Allagarsiuteqqitaq - Aaqqissuisussarsiorneq

Ilinniartitaanermut Aqutsisoqarfik, Ilinniusiorfik, ilinniusianik saqqummersitsinermi pitsanngorsaavoq. Ilinniusiorfimmi ilinniusianik nutaanik ulapputeqaleruttorpugut, ilaatigut atuartitsissusianik atuartunik suliaqalerusulersitsisunik suliaqartoqarpoq, aammalu systeminik taasanik ingerlataqarluta, soorlu aamma digitalimik suliaqarlutalu suleriusitsinnik nutarsaasugut. Suliaq aqutsisoqarfimmi siunnersortitut atorfillit avataaneersullu immikkut sulisorisat suleqatigalugit ingerlanneqarpoq.
Suliaqarnitsinnut atatillugu Ilinniartitaanermut Aqutsisoqarfik aaqqissuisumik Ilinniusiorfimmiittussamik sulisussarsiorpoq. Atorfinittussaq ilinniusiornermi nutaamik eqqarsarsinnaassuseqassaaq, aammalu pissutsit nutaaliaasut teknologiillu atorneqartut ilisimasaqarfigissallugit.

Suliniummut atatillugu ukioq 2027-p naaneranut, sivitsorneqarsinnaasumilli, atorfeqarsinnaasunik sulisussarsiorpugut.

Novembarip aallaqqaataani isumaqatiissuteqarnikkulluunniit atorfinitsitsisoqassaaq.

Atorfik pillugu:
Aaqqissuisoqarfimmi ilinniusianik naqitanik digitaliusunillu ineriartortitsinerit, nalimmassaanerit, siammaterinerit oqaatsitigullu aaqqissuinerit ingerlanneqartarput. Atorfinittussaq Ilinniusiorfimmi aaqqissuisut allat peqatigalugit sulissaaq. Kiisalu Ilinniartitaanermut Aqutsisoqarfimmi siunnersortit aamma avataaneersut suleqatigisat peqatigalugit suleqateqarneq ingerlanneqassalluni.

Illit pillutit:
Qinnuteqartoq piukkunnaatilik naatsorsuutigaarput:

• Naleqquttumik ilinniagaqarsimasoq

• Pamersaanermik kiisalu didaktikimut nutaajunerusumut ilisimasaqassasoq

• Aaqqissuisutut suliaqarnermik misilittagaqassasoq IT-millu atuisinnaassasoq

• Teknologi atorlugu atuartitsinermik misittagaqassasoq

• Aaqqissuussaasumik, akisussaassuseqartumik naammassissaqarfiusumillu sulisinnaassasoq

• Nutaaliortuullunilu aallarnisaasinnaassasoq

• Eqaatsumik namminersorlunilu suliaqarsinnaassasoq

• Paasinarluartumik attaveqariaaseqassasoq

• Kalaallisut qallunaatullu qaffasissumik atuisinnaassuseqarluassasoq

Ilinniartitaanermut Aqutsisoqarfik pillugu:
Ilinniartitaanermut Aqutsisoqarfik politikikkut aqutaavoq, aqutsisoqarfik Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfiup ataani inissisimavoq. Aaqqissuisoqarfimmi suliarineqartartut arlaqarput, aqutsisoqarfinni nalinginnaasumik suliarineqartartut saniatigut saqqummersitsisarfeqarpugut, naqiteriveqarpugut kiisalu paasissutissiinernik atuakkanillu atortitsinermik suliassaqarfeqarluta. Aqutsisoqarfimmi pingaarnertut atuarfiit, efterskolit, friskolit nutaatullu GUX-it, Attat NUIKI-lu suliassaqarfigaagut. Suleqatigiit 50-it missaanniippugut, persuarsiortorsuunngikkaluarluta sammisatsinnut tunngasutigut qaffasissumik pitsaassusilinnik naammassisaqartarnissamik pingaartitsisuuvugut.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginninniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.

Atorfik pillugu annertunerusumik paasisaqarusukkuit  uunga saaffiginnissinnaavutit:
Immikkoortortami aqutsisuugallartoq, Anna Karina Lyberth, akly@nanoq.gl imaluunniit oqarasuaammut +299 34 60 50.