Erninermut atatillugu Allaffimmi pisortatut sulinngiffeqartumut paarlattaasussaq: Kalaallit Nunaanni erngup nukinganit isumalluutit annersaasa atorluarnissaasa piviusunngortinnissaannut peqataarusuppit?

Allaffissornermut ataqatigiissaarinermullu nukittuunik piginnaasaqarpit, politikkimut paasisimasaqarlutit kiisalu nunatsinni ineriartortitsinermut suliniutit annersaannik suliaqarusuppit?

Ulloq atorfiniffissaq: 1. november 2026 imaluunniit tamatuma kingorna piaartumik.

Avatangiisinut, Pinngortitamut, Nukissiuutinut Ilisimatusarnermullu Naalakkersuisoqarfik, Tasersiami aamma Tarsartuup Tasersuani Kalaallit Nunaanni erngup nukinganik periarfissaqarfiit annersaasa, 1 GW sinnerlugit katillugit nukissiornissamut periarfissaqarfiusut, neqeroortitsiviginissaannut suliatigut akisussaasuusussamut, allaffimmi pisortatut atorfimmi erninermut atatillugu sulinngiffeqartumut paarlattaasussamik sulisussarsiorpoq.

Atorfik pillugu

Erngup nukinganit isumalluutitta niuernikkut atorluarneqarnissaasa iluanni Kalaallit Nunaanni periarfissaqarfiit piviusunngortinneqarnissaat Nukissiuutinut Immikkoortortaqarfiup ukiut arlallit ingerlaneranni sulissutigaat. Suliaqarnermut tassunga ilaatillugu politikkikkut aalajangiisoqarpoq Tasersiami aamma Tartsartuup Tasersuani erngup nukinganik periarfissaqarfiit annertuut marluk neqeroortitsivigineqassasut nittarsaanneqassasullu.

Erngup nukinganik periarfissaqarfiit nunami namminermi nunanilu tamalaani aningaasaliisartunut neqeroorutigineqartussaapput, arlalinnik aningaasarsiorfeqalernissaq siunertarineqarluni. Suliniummi inuiaqatigiinnut annertuumik pingaaruteqartumi siumut ingerlanissap qulakkeernissaanut ingerlatitsisutut pingaaruteqalissaatit.

Nukissiuutinut Immikkoortortaqarfimmi sulisut tallimaavugut. Allaffimmi pisortatut atorfik sulisunut akisussaaffeqanngilaq, kisianni illit suliniummi neqeroortitsineq siumullu ingerlatitsineq pingaarnertut suliatigut akisussaaffigilissavat.

Suliarilissavatit:

• neqeroortitsinerup ingerlanerani siumut ingerlanissaanik qulakkeerineq (ilanngullugit piukkunnartussarsiuussinerup, aningaasaliisartunik misissuinerup, innuttaasunik ataatsimiititsinernut pilersaarusiornerup il.il. ingerlannissaat)

• suliap ingerlaneranut atatillugu ingerlaavartumik politikerinik sullissineq kiisalu Kalaallit Nunaanni suliniutit annersarilersinnaasaat pillugu tamanut attaveqaqateqarnermut suleqataaneq.

• oqartussat, suliassaqarfiit ingerlatsisullu attuumassutillit akimorlugit ataqatigiissaarineq.

• aalajangiinissamut tunngavissianik allanillu najoqqutassanik politikkikkut suliarineqartussanik suliaqarneq.

• aningaasaliisartunngorsinnaasunik, siunnersuisunngorsinnaasunik soqutiginnittunillu allanik oqaloqateqarneq.

• teknikkikkut, aningaasaqarnikkut, inatsisilerinikkut allaffissornikkullu najoqqutassanik pisariusunik pitsaassutsinik qulakkeerineq.

• missingersuutinut akisussaasuuneq aningaasaqarnermilu malinnaaneq.

Piukkunnassutsit 

Ingerlaqqiffiusumik ilinniagaqarsimavutit aammalu ukiuni arlalinni pisortat imaluunniit namminersortut suliffeqarfiini atorfeqarnermit allaffissornikkut misilittagaqarlutit. Politikerit qanillugit atorfilittatut sulinermik misilittagaqaruit imaluunniit ilisimasaqaruit iluaqutaassaaq.

Atorfik assigiinngisitaartorpassuarnik suliassaqarfiuvoq aammalu periusissatigut isumaliutersuuteqarnerit aammalu sukumiisortat neqeroortitsinerup annertuup isumannaatsumik naammassitinnissaanut inissinneqartussat akornanni sulisinnaassaatit. 

Taamaattumik inatsisilerinikkut ajornartorsiutini itisiliineq, inuiaqatigiit aningaasaqarneranni aaqqissuussinerit naatsorsuinerillu kiisalu politikerinik sullissineq aamma innuttaasunik, siunnersortinik aningaasaliisartunngorsinnaasunillu attaveqaqateqarneq nuannarissagitit pingaaruteqarpoq. 

Naatsorsuutigaarput illit:

• politikkikkut aalajangiinerit ingerlasarnerinik misilittagaqartutit paasisimasaqartutillu.

• suliassani pisariusuni aaqqissuussinermik siumullu ingerlatitsinermik misilittagaqartutit. 

• nukissiornermut suliniutit iluanni neqeroortitsinerit ingerlasarnerinut ilisimasaqartutit.

• politikkimut paasinnillaqqissutit aammalu ingerlatsisunik avataaneersunik assigiinngitsorpassuarnik, akerleriinnik soqutigisaqarsinnaasunik tatiginartumik oqaasissanillu akunnaallisaarillaqqillutit suleqatigiinnerni suleqataasinnaasutit. 

• paasissutissiillaqqittutit aammalu tuluttut pikkorillutit attaveqaqateqarsinnaasutit.

• nukissiuutinut suliassaqarfik, aningaasaliinerit annertunerusut aammalu nunani tamalaani aningaasaliisartunik suleqateqarneq soqutigigitit suliassatigullu paasisimasaqarfigigitit.

• kisitsisinut paasisimasaqartutit. 

• piffissamut killigititat malillugit naammassinninnissamut qulakkeerillaqqittutit aammalu ulluinnarni ulapaarfiusuni eqqissisimaannarnissaq pikkoriffigigit. 

• namminersorlutit sulisartutit aammalu suliassat isumannaatsumik naammassitinnissaannut akisussaaffimmik tigusisartutit.

Neqeroorutigaagut 

Kalaallit Nunanni erngup nukinganit isumalluutitta niuernikkut atorluarnissaasa iluanni Kalaallit Nunaanni periarfissaqarfiit piviusunngortinnissaannut qitiusumi inissisimalernissamut periarfissaqalissaatit.

Neqeroorutigaagut:

• akisussaaffik annertooq taamaaqataanillu nuannersumik allaassuteqalersitsinissamut periarfissaq. 

• erninermut atatillugu sulinngiffeqartumut paarlattaaffiusoq suliassatigut unammillernartoq annertuumik nammineerfiusussaq.

• suliffik orniginartoq ataqqinninneq tatiginninnerlu malunnarlutik persuarsiorfiunngitsoq.

• suliassaqarfik tamatigoortoq pissanganartorlu nunamut namminermut nunarsuarmullu ukkatarinniffiusoq.

Aningaasarsianut atorfininnermilu atugassarititaasut

Atorfik erninermut atatillugu sulinngiffeqartumut paarlattaaffiusussaavoq 1. november imaluunniit tamatuma kingorna piaartumik sulilernissaq naatsorsuutigineqarluni aammalu qaammatini 12-ini sivisussuseqarluni.

Atorfik akissaateqarfimmi LR 36-mi maanna inissisimavoq.  1. april 2026 LR 36-mi tunngaviusumik akissarsiaq tapiillu aalajangersimasut soraarnerusutissianullu illuartittagaq ilanngullu antterussuseqarput qaamammut   Kr. 57.531 ukiumullu Kr. 690.372.

Aningaasarsianut atorfininnermullu tunngasut, ilanngullugit atorfininnermi soraarnermilu akiliunneqarluni angalasinnaatitaaneq pequtillu nuutinnerinut akiliunneqarnissamut pisinnaatitaaneq, atorfininnerup nalaani Namminersorlutik Oqartussat kattuffiullu isumaqatiginninniarsinnaatitaasup pineqartup akornanni isumaqatigiissutit naapertorlugit pissapput.

Ineqarneq

Atorfimmut atasumik inissiamut innersuussisoqarsinnaanngilaq. 

Annertunerusunik paasisaqarusuppit?

Atorfik pillugu paasissutissat annertunerusut immikkoortortaqarfimmut pisortamut Ane Wraae Nielsen-imut saaffiginnilluni pineqarsinnaapput, oqarasuaat +299 58 67 89, e-mail: awni@nanoq.gl.

Oqaloqatigiinnerit 

Sulilersussanik oqaloqatiginninnerit ingerlaavartumik ingerlanneqarnissaat naatsorsuutigaarput. Taamaattumik soqutiginnittut qinnuteqarnissamut piaarnerpaamik kajumissaarneqarput.

Qinnuteqarnissamut killigititaq

Qinnuteqaat CV aamma soraasummeersimanermut uppernarsaatit assilineri ilanngullugit link matuma kingulianiittoq aqqutigalugu nassiunneqassapput kingusinnerpaamik ulloq 25-09-2026. Qinnuteqaatit e-mail-ikkut tigusanngilagut. 

Sapinngisamik piaarnerpaamik Atorfininnissaq.