Ineqarnermut, Attaveqaasersuutinut, Isorliunerusunut Upalungaarsimanermullu Naalakkersuisoqarfimmi Upalungaarsimanermut Immikkoortortaqarfimmi pisortaq

Ineqarnermut, Attaveqaasersuutinut, Isorliunerusunut Upalungaarsimanermullu Naalakkersuisoqarfik Upalungaarsimanermut Immikkoortortaqarfimmi pisortassarsiorpoq.

Atorfik aqutsinermik, suliatigut piginnaaneqarfinnik annertuunik politikerinillu kiffartuussinermik ataatsimoortitsiffiusoq atorfiniffigerusuppiuk? Aamma atorfik upalungaarsimanermi oqartussaasuni ineriartortitsinermilu suliassanik paasisimaarinnilluarnissamik pisariaqartitsiffiusoq, attaveqarfinnik inerisaanissamut, suleqateqarnissamut soqutiginnittunillu akuutitsinissamut piginnaaneqarfinnik isumalimmik atuiffigisinnaasat kissaatigaajuk? Taamaappat immaqa illiuvoq, Upalungaarsimanermut Immikkoortortaqarfitsinni pisortariligassarput. 

Atorfik pillugu

Immikkoortortaqarfimmi pisortap Naalakkersuisoqarfimmi pisortaq qullersaraa, aammalu Naalakkersuisoqarfiup aqutsisoqatigiivinut ilaalluni. Ukiup nikinneraniit Upalungaarsimanermut Immikkoortortaqarfimmi atorfiit akuerisat arfinilinnik amerlassuseqalissapput, taakkunanngaanniillu pingasut maanna inuttaqareerput. Taakku saniatigut sulisut pingasut tikillugit atukkiunneqarnissaannut, taamaalillutillu immikkoortortaqarfimmi sulilernissaannut Inuiaqatigiit Isumannaassusiannut Upalungaarsimanermullu Ministereqarfik isumaqatigiissutigineqarpoq.

Kommunit, innuttaasut, suliffeqarfiit, soqutigisaqaqatigiiffiit peqatigiiffiillu, danskit nunallu allat oqartussaasui, minnerunngitsumillu politikkimik suliallit qanillugit suleqatigilissavatit. Taakku saniatigut Naalakkersuisoqarfimmi pisortaaqatigiit Naalakkersuisoqarfiillu allat qanillugit suleqatigissavatit.

Suliassaqarfimmi siunnerfilersuineq, tulleriiaarineq suliassanillu ataqatigiissaarineq, aammalu suliat ingerlanneqarnerini pitsaassutsit suliallu siumut ingerlanerisa qaffasinnissaat akisussaaffigissavatit. Tamatuma peqatigisaanik sulisut suliatigut ineriartornerannut tapertaassaatit, aammalu nammineerluni suliassanik aaqqiinissamut, akisussaaffeqarnermut suleqateqarnermullu sinaakkutissanik pitsaasunik pilersitsissallutit.

Atorfik sulisunik aqutsiffiuvoq sulianillu aqutsiffiulluni, inatsisilerinermik, oqartussaasut suliassaannik, apeqqutinik aningaasaqarnermullu tunngasunik suliaqarfiuvoq, kiisalu politikkikkut - allaffissornikkut kiffartuussinermik qanittumik suliaqarfiulluni.

Akisussaaffeqarfissatit

Akisussaaffeqarfissatit ilaatigut tassaassapput:

• sulisunik aqutsineq sulisullu suliaannut aqutsineq, aammalu sulisut toqqissisimanissaannut, suliatigut ineriartornissaannut, akisussaaffeqarnerannut nammineersinnaanissaannullu sinaakkutissanik pitsaasunik qulakkeerineq

• immikkoortortaqarfiup oqartussaasutut ineriartortitsinermilu suliassaasa, suliniutaasa aammalu aalajangiinissamut tunngavissanik, inatsisinik, allakkianik aalajangiinernillu suliaqarneranut atatillugu allagaatit pitsaassusiinik sunniutissaannillu qulakkeerisarneq

• suliassaqarfimmut inatsisinik ineriartortitsineq, aqutsineq malinnaanerlu

• Namminersorlutik Oqartussat upalungaarsimanermut pilersaarutaannik ataqatigiissaarinermut akisussaaneq

• upalungaarsimanermut ataatsimiititaliarsuarmut allattoqarfittut suliassanik isumaginninneq, tassunga ilanngullugu upalungaarsimanermut ataatsimiititaliarsuup siulittaasuata peqannginnerani taartaasarneq 

• aaqqissuussaaneq akimorlugu aamma avataani sullissisut akornanni ataqatigiissaakkamik pitsaasumillu attaveqaqatigiinnissamik, suleqatigiinnissamik soqutigisaqartullu akuutinneqarnissaannik qulakkeerineq

• Naalakkersuisumut Naalakkersuisoqarfiullu aqutsisuinut siunnersuisarneq aamma politikkikkut – allaffissornikkut kiffartuussineq

• suliassaqarfiup iluani aningaasanut inatsisinut tapiliussineq, missingersuutinut malinnaaneq aningaasaqarnikkullu tulleriiaarineq

• ulluinnarni ataatsikkut amerlasuunik assigiinngiiaartunillu suliaqarfiusuni suliassanik siunnerfiliisinnaaneq, tulleriiaarisinnaaneq qulakkeerisinnaanerlu

• suleqatikkuminartuuneq aammalu oqartussaasut aaqqissuussaanerillu akimorlugit attaveqarfissanik inerisaasinnaassuseqarneq

• sulianik ilisimaarinnissinnaaneq siumullu ingerlanissamik qulakkeerisinnaaneq, aammattaaq piffissaliussat sivikikkaluarpata politikkikkullu annertuumik eqqumaffigineqaraluarpata.

Ilinnut tunngasut

Ilinniagaq: Attuumassutilimmik ingerlaqqiffiusumik ilinniagaqarputit, ukiunilu arlalinni pisortat namminersortulluunniit suliassaqarfianniit aqutsinermik misilittagaqarlutit.

Aqutsinermik misilittagaqarneq: Aqutsinermik misilittagaqarluarputit, aammalu sullivimmi avatangiisinik pitsaasunik pilersitsiffiusunillu pilersitsinissamut piginnaaneqarputit, tamatumalu peqatigisaanik ulluinnarni ulapaarfiusuni uummaarissunilu suliat paasisimaarinissaat piginnaaneqarfigaat.

Sulianik ilisimasaqarneq: Upalungaarsimanermi suliassaqarfik misilittagaqarfigilluarpat paasisimaarinniffigalugulu, aammalu suliassat suliassaqarfinnut akimuiffiusut pisariusut suliarinissaat misilittagaqarfigaat.

Attaveqaqateqarneq: Allakkatigut oqaluinnarlunilu attaveqaqateqarnerit piginnaaneqarfigilluarpatit, aammalu sammisat pisariusut politikkikkut aalajangiisartunut suliassanilu suleqatinut ersarissumik eqqortumillu oqaasiliornissaat piginnaaneqarfigaat.

Suleqateqarneq: Ammasumik pissuseqarputit, suleqateqarnissat siunnerfigisarpat, aammalu aaqqissuussaanerit qaffasissutsillu akimorlugit attaveqaqateqarnernik pilersitsisinnaavutit.

Sunniisinnaassuseqarneq: Allanut pitsaasumik sunniisinnaaneq piginnaaneqarfigaat, taamaalillutillu attaveqaqateqarnerit iliuutsitillu aqqutigalugit inernerit, allannguutit tunniusimanerlu pilersissinnaavatit.

Kulturimik paasisimaarinninneq: Kalaallit Nunaanni pissutsinik ilisimasaqarneq aamma kalaallisut, danskisut tuluttullu oqaatsinut piginnaaneqarneq iluaqutaassapput.

Neqeroorutigaavut

Qitiusumik pisortatut atorfik, annertuumik akisussaaffeqarfiusoq, aammalu qitiusumik politikkikkut ineriartornermut, innuttaasunut inuiaqatigiinnullu annertuumik isumaqartumut sunniinissamut periarfissaqarfiusoq neqeroorutigaarput.

Politikkikkut aalajangiisarnerit qanillugit sulinissamut, aammalu upalungaarsimanermi suliassanik, oqartussaasut suliaannit aalajangersimasuniit inatsisiliornermut, periusissiornermut ineriartortitsinermullu tunngasunik suliaqarnissamut periarfissaqassaatit.

Suliat Naalakkersuisoqarfimmi suliassaqarfiit akimorlugu suliffeqarfimmi avatangiisini allanngorartumik suliaqarfiusuni, aalajangiinissamut naatsunik aqquteqarfiusuni aammalu qanittumik suleqatigiiffiusuni ingerlanneqarput.

Suliatigut, inuttut aqutsisutullu ineriartornissamut periarfissat pitsaasuupput.

Upalungaarsimanermut Immikkoortortaqarfik aaqqissuussaanermi Ineqarnermut, Attaveqaasersuutinut, Isorliunerusunut Upalungaarsimanermullu Naalakkersuisoqarfimmi inissisimavoq. Naalakkersuisoqarfik sisamanik immikkoortortaqarfeqarpoq, Upalungaarsimanermullu Immikkoortortaqarfiup saniatigut Pisortat Allattoqarfiat, Sanaartornermut Immikkoortortaqarfik aamma Attaveqaasersuutinut Immikkoortortaqarfik tassaniipput. Naalakkersuisoqarfimmi atorfillit 50-it missaanniipput. 

Aningaasarsiatigut atorfinitsitaanermilu atugassarititaasut

Atorfik akissaateqarfimmi LR 38-mi maanna inissisimavoq. 1. april 2026 LR 38-mi tunngaviusumik akissarsiaq tapillu aalajangersimasut soraarnerusutissianullu illuartittagaq ilanngullu anertussuseqarput qaammammut Kr. 64.048 ukiumullu Kr. 768.576.

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput. 

1. novembari 2026-mi imaluunniit isumaqatigiissuteqarnikkut atorfinitsitsisoqassaaq.

Isumannaallisaanermi akuerineqarneq

Atorfininnissamut isumannaallisaanermi akuersissummik, “Isertortoq”-mut inissisimasumik pissarsisinnaanissat, aammalu isumannaallisaanermut akuersissutip piffissami atorfeqarfiusumi tamarmiusumi atuutiinnarsinnaanissaa pisariaqartinneqarpoq.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqarnissamut killigititaasoq

Apeqqutissaqaruit Naalakkersuisoqarfimmi pisortaaneq Ruth Lindhardt rli@nanoq.gl aqqutigalugu attaveqarfigisinnaavat.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut kingusinnerpaamik 28. septembari 2026-mi, "qinnuteqaat nassiuguk" toorlugu nassiutikkit. E-mail-ikkut qinnuteqaatinik tigusineq ajorpugut.