Fakta
Atorfiup suussusaa: Inatsisilerinermi sullissinermik suliaqartussaq
Suliffeqarfik: Inatsisartut ombudsmandiat
Qinnuteqarfissamut killigititaq: 9. augusti 2026
Attavissaq: +299 32 78 10
Inatsisilerituutut sullissinermik suliaqartussamik (fuldmægtigitut imaluunniit immikkut siunnersortitut) oktobarip aallaqqaataani 2026-mi isumaqatigiissuteqarnikkulluunniit atorfinittussamik pissarsiorpugut.
Sullissinermik suliaqartutut, ombudsmandip Namminersorlutik Oqartussat Nunatsinnilu kommunit inatsisiliornermik atuuttumik malinninneranik nakkutiginninnerani ikiussavat.
Tamanna isumaqarpoq, innuttaasut Nunarpullu tamakkerlugu oqartussaasut ulluinnarni annertuumik attaveqarfiginissaat naatsorsuutigissagit. Tamanna siunnersuinikkut, imaluunniit naammagittaalliutinik suliaqarnikkut pisarpoq.
Sulianik misissuinermi naammagittaalliutit, imaluunniit atugassarititaasut tusagassiuutini sammineqartut tunuliaqutaralugit, ombudsmandi siunnersornissaanut aamma periarfissaqarsinnaavutit.
Sullissinermik suliaqarnerit isornartorsiuisoqarneranik imaluunniit oqartussat aalajangiinerminnik suleriaatsimilluunniit nalilersueqqinnissaannik peqquneqarnerannik kinguneqarsinnaavoq.
Sullissinermik suliaqartutut suliavit pilersaarusiornissaanut periarfissaqarluassaatit, inatsisilerinermilu pisortaq suleqatigalugu suliamik ingerlatsinerup, aallaqqaataaniit naammassinissaata tungaanut suliarisassallugit.
Suleqatit qullersallu peqatigalugit paaqqinniffinnik kommuninilu misissuinerit aalajangersimasumik ingerlattassavasi. Taamaammat inatsisilerinermi sullissinermik suliaqartutut suliffimmut atatillugu angalangaatsiartarnissat naatsorsuutigisinnaavat.
Atorfimmut piginnaasassat
Qinnuteqartuusutit naatsorsuuteqarfigivatsigit:
· Inatsisilerinermi cand.jur.-itut ilinniarsimasuuvutit, atuagarsornikkut piginnaasaqarluarlutit, allattariarsornikkullu oqaaseqatigiiliullaqqissuullutit.
· Pisortat pillugit inatsiseqarnermik immikkut soqutigisaqartuuvutit ingerlatsinerlu pillugu inatsiseqarneq pullaviginerorusullugu.
· Inatsisilerinikkut ajornartorsiutinik pisariusunik assigiinngiiaartunillu paasinnillaqqissuuvutit
· Misigissutsinik paasinnissinnaassuseqarputit, innuttaasullu qanimut oqaloqatiginerani naapeqatiginnissinnaassuseqarlutit.
· Akisussaassuteqartuuvutit suleqatitillu suleqatigilluarsinnaavatit, taamatullu suliassatit namminersuullugit suliarisinnaallugit
· Attuumassutilimmik misilittagaqareerputit, soorlu assersuutigalugu qitiusumik allaffeqarfissuarmit, eqqartuussivinnit, kommuninit imaluunniit eqqartuussissuserisutut suliaqarfimmit. Ilinniakkaminnik naammasserlaat aamma ilaatinneqarsinnaapput.
Suliffeqarfik qanoq ittuua
Ombudsmandi Inatsisartunit qinerneqartarpoq, Namminersorlutillu Oqartussani kommuninilu pisortat ingerlatsiviini inatsisit atuuttut ingerlatsinermilu ileqqorissaarneq tunngavigalugit ingerlatsisoqarnera nakkutigisaralugu.
Aqutsisut ukuupput ombudsmandi, inatsisilerinermi pisortaq, oqalutsillu pisortaat. Taassuma saniatigut sullissinermik suliaqartut arfiniliupput, oqalutsi ataaseq allatsilu.
Suliffik pitsaasoq sulinermilu pitsaasumik avatangiiseqartoq, suliassallu tamarmiusut naammassiniarneranni ikioqatigiiffiusoq neqeroorutigaarput.
Ombudsmandeqarfik Herrnhut-it illuutaani Nuummiittumi inissisimavoq, Kalaallit Nunaannilu illuni nutaannginnersat ilaanniilluni. Illu eqqissisimatitami sinerissami isikkivigissumi inissisimavoq.
Pingaartumillu ilinniakkaminnik naammasserlaanut inatsisilerinikkut pitsaasumik, patajaatsumik tamatigoortumillu ilinniartitsinissaq neqeroorutigaarput, tamannalu inatsisilerituutut kingusinnerusukkut sulinermi qaffakkiartornissamut iluaqutigilluarsinnaassavat.
Piffissaq suliffiusoq sapaatit akunnerannut nalunaaquttap akunnerinik 40-nik sivisussuseqarpoq. Qaangiuttoorluni sulineq nalinginnaasuunngilaq. Piffissat suliartorfiusartut soraarfiusartullu nikerartinneqarsinnaapput pissutsillu allatigut aamma eqaatsuullutik.
Sulisunut inissiamik inissaqartitsivugut, malittarisassat atuuttut malillugit akilersorneqartussamik. Atorfinikkiartorlutit angalanerit pisattavillu assartornerat akilissavagut. Ukiut pingasut atorfeqartitaareerlutit soraaruit angalanermut pequtillu assartornerinut aningaasartuutinik akiliunneqassaatit.
Akissarsiat atorfinitsitsinermilu atugassarititaasut
Akissarsiat atorfinitsitsinermilu atugassarititaasut Inatsisartut Siulittaasoqarfiata DJØF-illu isumaqatigiissuteqarnerisigut aalajangersarneqartarput. Isumaqatigiissut tamanna Naalakkersuisut Akademikerillu (Akademikerit isumaqatigiissutaat) kattuffiisa akornanni isumaqatigiissutaat tunngavigalugu ilusilersugaavoq.
Tunngaviusumik akissarsiat tapillu Kalaallit Nunaanni qitiusumik allaffeqarfissuarmi fuldmægtigit akissarsiaannut naapertuupput.
Taakkua saniatigut ukiut qassit sulisimaneq tunngavigalugu soraarnerussutisiaqaataasussamik qaammammut 3.758,82 kr.-inik tapeqarpoq.
Piginnaasaqassuseq aallaavigalugu tapit isumaqatigiinniutigineqarnissaannut periarfissaqarportaaq. Naggataatigullu Akademikerit isumaqatigiissutaat malillugu attassiniarnermut tapiissutit, sulinngiffeqarnerlu pillugit inatsisit atuutsinneqartut ilaatinneqassapput.
Suliffimmit allamit sulinngiffeqarallarsinnaanermut periarfissaqarpoq
Naalagaaffimmi tjenestemandit AC-llu isumaqatigiissutaat arlallit tunngavigalugit atorfeqartitaasut Namminersorlutik Oqartussat ataanni atorfinitsinneqarnermut atatilugu akissarsiaqaratik sulinngiffeqarallarsinnaatitaapput. Sulinngiffeqarallarsinnaatitaaneq pillugu aalajangersakkani katisimaguit aapparisat inooqatigisallu pineqartunut aamma ilaatinneqarput.
Aamma eqqumaffigineqassaaq Namminersorlutik Oqartussat ataanni atorfinitsinneqarnermut atatillugu, sulinngiffeqarallarnissamik qinnuteqaatit akuersaarneqartarnissaat Qallunaat Nunaanni Indenrigsministeriaqarfiup kommuninut nunallu immikkoortuinut inassuteqaatigisimammagu.
Namminersorlutik Oqartussani kommunimiluunniit atorfeqaruit ukiut suliffigisimasavit amerlassusaannik katersat uatsinni atorfinitsinneqarninni pigiinnassavatit.
Qinnuteqaat
Qinnuteqaat CV-mik, bacheloritut kandidatitullu soraarummeernermut uppernarsaammik, matumani karakterit allattorsimaffii ilanngullugit, allagaatinillu allanik tamatumunnga tunngassuteqartunik ilaqartillugu nassiunneqassaaq e-mailikkut uunga job@ombudsmand.gl.
Qinnuteqaatit kingusinnerpaamik sapaammi 9. august 2026-mi tigoreersimassavarput. Qinnuteqartunik oqaloqatiginninnerit sapaatip akunnerani 33-mi pinissaat naatsorsuutigaarput. Oqaloqatiginninnerit aallaavittut nammineq takunnikkut ingerlanneqassapput, pissutsilli aallaavigalugit attaveqaatit atorlugit ingerlanneqarsinnaallutik. Oqaloqatigineqarnerit arlaliusinnaapput.
Atorfik, nalinginnaasumillu Kalaallit Nunaanni najugaqarneq pillugu paasissutissat, oqarasuaatikkut +299 32 78 10-mut sianerluni paasiniarneqarsinnaapput piffissami nal. 10-14, pingasunngornikkut saaffiginnittunut matoqqasarpugut (eqqaamallugu Qallunaat Nunaanniit sianeruit, Qallunaat Nunaat nalunaaquttap akunneri pingasunik nunatsinniit siulliummat). Saaffiginnissutit tamarmik soorunami mianerisamik suliarineqassapput.
Tusarfiginissat qilanaaraarput.
Ombudsmandip sulineranut suliassaanullu tunngatillugu nittartakkatsinni www.ombudsmand.gl annertunerusumik paasisarsinnaavutit.
