Fakta
Atorfiup suussusaa: Allatseqarfimmi pisortaq
Suliffeqarfik: Inatsisartut Allaffeqarfiat
Qinnuteqarfissamut killigititaq: 27. juli 2026 nal. 12
Attavissaq: Steen Lynge oqarasuaatikkut +299-34 61 03 imaluunniit e-mailikkut uunga stlyn@ina.alla.gl
Inatsisartut Allattoqarfianni allatseqarfimmi pisortatut atorfimmut inatsisartoqarnermik paasisimasalimmik allaffissornikkullu misilittagalimmik piginnaasaqarluartumik sulisussarsiorpugut. Naatsorsuutigaarput minnerpaamik inuiaqatigiilerinermi, inatsisilerinermi, statskundskab assigisaanilluunniit kandidatitut ilinniarsimasuunissat.
Allatseqarfiup pisortaa Siulittaasoqarfiup allatseqarfianut, allatseqarfiup pisortaata saniatigut AC-fuldmægtigimik ataatsimik, allaffimmi fuldmægtigimik ataatsimik, nittartagalerisuik ataatsimik, attaveqaqatigiinnermut sulisumik ataatsimik Inatsisartullu siulittaasuata allattaanik sulisoqartumut, pisortaavoq. Allatseqarfiup pisortaa taamatuttaaq Aningaasaqarnermut immikkoortortamut, aningaasaqarnermik nakkutilliisumik ataatsimik allaffimmilu fuldmægtiginik marlunnik sulisulimmut, taamatullu aamma Qarasaasiaqarnermut immikkoortortamut, qarasaasiaqarnermut siunnersortimik ataatsimik sulisulimmut, pisortaavoq.
Suliassatit pingaarnerit tassaassapput:
• Pisortaq peqatigalugu Siulittaasup, Siulittaasoqarfiullu allatseqarfeqarnikkut sullinneqarneranut akisussaaneq
• Siulittaasup Siulittaasoqarfiullu aalajangiinerisa, pisortaq allattoqarfimmilu aqutsisut il.il. allat qanimut suleqatigalugit, malitseqartinneqarnerannut akisussaaneq
• Inatsisartut aningaasarsiaqartinneqarnerannut partiinullu tapiissutinut akisussaaneq
• Aningaasaqarnermut qarasaasiaqarnermullu akisussaaneq
• Inatsisartuni suliniutinut ingerlaavartunut assigiinngitsunut peqataaneq tunniussaqartarnerlu, tamatumuunalu isumasioqatigiinnernik aaqqissuussineq assigisaallu
Naalakkersuinikkut sullissinermut sullivimmilu avatangiisit pitsaasuunissaanut ineriartortitseqataassaatit nukittorsarneqarnerannullu peqataasassallutit.
Allattoqarfiup pisortaata pisortaq qullersaraa allattoqarfimmilu pisortaqatigiinnut naligiimmik ilaassalluni.
Pingaaruteqarpoq allattoqarfimmi pisortatut nalussannginnakku allattoqarfiup Inatsisartunut ilaasortanik partiinillu siunnersuisarnera ikiuisarneralu tamatigut partii apeqqutaatinnagu ingerlanneqartartussaammat, taamatullu aamma ilaasortat tamarmik assigiimmik pitsaasumillu sullinneqartartussaammata.
Inatsisartoqarnermi malittarisassanik, suleriaatsinik suliassallu ingerlasarnerannik sukumiisumik paasisimasaqarnissat ajoqutaanavianngilaq.
Naatsorsuutigaarput attaveqaqatigiinnermut, kalaallisut, qallunaatut tuluttullu allakkatigut oqaluinnarlutillu, pitsaanerpaanik piginnaasaqassasutit, ilisimasanillu ingerlatitseqqiinermik pikkoriffeqassasutit.
Aqutsinermut suleqatigiinnermullu piginnaasaqarluarnissat naatsorsuutigaarput. Peqatigitillugu naatsorsuutigaarput ulluinnarni ulapaarfiusuni suliassanik amerlasuunik ataatsikkut ingerlatsiffiusuni suliatigullu annertuumik unammilligassaqarfiusuni paatsiveerutiannginnissat. Kajumissuseqarluarnissat, ulapileruttornernilu sulianik nuannarinnittuarlutillu qiimasuujuarnissat aamma pingaartipparput.
Annertuumik nammineerlutillu sulinissannut piareersimassaatit, malunnartumik sulinerusarnissaq naatsorsuutigineqartariaqarluni. Tamanna minnerunngitsumik Inatsisartut ataatsimiinnerisa nalaanni atuuppoq. Kalaallit Nunaanni Kalaallit Nunaatalu avataanut angalangaatsiartarnissaq naatsorsuutigisariaqarpat.
Qinnuteqartut akornanni naliliiniarnermi sulisunik siulersuinermik pitsaasumillu suleqatigiissitsisinnaanermik ilisimasaqarnissat misilittagaqarnissallu immikkut pingaartinneqassapput.
Atorfimmut atatillugu inuttut suliatigullu ineriartornissamut periarfissat annertupput.
Aningaasarsiaqarnikkut atorfeqartitaanikkullu atugassarititat akissaateqarfiit 39-at aallaavigalugu isumaqatigiinniarnikkut piginnaasallu malillugit aalajangersarneqassapput.
Nuummi najugaqanngikkuit pigisat nuunnerinut aningaasartuutit Inatsisartut Allattoqarfiata malittarisassat atuuttut malillugit akilissavai. Inissaqartitsisoqarsinnaavoq malittarisassat atuuttut malillugit ineqarnermut akiliuteqarfiusartussamik.
Atorfik pillugu paasissutissat tatigeqatigiiffiusumik pisortamut Steen Lyngemut oqarasuaat +299 34 61 03 saaffiginnissuteqarluni pissarsiarineqarsinnaapput (Kalaallit Nunaanni nalunaaqutaq 09.00-ip kingorna saaffiginnittoqartassaaq). stlyn@ina.gl-imut qarasaasiakkut allalluni aamma paasiniaasoqarsinnaavoq.
Inatsisartut Allattoqarfiat ullumikkut 30-t missaannik sulisoqarpoq. Sulinermi atugassarititaasut allanngorartuarnerat suliffeqarfiup ilisarnaatigaa, Inatsisartut ukiumoortumik ataatsimiinneri marluk nalinginnaasumik unammilligassaqarfiunerpaajusarlutik. Paasissutissat sukumiinerusut www.inatsisartut.gl-imi atuarneqarsinnaapput.
Qinnuteqaat soraarummeersimanermut uppernarsaatinik suliffigisimasanullu takussutissiamik (C.V.) ilallugu allakkatigut e-mailikkulluunniit uunga nassiunneqassaaq:
Inatsisartut Allattoqarfiat
Postboks 1060
3900 Nuuk
atorfik@ina.alla.gl
Qinnuteqaatit Inatsisartut Allattoqarfiata kingusinnerpaamik ulloq 27. juli 2026 nunatta nalunaaqutaa malillugu nal. 12 tigoreersimassavaa. Allakkat qaavisigut ”Allatseqarfiup pisortaa”-nik nalunaaqutserneqarsimassapput.
