Ilisimatusarfiup Isumaginninnermik Suliaqarnermi Immikkoortortaanut psykologiimi adjunkti lektoriluunniit
Ilisimatusarfiup Isumaginninnermik Suliaqarnermi Immikkoortortaa psykologiimi adjunktissarsiorpoq imaluunniit lektorissarsiorpoq.
Atorfiup 2024-mi aggustip aallaqqaataani imaluunniit isumaqatigiissuteqarnikkut inuttalerneqarnissaa kissaatigineqarpoq.
Isumaginninnermik Suliaqarnermi Immikkoortortaq ilisimatuutut misissuinermi aamma ilinniartunut assigiinngisitaartumik avatangiiseqartitsivoq 50-t missaannik ilinniartulik, 6-nik sulisulik arlalinnillu ph.d.-nngorniartulik kiisalu avataaniit ilinniartitsiartortut. Immikkoortortaq isumaginninnermik suliaqarnermi bacheloritut ilinniakkamik maanna neqerooruteqarpoq, siunissamilu isumaginninnermik suliaqarnermi kandidatitut ilinniakkamik ammaasoqarnissaa sulissutigineqarluni.
Isumaginninnermut suliassaqarfiup iluani ilisimatusarneq immikkoortortami ingerlanneqartarpoq ingammik Kalaallit Nunaannut Issittumullu tunngasuni. Adjunktit lektorillu ilisimatusarnermik, ilinniartitsinermik ilitsersuinernillu tapersiisarput.
Ilisimatusarfimmi ilinniartitsinerit kalaallisut, qallunaatut tuluttullu ingerlanneqarsinnaapput. Ilinniartitsinermi atortut amerlanerpaartaat qallunaatuujullutilluunniit kalaallisuujummata oqaatsit taakkua ilaannik piginnaasaqarnissaq piumasaqaataavoq. Oqaatsit taakkua aappaanik ilisimasaqarneq aamma iluaqutaassaaq, soorluttaaq tuluttut pisinnaasaqarneq pingaartinneqartoq.
Piginnaassusissanik piumasaqaatit
Ph.d.-tut qaffasissusilimmik ilisimatusarfimmi naleqquttumik ilinniagaqarsimaneq.
Adjunktitut lektoritulluunniit qaffasissusilimmik ilisimatusarnermik, ilinniartitsinermik aamma paasissutissiortarnermik piginnaasaqarneq.
Kalaallit Nunaanni aamma Issittumi isumaginninnermik suliassaqarfiup iluani ullumikkut ajornartorsiutaasunik ilisimasaqarneq iluaqutaassaaq - tamannali piumasaqaataanngilaq.
Suliassat
Lektoritut adjunktitulluunniit suliassatit pingaarnerit tassaassapput:
psykologiimi ilaatigullu ilinniakkami fagini allani ilinniartitsineq.
ilinniartunik bachelorinngornianik, kandidatinngornianik ph.d.-nngornianillu ilitsersuineq soraarummeersitsisarnerlu.
immikkoortortap suliassaqarfiini Kalaallit Nunaat Issittorlu qitiutillugit ilisimatuutut misissuineq kiisalu saqqummersitsineq aamma ilisimatusaatinut atatillugu paasissutissiorneq.
immikkoortortami instituttimilu atorfillit allat suleqatiginerisigut ilinniakkamik ineriartortitseqqiineq.
ilisimasanik inuiaqatigiinni avitseqateqarneq aamma tamanut ammasumik oqallinnerni peqataasarneq.
suliatigut nalilersuisarneq.
allaffissornikkut suleqatigiillu akornanni suleqatigiinnerni peqataaneq.
Isumaginninnermik Suliaqarnermi Immikkoortortami atorfinissaatit, immikkoortortaq Inuiaqatigiilerinermik, Aningaasaqarnermik Tusagassiornermillu Ilisimatusarfiup ataaniippoq, Ilisimatusarfiulli instituttiini allani ilinniartitsisarnissat aamma pisariaqartinneqartarsinnaassaaq.
Adjunktitut imaluunniit lektoritut atorfinitsinneqarneq piginnaasat misilittakkallu aallaavigalugit pissaaq.
Qinnuteqaat
Psykologiimi lektoritut adjunktitulluunniit atorfininnissamut qinnuteqaat, allaganngorlugu qinnuteqaatip saniatigut, ukuninnga imaqassaaq:
Ilanngussaq 1: Curriculum Vitae
Ilanngussaq 2: Soraarummeersimanernut uppernarsaatit.
Ilanngussaq 3: Oqaaseqaatinik aallerfiusinnaasut inuit pingasut attaviginissaannut paasissutissat.
Ilanngussaq 4: Tamakkiisumik normulersukkamillu saqqummersissimasat allattorsimaffiat.
Suliarisimasat nassiunneqartut (Ilanngussaq 8 naleqq.) saqqummersissimasat allattorsimaffianni *-mik nalunaarsorneqassapput.
Ilanngussaq 5: Maannamut ilisimatusaatigisimasat naatsumik allaaserineri kiisalu siunissami ilisimatusaatiginiakkap(-kat) takussutissartaat.
Ilanngussaq 6: Teaching portfolio ilinniartitsinermik piginnaasanik ilisimatusarfimmi pædagogikum-imik assigisaanilluunniit sammisaqarsimanermik takussutissartalik, kiisalu siusinnerusukkut siunissamilu ilinniartitsinermik eqqarsaatersuutinik takussutissiaq.
Ilanngussaq 7: Ilisimatusaatinik siammarterinermut takussutissiaq.
Ilanngussaq 8: Saqqummersissimasat kapitalitut allaatigisatulluunniit takissusillit tallimat tikillugit amerlassusillit. Nalilersorneqarnissamut immikkut attuumassutilinnik qinnuteqartoq saqqummersissimasaminik amerlanerpaanik tallimanik toqqaasinnaavoq.
Attavigisassat/ilisimatitsissutit:
Atorfik pillugu sukumiinerusunik paasisaqarusukkuit, tikilluaqquneqarputit Institutimi pisortaq Annemette Nyborg Lauritsen, oqarasuaat: tlf. +299 385660 attavigissallugu. Ilisimatusarfik pillugu annertunerusumik paasisaqarusukkuit paasissutissat allat atuarsinnaavatit uunga iserlutit www.uni.gl
Naliliisarneq atorfinitsitsisarnerlu, adjunktinut lektorinullu atorfinnut
Qinnuteqartut nalilerneqarnerat malittarisassat atuuttut naapertorlugit naliliisartunit ilisimasalinnit ingerlanneqartarpoq. Qinnuteqartut piffissap qinnuteqarfiusup naareernerani naliliisartut inuttalersornerinik ilisimatinneqassapput. Qinnuteqaatit takkussuuttut naliliisartoqatigiinnit misissorneqassapput, tamanna pereerpat taakkua Instituttimi aqutsisumut innersuusiussallutik.
Adjunktitut atorfeqartitaaneq nalinginnaasumik ukiunik 4-nik sivisussuseqarpoq, tamatumalu kingorna suli ukiut marluk angullugit sivitsorneqarsinnaalluni. Tamatuma kingorna lektorip naliliinera tunngavigalugu lektoritut atorfittut aalajangersimasunngorlugu atorfinitsinneqarsinnaavoq.
Lektoritut atorfinitsitaaneq pisinnaavoq atorfininnissaq sioqqullugu naliliilluartoqarpat imaluunniit qinnuteqartoq piffimmi allami sammisami lektorimit nalilerneqarsimappat.
Ilisimatusarfik pillugu
Ilisimatusarfik 1987-imi pilersinneqarpoq. Maannakuugallartoq ilinniarneqarsinnaasut assigiinngitsut qulingiluaallutik taamatuttaaq Ilisimatusarfiup neqeroorutigai diplom-imut masterimullu saniatigut ilinniarnerit. Ilisimatusarfik issittumi universitetiuvoq nunarsuup ilaani pilertortumik ineriartorfiusumi nutaanik ilisimasaqalerfiusoq nutaaliorfiusorlu. Siulersuisut tassaapput Ilisimatusarfiup qullersai. Ulluinnarni aqutsineq rektorimit direktørimillu ingerlanneqarpoq. Instituttit sisamaasut Instituttini Siunnersuisoqatigiinnit siunnersorneqartumik siulersorneqarput.
Ilisimatusarfik sisamanik instituteqarpoq:
Ilinniartitsinermik Ilisimatusarfik
Inuiaqatigiilerinermik, Aningaasaqarnermik Tusagassiornermillu Ilisimatusarfik
Kulturimik, Oqaatsinik Oqaluttuarisaanermillu Ilisimatusarfik
Peqqissaanermik Pinngortitamillu Ilisimatusarfik
Allaffissornikkut aqutsisoqatigiiffik pillugu
Allaffissornikkut aqutsisoqatigiiffiup ilisimatusarfik tamakkerlugu sullitaraa. Ilisimatusarfiup direktørianit aqunneqarpoq. Allaffissornikkut aqutsisoqatigiiffik Ilinniarfissuarmi Ilimmarfimmilu immikkoortortaqarpoq. Immikkoortortat faginik ingerlatsiviusunik qanimut suleqateqartarput soorlu namminneq akunnerminni aamma taamaattartut. Allaffissornikkut aqutsisoqatigiiffimmi suliassat tassaapput: ilinniartut pillugit-, sulisut pillugit aqutsineq, Siulersuisuniik, Akademisk Rådimik kiisalu ilimmarfimmi sulisunik ilinniartunillu sullissineq. Allaffissornikkut aqutsisoqatigiiffiup Ilimmarfiup ilutaanik sanaartornermik nakkutiginninneq aamma ingerlataraa.
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.
Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.
Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq
Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.