Ilisimatusarfimmi Inatsisilerinermut immikkoortortamut lektori imaluunniit professori immikkoortortaqarfiup pisortaatut atuuffeqartussaq

Ilisimatusarfimmi Inatsisilerinermut immikkoortortaq inatsisinik ilisimatusaatini lektorimik imaluunniit professorimik, immikkoortortaqarfiup pisortaatut atuuffeqartussamik, pissarsiorpoq. Adjunktilli aamma piukkunneqarsinnaapput. Atorfinitsitaaneq killissaleriikkamik ukiunik pingasunik sivisussuseqassaaq, sivitsorneqarnissaanik periarfissaqartumik.

Immikkoortortaq Inuiaqatigiilerinermik, Aningaasaqarnermik Tusagassiornermillu Ilisimatusarfiup ataaniippoq, instituttilu taanna pingasunik allanik immikkoortortaqarpoq:

• Isumaginninnermik Suliaqarnermut Immikkoortortaq

• Tusagassiornermut Immikkoortortaq

• Inuiaqatigiilerinermik Aningaasaqarnermillu Immikkoortortaq

Atorfiup februaarip 1-ani 2026 imaluunniit isumaqatigiissuteqarnikkut inuttalerneqarnissaa kissaatigineqarpoq.

Inatsisilerinermut Immikkoortortami inatsisilerinermi ilisimatusarnerup iluani sammisatigut siammasissumik sinaakkuteqartumik inatsisilerinermi ilisimatuutut misissuineq ingerlanneqartarpoq, tassani Kalaallit Nunaanni inatsisitigut pissutsit immikkut sammivigitinneqarlutik. Tamanna ilutigalugu Inatsisilerinermut Immikkoortortap inatsisilerinermik ilinniagaq akisussaaffigaa.

Inatsisilerinermi fagini nunani avannarlerni inatsisilerinermi ilinniakkanit ilisimaneqartut assigalugit bachelorinngornianut aamma kandidatinngornianut qaffasissusilimmik ilinniartitsisoqartarpoq. Kalaallit Nunaanni inatsiseqarneq Danmarkimilu inatsiseqarneq akunnerminni assigiissuteqarput, kisianni ilinniartut Kalaallit Nunaanni inuiaqatigiit aallaavigalugit nunatsinni inatsiseqarneq pillugu tigussaasumik ilinniartinneqarnissaat pingaartinneqarpoq.

Ilinniakkami ilinniartut 50-it missaat allassimapput, immikkoortortamilu atorfillit ullup ilaannaa suliffeqartut marluupput; ataaseq ph.d.-nngorniuteqarluni adjunkti aappaalu professori, taakkualu atorfeqartitaanerat 2026-p ingerlanerani qaangiutingajalerpoq. Tamatuma saniatigut aalajangersimasunik tikeraatut ilinniartitsiartortoqartarpoq arlalinnik. Taamaammat immikkoortortaqarfiup pisortassaata ilinniartitsisutut aamma ilisimatusartutut amerlanerusunik atorfinitsitsinertigut immikkoortortamik ineriartortitseqataarusuttuussaaq.

Ilisimatusarfimmi ilinniartitsinerit kalaallisut, qallunaatut tuluttullu ingerlanneqarsinnaasarput. Kalaallit Nunaanni inatsisit qallunaatut kalaallisullu allassimammata oqaatsit taakkua ilaannik minnerpaamik ataatsimik ilitsoqqussatut oqaaseqarnissaq aammattaaq inatsisilerinerup iluani minnerpaamik ph.d.-tut qaffasissusilimmik danskit kalaallilluunniit inatsisaannik piginnaasaqarnerup uppernarsarneqarsinnaanissaa piumasaqaataapput. Oqaatsit aappaanik ilisimasaqarneq aamma iluaqutaassaqaaq, soorluttaaq tuluttut pisinnaasaqarneq pingaartinneqartoq. Kalaallit inuiaqatigiit kulturiallu pillugit paasisimasaqarnissaq aammattaaq pingaartinneqarpoq. Atorfinitsinneqarnerup nalaani Nuummi najugaqartuunissaq atorfinitsinneqarnissamut piumasaqaataavoq.

Piginnaasassatut piumasaqaatit

• Ph.d.-tut qaffasissusilimmik ilisimatusarfimmi inatsisilerinerup iluani ilinniagaqarsimaneq.

• Lektoritut/professoritut adjunktitulluunniit qaffasissusilimmik ilisimatusarnermik, ilinniartitsinermik aamma paasissutissiortarnermik piginnaasaqarneq.

Suliassat

Atorfimmi allagarsiunneqartumi suliassatit pingaarnerit tassaassapput

• Immikkoortortamik aqutsineq, tamatumunnga ilanngullugit; skemaliornerit, faginik ataqatigiissaarineq, tikeraatut ilinniartitsiartortunik suleqateqarneq taakkualu ilinniartitsisarnerannik ataqatigiissaarineq, ilinniartitsinerup nalilersorneqarneranik malittarinnittarneq, ilinniartitsinerup soraarummeersitsinermilu suliakkiissutit pitsaassusaannik qulakkeerinnittarneq, ilinniartunik ikorfartuineq siunnersuinerlu, ilinniakkamik immikkoortortamillu ineriartortitseqqiineq, faginik paasisimasalinnik suleqateqarneq.

• Instituttip immikkoortortaqarfiini pisortanik allanik aamma ilinniartunik sullissivimmik suleqateqarneq.

• Illit suliatigut ilisarnaatinnut aamma soqutigisannut naleqquttuni inatsisilerinermi fagini ilinniartitsineq.

• Inatsisilerinermi ilinniartunik bachelorinngorniassutiminnik kandidatinngorniassutiminnilluunniit allaaserinnittunik, ilaatigullu bachelorinngornianik immikkullu ilinniartunik ilinniakkanit allaneersunik siunnersuineq soraarummeersitsisarnerlu.

• Immikkoortortaqarfiup suliassaqarfiisa iluanni ilisimatuutut misissuineq kiisalu saqqummersitsisarneq ilisimasanillu siammarterisarneq. Ilisimatusarnivit paasissutissanillu saqqummersitsinivit Kalaallit Nunaannut aamma Issittumut attuumassuteqarnissaat pingaartinneqarpoq.

• Ilisimatusarfimmi atorfilittut ilisimasatit inuiaqatigiinnit atorneqarsinnaasunngortittariaqarpatit, assersuutigalugu, naleqquppat, tusagassiorfinnit apeqqutigineqartunik akinikkut.

• Suliatigut nalilersuisarneq.

• Allaffissornermi suliassanik aaqqiissuteqarnikkut ikorfartuisarneq suleqatigiillu suleqatigiinneranni peqataaneq.

Qinnuteqaat

Inatsisilerinermut Immikkoortortami atorfimmi allagarsiunneqartumi atorfininnissamut qinnuteqaat - allaganngorlugu qinnuteqaatip, atorfik sorleq kissaatigineqarnersoq pillugu ilaqartup, saniatigut - ukuninnga imaqassaaq:

Ilanngussaq 1: Curriculum Vitae.

Ilanngussaq 2: Ilisimatusarfinni soraarummeersimanernut uppernarsaatit.

Ilanngussaq 3: Oqaaseqaatinik aallerfiusinnaasut inuit pingasut attaviginissaannut paasissutissat.

Ilanngussaq 4: Tamakkiisumik normulersukkamillu saqqummersissimasat allattorsimaffiat.

Suliarisimasat nassiunneqartut (Ilanngussaq 8 ataaniittoq naleqq.) saqqummersissimasat allattorsimaffianni *-mik nalunaarsorneqassapput.

Ilanngussaq 5: Maannamut ilisimatusaatigisimasat naatsumik allaaserineri kiisalu siunissami ilisimatusaatiginiakkap(-kat) takussutissartaat.

Ilanngussaq 6: Teaching portfolio ilinniartitsinermik piginnaasanik ilisimatusarfimmi pædagogikum-imik assigisaanilluunniit sammisaqarsimanermik takussutissartalik, kiisalu siusinnerusukkut, maannamut siunissamilu ilinniartitsinermik eqqarsaatersuutinik takussutissiaq.

Ilanngussaq 7: Ilisimatusaatinik paasissutissiornernut takussutissiaq.

Ilanngussaq 8: Saqqummersissimasat kapitalitut allaatigisatulluunniit takissusillit tallimat tikillugit amerlassusillit. Nalilersorneqarnissamut immikkut attuumassutilinnik qinnuteqartoq saqqummersissimasaminik amerlanerpaanik tallimanik toqqaasinnaavoq.

Naliliisarneq atorfinitsitsisarnerlu

Qinnuteqartut nalilerneqarnerat malittarisassat atuuttut naapertorlugit naliliisartunit ilisimasalinnit ingerlanneqartarpoq. Qinnuteqartut piffissap qinnuteqarfiusup naareernerani naliliisartut inuttalersornerinik ilisimatinneqassapput. Qinnuteqaatit takkussuuttut naliliisartoqatigiinnit misissorneqassapput, tamanna pereerpat taakkua Instituttimi aqutsisumut innersuusiussallutik taassumalu kingorna oqaloqatigineqartussat qaaquneqarumaarput.

Lektoritut atorfinitsitaaneq pisinnaavoq atorfininnissaq sioqqullugu naliliilluartoqarpat imaluunniit qinnuteqartoq piffimmi allami sammisami lektorimit nalilerneqarsimappat. 

Attavigisassat/ paasissutissat:

Atorfik pillugu sukumiinerusunik paasisaqarusukkuit, tikilluaqquneqarputit Inatsisilerinermut immikkoortortaqarfimmi pisortaq Anette Storgaard, oqarasuaat (+45) 2467 5238, imaluunniit Institutimi pisortaq Annemette Nyborg Lauritsen oqarasuaat: +299 34 73 60 attavigissallugu.

Ilisimatusarfik pillugu paasisaqarnerorusukkuit uani paasisaqarnerusinnaavutit www.uni.gl

Ilisimatusarfik pillugu

Ilisimatusarfik 1987-imi pilersinneqarpoq. Maannakuugallartoq ilinniarneqarsinnaasut assigiinngitsut 13-upput, taamatuttaaq Ilisimatusarfiup neqeroorutigai diplom-imut masterimullu saniatigut ilinniarnerit. Ilisimatusarfik issittumi universitetiuvoq nunarsuup ilaani pilertortumik ineriartorfiusumi nutaanik ilisimasaqalerfiusoq nutaaliorfiusorlu. Siulersuisut tassaapput Ilisimatusarfiup qullersai. Ulluinnarni aqutsineq rektorimit direktørimillu ingerlanneqarpoq. Instituttit sisamaasut Instituttini Siunnersuisoqatigiinnit siunnersorneqartumik siulersorneqarput.

Ilisimatusarfik sisamanik instituteqarpoq:

• Ilinniartitsinermik Ilisimatusarfik

• Inuiaqatigiilerinermik, Aningaasaqarnermik Tusagassiornermillu Ilisimatusarfik

• Kulturimik, Oqaatsinik Oqaluttuarisaanermillu Ilisimatusarfik

• Peqqissaanermik Pinngortitamillu Ilisimatusarfik

Allaffissornikkut aqutsisoqatigiiffik pillugu

Allaffissornikkut aqutsisoqatigiiffiup ilisimatusarfik tamakkerlugu sullitaraa. Ilisimatusarfiup direktørianit aqunneqarpoq. Allaffissornikkut aqutsisoqatigiiffik Ilinniarfissuarmi Ilimmarfimmilu immikkoortortaqarpoq. Immikkoortortat faginik ingerlatsiviusunik qanimut suleqateqartarput soorlu namminneq akunnerminni aamma taamaattartut. Allaffissornikkut aqutsisoqatigiiffimmi suliassat tassaapput: ilinniartut pillugit-, sulisut pillugit aqutsineq, Siulersuisuniik, Akademisk Rådimik kiisalu ilimmarfimmi sulisunik ilinniartunillu sullissineq. Allaffissornikkut aqutsisoqatigiiffiup Ilimmarfiup ilutaanik sanaartornermik nakkutiginninneq aamma ingerlataraa.

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.

E-mail-ikkut qinnuteqaatinik tigusineq ajorpugut.

Qinnuteqaat nassiuguk