ICC KALAALLIT NUNAANNUT: IMARTAT AQUNNEQARNERANNUT SIUNNERSORTI (MARINE GOVERNANCE POLICY ADVISOR)

Imartat aqunneqarnerannut suliaqartussamik siunnersortimik (MARINE GOVERNANCE POLICY ADVISOR) periarfissaq siulleq sulilertussamik ICC KALAALLIT NUNAAT sulisussarsiorpoq.

Siunnersortip (MARINE GOVERNANCE POLICY ADVISOR) ICC sinnerlugu suliarissavaa imartat imartanilu avatangiisit aqunneqarnerannut annerpaamik sunniuteqarnissaq.

Siunnersortip (MARINE GOVERNANCE POLICY ADVISOR) suliassaqarfianut ilaapput piareersarneq, suliassanik isumaginninneq, siunnersuineq, sulianut malinnaaneq kiisalu ICC-ip allaffeqarfiisa akornanni suleqatigiinnerup ataqatigiissarnera, makku pillugit:

1. Pikialasorsuaq pillugu politikkerisat inerisarnissaat ICC-llu suliniutissatut aalajangiussaanik piviusunngortitsineq.

2. Nunat ataasiakkaat inatsisaasa avataaniittut uumasoqatigiit illersorneqarnissaat piujuartitsinermillu toqqammaveqartumik atuiffigineqarnissaat pillugu Naalagaaffiit Peqatigiit isumaqatigiissutaanut BBNJ-mi sulinermi kiisalu plastik pillugu nunat tamalaat isumaqatigiissutissaannut isumaqatiginninniarnerni peqataasarnissaq.

Taakkulu saniatigut: Imartat pillugit nunat tamalaat suleqatigiiffiini suleqataanissaq, soorlu imartat pillugit nunat tamalaat suleqatigiiffianni IMO-mi, kiisalu Issittup Imartaata Qiterpasissuani killilersornertaqanngitsumik nalunaarsorneqanngitsumillu aalisannginnissamut nunat tamalaat akornanni isumaqatigiissut CAOFA aqqutigalugu sulineq.

3. Qulaani taaneqartut pillugit politikkinik inerisaaneq, tamannalu pissalluni ICC-ip allaffeqarfiini suleqatigisat peqatigalugit.

Atorfeqarnermi pisortarisaq qaninneq tassaavoq ICC Kalaallit Nunaanni Allaffimmi Pisortaq. Suleqatigisat qaninnerit tassaassapput imartat aqunneqarnerat pillugu ICC-mi suleqatigiit, Silap pissusaa Avatangiisillu pillugit ICC-p siunnersortaa, Inuit Pisinnaatitaaffii pillugit Siunnersorti kiisalu ICC-mut tamarmut Siulittaasoq.

Atorfeqartitaanermi piffissaq killeqarpoq, periarfissaqarlunili ukiut sisamat tikillugit sivitsorneqarnissaanut.

Qinnuteqaat nassiunneqassaaq uunga: iccgreenland@inuit.org, kingusinnerpaamik 15. august 2024. Atorfik pillugu paasissutissanik annerusumik pissarsisoqarsinnaavoq uunga attaveqarnikkut: Allaffimmi Pisortaq Sofia Geisler, sofia@inuit.org