Aqutsinermut Allattoqarfik, Fuldmægtig-inik/Afdelingsleder-inik marlunnik, avatangiisini ulapaarfiusuni uummaarissunilu Naalakkersuisumut, aqutsisoqatigiinnut aammalu Naalakkersuisoqarfimmi immikkoortortaqarfinnut allanut taakkunanngaanniillu suliat pillugit kiffartuussinermi ataqatigiissaarinermilu ikiuussinnaasunik pissarsiorpoq
Fuldmægtig-iuit/afdelingsleder-iuit mikisualunnut tappiffilik? Politikkikkut allaffissornikkullu kissaatit tusarnaarsinnaavigit aammalu aaqqiissutissanik sulinermi atorsinnaasunik pilersitsisarnermi suleqataarusuppit? Suleqativit qaffasissumik pitsaassusilimmik kiffartuussinissamik qulakkeeriniarneranni, aammalu Naalakkersuisoqarfimmi allakkiat pitsaassusiinik qulakkeerisarneranni ikiuukkusuppit? Taamaappat illiuvoq Naalakkersuisoqarfiup Aqutsinermut Allattoqarfiani atorfissaqartitarput.
2025-imi marsip aallaqqaataani imaluunniit isumaqatigiissuteqarnikkut piaartumik atorfinitsitsitsisoqassaaq.
Atorfik pillugu
Aqutsinermut Allattoqarfik Naalakkersuisoqarfimmi immikkoortortaqarfiit sisamaasut ilagaat, tassanilu ineqarneq, sanatitsisutut inissisimaneq, illunut oqartussaaneq attaveqaasersuutillu pillugit Naalakkersuisoqarfiup suliassai isumagineqartarput. Naalakkersuisoqarfimmi sulisut 45-t missaanniipput. Immikkoortortaqarfik arfineq marlunnik sulisoqarpoq, aammalu Naalakkersuisoqarfimmi sulisunut sullissiviulluni. Immikkoortortaqarfimmi suliarineqartartunut assersuutitut Naalakkersuisoqarfimmut Naalakkersuisumullu saaffiginnissutinik ataqatigiissaarisarneq, Naalakkersuisunut Inatsisartunullu, aammalu taakkunanngaanniit suliassat, allakkat, tusarniaanerit, nutserinerit, pitsaassutsinik qulakkeerisarnerit, arkivimik aqutsineq, sulianik aqutsineq ineriartortitsinermilu suliassat, tassunga sammisaqartitsinerit ilanngullugit, saqqummiinerit aammalu assersuutigalugu suliani sullissinermut, pisiniartarnermut, kiffarttuussinermut, sulisunut aaqqissuussinernut il.il. tunngatillugu suliffeqarfiup iluani ilitsersuutinik, malittarisassanik, sulinermi malitassanik ilitsersuutinillu suleqatinut ilinniartitsinerit oqaatigineqarsinnaapput.
Fuldmægtiginik/Afdelingsleder-inik marlunnik, immikkoortortaqarfimmi sulisut Naalakkersuisoqarfimmilu aqutsisut qanittumik suleqatigalugit Naalakkersuisoqarfiup suliassaataanik ataqatigiissaarisarnermi, aammalu Naalakkersuisumik kiffartuussinermi qitiusumik inissisimasinnaasunik pissarsiorpugut.
Suleqatigiinni pinngitsoorneqarsinnaanngitsutut suleqataassaatit. Taamatut inissisimanermi politikkimut tunngasunik paasisimasaqarnissaq, allaffissornermik pikkoriffeqarnissaq ulapiffiusunilu sulisinnaanissaq pisariaqartinneqarput.
Pikkoriffiit piginnaaneqarfiillu matuma kinguliani taaneqartut amerlanersaat pigissagitit naatsorsuutigaarput:
Attuumassutilimmik ingerlaqqiffiusumik ilinniagaqassasutit.
Oqaatsit atorlugit taamatullu allattariarsorlutit attaveqaqateqarsinnaaneq pikkoriffigissagit, pitsaassutsimillu qulakkeerisarneq nukittuffigissagit, aammalu mikisualunnut tappiffeqassasutit.
Kalaallisut danskisullu oqaatsit allattariarsorlutit oqaluinnarlutilluunniit pitsaalluinnartumik atorsinnaassagitit, aammalu tuluttut minnerpaamik oqaloqateqarsinnaassasutit.
Pitsaasumik sulisinnaassuseqassasutit, iliuuseqallaqqissuussasutit siulliullutillu suliniuteqarsinnaassasutit.
Ataqatigiissaarineq, suleqateqarneq taamatullu namminersorlutit sulisinnaaneq pikkoriffigissagitit, aammalu pisuni ulapaarfiusuniluunniit eqaatsumik aaqqiisinnaassasutit.
Ilikkartikkuminartuussasutit, kisiannili aamma nammineerlutit misileraallutit ilinniarsinnaassasutit.
Ilakkuminartuussasutit, suleqatikkuminartuussasutit, ileqqorissaartuussasutit aammalu aaqqiinissaq siunnerfigalugu sulisinnaassasutit.
Sapiissuseqassasutit, tunniusimasuussasutit, naapertuisuussasutit, allannguinissamut piareersimasinnaassasutit, aammalu aaqqissuussaanermi pisortalersugaasumi, politikkikkullu aqunneqartumi sulinermi naleqqussarsinnaassuseqassasutit.
Aaqqissuussat suleriaatsillu atornissaat nuannerissagit.
Kalaallit kulturiannik inuiaqatigiinnillu ilisimaarinnittuussasutit.
Erseqqissaatigineqassaaq, matumani atorfik, assigiinngitsorpassuarnik suliaqarfiusoq, annertuunillu akisussaaffeqarfeqartoq pineqarmat. Piffissakilliortarnissaq naatsorsuutigineqassaaq – tamannalu pingaartumik Inatsisartut ataatsimiinnerini atuuttarpoq.
Neqeroorutigaavut:
Atorfik, politikkikkut aalajangiisarnerit qanillugit suliffiusoq.
Sullivimmi avatangiisit pingaartorsiorfiunngitsut, naalakkersuinikkut aqqutit naatsut suleqatillu suliatigut pitsaalluinnartumik aaqqiinissamik pingaartitsillutik tunniusimasut.
Sullivimmi avatangiisit allanngorartut.
Inuttut suliatigullu ineriartornissaq.
Paasissutissat amerlanerusut
Atorfik pillugu annertunerusumik paasisaqarusukkuit Immikkoortortaqarfimmi Pisortaq Aviâja Mørch Amondsen telefonnr. 34 52 52-imut imaluunniit e-mail avma@nanoq.gl aqqutigalugu attaveqarfigisinnaavat.
Namminersorlutik Oqartussat pillugit annertunerusumik paasisaqarusukkuit, Naalakkersuisut nittartagaat www.naalakkersuisut.gl aqqutigalugu atuagaqarsinnaavutit.
Atorfinitsitsinissamut oqaloqatiginninnerit ingerlaavartumik ingerlanneqartarnissaat naatsorsuutigineqarpoq.
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.
Najugaq
Atorfinnut marlunnut ataaseq atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.
Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq.
Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.