamut inuunissamullu piginnaaneqarneq, piumassuseqarneq kajumissuseqarnerlu pingaartinneqassaaq. Ulluinnarni sulinitsinni nunami namminermi nunanilu allani atituumik attaveqarfeqartarpugut. Taamaattumik tuluttut oqaluinnarluni allattariarsorlunilu ajornartorsiutiginagu atuisinnaaguit aalajangiisuulluinnartumik pingaaruteqarpoq.
Immikkoortortaqarfinni maluusuni tamaginni ulluinnarni IT-nut sakkussanut nalinginnaasumik atugaasunut pikkoriffeqarnissaq pisariaqarpoq, ilanngullugit pingaartumik Microsoft Office aamma Microsoft Teams. Journalilersueriaatsinik imaluunniit allanik ilisimasanik avitseqateqarnermut qarasaasiatigut paasissutissaasivinni suliaqarnermik misilittagaqaruit iluaqutaassaaq.
Aaqqissuussaanermi politikkikkut aqunneqartumi sulivugut, taamaattumillu politikkikkut aalajangiinerit atuutsinnissaat, arlaannaannulluunniit attuumassuteqannginneq partiinullu atassuteqannginneq iluarigukku, tamanna piukkunnassusiussaaq aalajangiisuulluinnartoq. Pisortat ingerlatsineranni suliassanik misilittagaqaruit, ilanngullugu ataasiakkaatigut suliassanik suliarinnittarneq, iluaqutaassaaq.
Teknikkinut Nakkutilliinermullu Immikkoortortaqarfik
Ingerlatassat annertusiartornerat pissutigalugu immikkoortortaqarfimmi inuit tallimassaat ujartorparput. Takorloorparput illit assersuutigalugu aatsitassarsiorfinnut inuussutissarsiornerup, illuliortiternermut & sanaartornermut suliassaqarfiup, isumannaallisaanerup & sullivinni avatangiisit, pinngortitalerinerup imaluunniit pisortat ingerlatsinerisa iluanni ilinniagartuutut tunuliaquteqartutit. Suliassaqarfitit pingaartumik tassaassapput aatsitassanut suliassaqarfiup ataani ingerlatassanik assigiinngisitaartunik suliassanik suliarinninneq, kiisalu akuersissuteqarnernik tunniunneqareersunik nakkutilliineq. Taamaalillutit aatsitassaatitsinnik aatsitassarsiorluni misissuinerup piiaarnerullu isumannaallisaanermut peqqinnissamullu kiisalu upalungaarsimanermut teknikkinullu tunngatillugu isumannaatsumik ingerlanneqarnissaanut qulakkeereqataassaatit. Atorfeqarnerup kingunerisaanik nakkutilliinermik suliaqarnermut atatillugu ataatsimiinnerit angalanerillu pisassapput.
Ilinniarsimanikkut tunuliaqutitit imminerminni aalajangiisuunngillat, kisianni pisortat ingerlatsinerisa iluanni ilinniarsimanikkut imaluunniit misilittagaqarnikkut tunuliaquteqaruit pitsaassaaq. Aatsitassanut suliassaqarfimmut imaluunniit pisinnaatitsissutinik allaffissornikkut aqutsinermut ilisimasaqaruit iluaqutaassaaq. Allattariarsornikkut piginnaasaqarluarneq sakkussaassaaq ulluinnarni pisariaqartiligassat.
Aningaasarsianut atorfininnermullu atugassarititaasut
Sulilernissaq piaartumik. Taamaattoq qinnuteqartussaq eqqortoq utaqqisinnaavarput.
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut Kalaallit Nunaanni Namminersorlutik Oqartussat kattuffiullu isumaqatiginninniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.
Piffissaq suliffiusoq aallaaviatigut sapaatip akunneranut nalunaaquttap akunnerinik 40-nik sivisussuseqarpoq. Aatsitassarsiornermi inuussutissarsiorneq ukiup qanoq ilinera malillugu ingerlanneqartarpoq, aammalu piffissami ulapaarnerpaaffiusumi suleruluttarneq allanngorassasoq naatsorsuutigineqarsinnaavoq.
Qinnuteqartunut eqqortunik piukkunnaatilinnut immikkut siunnersortitut imaluunniit siunnersortaanertut tapeqarnissamut inassuteqartoqarsinnaassaaq.
Ineqarneq
Atorfimmut atatillugu sulisunut inissiamik innersuussisoqassanngilaq. Qinnuteqartoq Namminersorlutik Oqartussani sulisunut inissiami najugaqareersimaguni, sulisunut inissiamut innersuunneqarsinnaatitaaneq pisinnaatitaaffigiinnassavaa. Sulisunut inissiaq atorfeqarnermut atatinneqarpoq, aammalu atorfeqarnerup unitsinneqarnerani qimanneqartussaalluni.
Paasissutissat annertunerusut
atorfik pillugu annertunerusunik paasisaqarusukkuit, Teknikkinut Nakkutilliinermullu Immikkoortortaqarfimmi immikkoortortaqarfimmut pisortaq Kim Zinck Jørgensen, attaveqarfigisinnaavat, oqarasuaammut (+299) 346848 imaluunniit e-mail kizi@nanoq.gl.
Kalaallit Nunaat aamma Namminersorlutik Oqartussat pillugit annertunerusumik paasisaqarnerorusukkuit annertunerusut atuarsinnaavatit uani www.naalakkersuisut.gl. Kalaallit Nunaanni aatsitassanut suliassaqarfik pillugu paasissutissat nassaarisinnaavatit nittartakkatsinni uani www.govmin.gl
Qinnuteqarneq
Qinnuteqarnissamut killigititaavoq ulloq 05.07.2024 nal. 12:00.
Atorfinitsitsinissamut oqaloqateqarnissat ingerlaavartumik ingerlanneqassasut naatsorsuutigineqarpoq.
Qinnuteqaat, CV, ilinniarsimanermut pikkorissarsimanermullu uppernarsaatit, kiisalu uppernarsaatit allat attuumassutillit nassiutikkit ”Qinnuteqaat nassiuguk” toorlugu. E-mailikkut qinnuteqaatinik tigusaqartanngilagut.
Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.
Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.
Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job