Aqutsisoqarfimmi siunnersorti
Digitalinngortitsinermik Aqutsisoqarfik 34-nik sulisoqarpoq, sulisut immikkoortortaqarfinnut tallimanut agguarsimapput. Allaffissornermi suliaqartussaq aqutsisut immikkoortortaqarfigalugit aqutsisoqarfimmi pisortamut attaveqarluni sulissaaq. Aqutsisunut immikkoortortaqarfimmi inatsisilerituut pingasut allaffissornermilu siunnersorti ataaseq sulisuupput, taamaattumik atorfik aqutsisoqarfimmut pingaaruteqartorujussuuvoq.
Aqutsisoqarfimmi allaffimmiutut ilinniarsimasutuatut pingaaruteqarpoq namminersorlutit sulisinnaassasutit ilisimasaqarluassasutillu. Atorfimmi suliassat assigiinngitsorpassuupput. Aningaasanik aqutsinermit pappialaatinik toqqortuineq, suliassanik annikitsunik suliaqarneq aammalu ataqatigiissaarineq. Ulluinnarni suliassat allanngorartuupput, aqutsisoqarfimmilu sulisut tamarmik suleqatigisassavatit, taamaakkaluartoq qitiusumik allattoqarfimmi immikkoortortaqarfiit allat aamma suleqatigineqarsinnaasassapput.
Aqutsisoqarfimmi ilisimasat assigiinngitsorpassuupput, naalakkersuisoqarfiit aqutsisoqarfiillu assigiinngitsut suleqatigisarpagut. Taamaattumik suleqatikkuminartuussaatit, piginnaasagut ataatsimut ineriartortikkusuttarpagut pitsanngorsarusuttarlutigillu.
Tamanna isumaqarpoq aaqqiissutissanut siunnersuuteqarsinnaallutit, ineriartorfissat allatigulluunniit iliuuseqarfissat nalunaarutigisinnaassavatit. Piginnaasatit aqutsisoqarfimmut pingaaruteqarput, taamaattumik oqaaseqarsinnaassuseqassaatit.
Siunissami suliassatit
Allaffimmi siunnersortitut aqutsisoqarfimmi suliassanik marlunnik pingaaruteqarluinnartunik suliaqassaatit, tassa paasissutissanik sillimaniarnermut akisussaasoq kiisalu pappialaatinut akisussaasoq. Suliassat suliarinissaannut ataqatigiissaakkamik sulisinnaaneq ataatsimullu isiginnissinnaaneq pingaaruteqarput.
Paasissutissanik innuttaasunut, suliffeqarfinnut, suleqatinut suleqatigisartakkanullu suliaqarneq ajunngitsumik suliarineqarnissaat Digitalinngortitsinermut Aqutsisoqarfiup siuttuuffigisariaqarpaa. Paasissutissanik sillimaniarnermut atatillugu politikkinik arlalinnik suliaqarneq maanna ingerlanneqarpoq. Illillu aqutsisoqarfiup politikkiinik allaffissornikkut aqutsisuussaatit kiisalu Cyberimi paasissutissanilu sillimaniarnermut immikkoortortaqarfimmi suleqatit peqatigalugit malinneqarnissaat qulakkiissallugu.
Allagaatinut akisussaasutut aqutsisoqarfimmi qitiusumik allattoqarfimmi nalunaarsuinissamut systemi atorneqartoq atorlugu suliat ingerlanneqarnissaat nakkutigalugulu kinguneqartitsiffigissavat. Suliaq tamanna ingerlassinnaajumallugu systemimi siammasinnerusumik sulianik ingerlatsisinnaasutut (udvidet sagsbehandler) nalunaarsorneqassaatit, aqutsisoqarfimmilu pisortaq suleqatigalugu (F2-mi systemimik piginnittuusoq) aqutsisoqarfimmi toqqortuineq nalunaarsuisussaatitaanerlu pillugit suliniutissanik nalilersuisarlusilu aallarnisaasassaasi.
Taakkua saniatigut annikitsumik aningaasaqarnermut, konteriinermut, nalunaarsuinermut, akiligassaliornermut, missingersuutinut, ilitsersuutinut assigisaannullu aaqqissuussinerit ingerlanneqartassapput.
Aqutsisoqarfiup allagarsiiviinut akisussaasuussaatit; aqutsisoqarfimmut saaffiginnissutit suliaqartunut eqqortunut anngunneqartarnissaat, suliat ilinnit suliarineqarsinnaasut suliarisinnaasassavatit.
Kiisalu annikitsumik sulisoqarnerup iluanik ad hoc-imik taaneqartartunik suliassaqartassaaq, nutsigassanik ataqatigiissaarisoqartassaaq kiisalu aqutsisoqarfiup suliarisassaannut allaffissornikkut suliassaqartassalluni.
Assersuutigalugu suliassat makkuusinnaapput:
Aqutsisoqarfimmi toqqugassat paasissutissanilu isumannaallisaanermi suliaqarneq
Aqutsisoqarfiup allagarsiivianut akisussaasuuneq, tassunga ilanngullugu oqarasuaatillu allakkatigullu saaffiginnissutit
Sulisoqarnermi suliassat:
Atorfiit inuttassarsiuussat nittarsaannissaannut atugassat nutserneqarnissaat kiisalu qitiusumik allattoqarfimmi atorfinnik inuttassarsiuussinermi nittarsaassinermi atorneqartartumut ikkussineq
Nutsernissamut atorfininnermullu atatillugu angalanissamut allaffissornikkut suliassat
Aningaasaqarnermi suliassat: IRIS-imi nalunaarsuineq, akiligassaliorneq, kontuni assigiinngitsuni ataqatigiissitsineq nakkutiginninnerlu
Suliffeqarfiup iluani avataanilu ingerlatassanut allaffissornikkut suliaqarneq
Angalasoqassatillugu timmisartunik akunnittarfinnillu inniminniineq
Piginnaasassat
EVU/HK imaluunniit allaffissornermi allatut ilinniarsimaneq
Allaffissornermi misilittagaqarneq Officemillu atuisinnaaneq
Allannikkut oqalunnikkullu kalaallisut qallunaatut ajornanngippallu tuluttut attaveqarsinnaaneq
Aaqqissuussamik namminersorluni suliaqarsinnaaneq
Neqeroorutigisinnaasagut
Suleqatigiit piginnaasaqarluartut
Atorfik assigiinngitsorpassuarnik suliassaqarfilik
Suliffeqarfik – aqutsisuni aqutsisoqarfillu ataatsimut isigalugu – naammagisimaarinninneq pillugu ingerlaavartumik suliaqarfiusartoq
Sulisut ineriartortinneqarnissaat pingaartitaraarput, aqutsisoqarfiullu akisussaaffeqarfiisa iluini sulinissannut pikkorissarneqarnissat ammaffigaarput
Uagut pilluta
Digitalinngortitsinermut Aqutsisoqarfimmi Kalaallit Nunaanni inuiaqatigiinni qularnaatsumik digitalimik siunissaqarnissaq suliniutigineqarpoq, assigiissaakkanillu digitalimik aaqqiissutinik ineriartortitsinikkut suliniut sulissutigineqarluni. Digitalinngortitsinermut Aqutsisoqarfimmi Kalaallit Nunaanni digitaliseriineq aammalu Namminersorlutik Oqartussat iluanni qarasaasialerineq suliarineqartarput. Aqutsisoqarfimmi akisussaaffeqarfiit annertupput, Aqutsisoqarfimmullu soqutiginninneq naatsorsuutillu aamma annertullutik. Kalaallit Nunaata digitaliseerernissaannut suliniutinut akisussaasutut ingerlatsinerput tulluusimaarutigeqaarput, suliagullu maniguulluta suliarisarlutigit. Taamaaliorsinnaanissatsinnut ilisimasatigut inuttullu piginnaasatigut piumasaqaateqartoqarpoq – taakkualu tunngavigalugit ulluinnarni ulapaarlutalu allanngorarfiusumi sulisarpugut. Sulisut naammagisimaarinnilluarnissaat anguniarlugu suleqatigiilluarneq – ilisimasatigut inuttullu assigiinngissutsit ataqqivagut aammalu sulianik ukkataqarsinnaaneq tunngavigalugit sulivugut.
Atorfik pillugu sukumiinerusumik paasisaqarusukkuit aqutsisoqarfimmi pisortaq Katrine Hjelholt Nathanielsen mailikkut kat@nanoq.gl oqarasuaatikkulluunniit +299 34 59 70 attavigineqarsinnaavoq. Qinnuteqaat Digitalinngortitsinermut Aqutsisoqarfimmut kingusinnerpaamik juunip 20-at 2024tunniunneqarsimassaaq.
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.
Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.
Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.