Issittumi Inuiaqatigiilerinermik Aningaasaqarnermillu Ilisimatusarnermut Immikkoortortamut Inuiaqatigiilerinermik ilisimatusarnermi Lektori Adjunktiluunniit

Ilisimatusarfimmi Issittumi Inuiaqatigiilerinermik Aningaasaqarnermillu Ilisimatusarnermut Immikkoortortaq

inuiaqatigiilerinermik ilisimatusarnermi lektorissarsiorpoq imaluunniit adjunktissarsiorpoq.

Atorfiup 2024-mi aggustip aallaqqaataani imaluunniit isumaqatigiissuteqarnikkut inuttalerneqarnissaa kissaatigineqarpoq.

Issittumi Inuiaqatigiilerinermik Aningaasaqarnermillu Ilisimatusarnermut Immikkoortortaq ilisimatuutut misissuinermi aamma ilinniartunut assigiinngisitaartumik avatangiiseqartitsivoq 100-t missaannik ilinniartulik, 8-nik piffissaq tamakkerlugu sulisulik arlalinnillu ph.d.-nngorniartulik kiisalu ilisimatusartut allameersut. Immikkoortortap bacheloritut ilinniakkat marluk neqeroorutigai tassaasut inuussutissarsiornermi aningaasaqarnermut ilisimatusarneq aamma Issittumi inuiaqatigiilerinermik ilisimatusarneq, inuiaqatigiilerinermillu ilisimatusarnermi kandidatitut ilinniagaq aamma neqeroorutigalugu. Immikkoortortami ilinniakkani ilisimatusarnermilu qitiutinneqartut tassaapput Kalaallit Nunaat aamma Issittoq.

Ilisimatusarfimmi ilinniartitsinerit kalaallisut, qallunaatut tuluttullu ingerlanneqarsinnaapput.

Immikkoortortaq Inuiaqatigiilerinermik, Aningaasaqarnermik Tusagassiornermillu Ilisimatusarfiup ataani inissisimavoq pingasunillu allanik taanna aamma immikkoortortaqarpoq:

• Isumaginninnermik Suliaqarnermi Immikkoortortaq

• Tusagassiornermut Immikkoortortaq

• Inatsisilerinermut Immikkoortortaq

Piginnaassusissanik piumasaqaatit

• Ph.d.-tut qaffasissusilimmik ilisimatusarfimmi naleqquttumik ilinniagaqarsimaneq.

• Adjunktitut lektoritulluunniit qaffasissusilimmik ilisimatusarnermik, ilinniartitsinermik aamma paasissutissiortarnermik piginnaasaqarneq.

• Kalaallit Nunaanni Issittumilu inuiaqatigiilerinermik ilisimatusarnermut tunngasunik ullumikkut ajornartorsiutinik ilisimasaqarnissaq kiisalu nunatsinni pisortat ingerlatsinerannik paasisimasaqarneq iluaqutaassaaq - tamannali sukannersumik piumasaqaataanngilaq.

• Ilinniartitsissutaasinnaasumik ilisimatusartitsisinnaasumillu kalaallisut oqaatsinik qaffasissumik atuisinnaaneq, kiisalu qallunaatut tuluttullu oqaatsinik piginnaasaqarneq.

Suliassat

Akisussaaffeqarfissatit pingaarnerit tassaassapput suliassaqarfinni assigiinngitsuni fagini, inuiaqatigiilerinermik ilisimatusarneq aningaasaqarnerlu qitiutillugit, ilinniartitsineq. Aalajangersimasumik:

• Inuiaqatigiilerinermik ilisimatusarnerup aamma periutsip iluanni fagini ilinniartitsinerit, tamassumunnga ilanngullugit sammisani pisortat ingerlatsinerannut aamma nunatsinni politikkimut aningaasaqarnermullu tunngasuni. Inooqatigiinnik ilisimatusarnermut suliassaqarfiup iluani faginut aamma tapersiisinnaavutit.

• Ilinniartunik bachelorinngornianik, kandidatinngornianik ph.d.-nngornianillu ilitsersuineq soraarummeersitsisarnerlu.

• Ilisimatusaatini assigiinngitsuni ilisimatuutut misissuineq aamma Issittoq qitiutillugu inuiaqatigiilerinermik ilisimatusarnermut aamma aningaasaqarnermut instituttip suliassaqarfiini saqqummersitsisarneq aamma ilisimatusarnikkut paasissutissiortarneq.

• Immikkoortortami instituttimilu atorfillit allat suleqatiginerisigut ilinniakkamik ineriartortitseqqiineq.

• Ilisimasanik inuiaqatigiinni avitseqateqarneq aamma tamanut ammasumik oqallinnerni peqataasarneq.

• Suliatigut nalilersuisarneq.

• Allaffissornikkut suleqatigiillu akornanni suleqatigiinnerni peqataaneq.

Issittumi Inuiaqatigiilerinermik Aningaasaqarnermillu Ilisimatusarnermut Immikkoortortami atorfinissaatit, immikkoortortaq taanna Inuiaqatigiilerinermik, Aningaasaqarnermik Tusagassiornermillu Ilisimatusarfiup ataaniippoq, Ilisimatusarfiulli instituttiini allani ilinniartitsisarnissat aamma pisariaqartinneqartarsinnaassaaq.

Adjunktitut imaluunniit lektoritut atorfinitsinneqarneq piginnaasat misilittakkallu aallaavigalugit pissaaq.

Qinnuteqaat

Inuussutissarsiornermi aningaasaqarnermut ilisimatusarnermi lektoritut adjunktitulluunniit atorfininnissamut qinnuteqaat, allaganngorlugu qinnuteqaatip saniatigut, ukuninnga imaqassaaq:

Ilanngussaq 1: Curriculum Vitae

Ilanngussaq 2: Soraarummeersimanernut uppernarsaatit.

Ilanngussaq 3: Oqaaseqaatinik aallerfiusinnaasut inuit pingasut attaviginissaannut paasissutissat.

Ilanngussaq 4: Tamakkiisumik normulersukkamillu saqqummersissimasat allattorsimaffiat.

Suliarisimasat nassiunneqartut (Ilanngussaq 8 naleqq.) saqqummersissimasat allattorsimaffianni *-mik nalunaarsorneqassapput.

Ilanngussaq 5: Maannamut ilisimatusaatigisimasat naatsumik allaaserineri kiisalu siunissami ilisimatusaatiginiakkap(-kat) takussutissartaat.

Ilanngussaq 6: Teaching portfolio ilinniartitsinermik piginnaasanik ilisimatusarfimmi pædagogikum-imik assigisaanilluunniit sammisaqarsimanermik takussutissartalik, kiisalu siusinnerusukkut siunissamilu ilinniartitsinermik eqqarsaatersuutinik takussutissiaq.

Ilanngussaq 7: Ilisimatusaatinik siammarterinermut takussutissiaq.

Ilanngussaq 8: Saqqummersissimasat kapitalitut allaatigisatulluunniit takissusillit tallimat tikillugit amerlassusillit. Nalilersorneqarnissamut immikkut attuumassutilinnik qinnuteqartoq saqqummersissimasaminik amerlanerpaanik tallimanik toqqaasinnaavoq.

Attavigisassat/ilisimatitsissutit:

Atorfik pillugu sukumiinerusunik paasisaqarusukkuit, tikilluaqquneqarputit Issittumi Inuiaqatigiilerinermik Aningaasaqarnermillu Ilisimatusarnermut Immikkoortortap pisortaa Javier Arnaut uunga +299 385626 sianerlutit attavigisinnaavat imaluunniit instituttip pisortaa Annemette Nyborg Lauritsen oqarasuaammut uunga +299 385660.

Ilisimatusarfik pillugu annertunerusumik paasisaqarusukkuit paasissutissat allat atuarsinnaavatit uunga iserlutit www.uni.gl 

Naliliisarneq atorfinitsitsisarnerlu.

Qinnuteqartut nalilerneqarnerat malittarisassat atuuttut naapertorlugit naliliisartunit ilisimasalinnit ingerlanneqartarpoq. Qinnuteqartut piffissap qinnuteqarfiusup naareernerani naliliisartut inuttalersornerinik ilisimatinneqassapput. Qinnuteqaatit takkussuuttut naliliisartoqatigiinnit misissorneqassapput, tamanna pereerpat taakkua Instituttimi aqutsisumut innersuusiussallutik.

• Adjunktitut atorfeqartitaaneq nalinginnaasumik ukiunik 4-nik sivisussuseqarpoq, tamatumalu kingorna suli ukiut marluk angullugit sivitsorneqarsinnaalluni. Tamatuma kingorna lektorip naliliinera tunngavigalugu lektoritut atorfittut aalajangersimasunngorlugu atorfinitsinneqarsinnaavoq.

• Lektoritut atorfinitsitaaneq pisinnaavoq atorfininnissaq sioqqullugu naliliilluartoqarpat imaluunniit qinnuteqartoq piffimmi allami sammisami lektorimit nalilerneqarsimappat. 

Ilisimatusarfik pillugu

Ilisimatusarfik 1987-imi pilersinneqarpoq. Maannakuugallartoq ilinniarneqarsinnaasut assigiinngitsut qulingiluaallutik taamatuttaaq Ilisimatusarfiup neqeroorutigai diplom-imut masterimullu saniatigut ilinniarnerit. Ilisimatusarfik issittumi universitetiuvoq nunarsuup ilaani pilertortumik ineriartorfiusumi nutaanik ilisimasaqalerfiusoq nutaaliorfiusorlu. Siulersuisut tassaapput Ilisimatusarfiup qullersai. Ulluinnarni aqutsineq rektorimit direktørimillu ingerlanneqarpoq. Instituttit sisamaasut Instituttini Siunnersuisoqatigiinnit siunnersorneqartumik siulersorneqarput.

Ilisimatusarfik sisamanik instituteqarpoq:

• Ilinniartitsinermik Ilisimatusarfik

• Inuiaqatigiilerinermik, Aningaasaqarnermik Tusagassiornermillu Ilisimatusarfik

• Kulturimik, Oqaatsinik Oqaluttuarisaanermillu Ilisimatusarfik

• Peqqissaanermik Pinngortitamillu Ilisimatusarfik

Allaffissornikkut aqutsisoqatigiiffik pillugu

Allaffissornikkut aqutsisoqatigiiffiup ilisimatusarfik tamakkerlugu sullitaraa. Ilisimatusarfiup direktørianit aqunneqarpoq. Allaffissornikkut aqutsisoqatigiiffik Ilinniarfissuarmi Ilimmarfimmilu immikkoortortaqarpoq. Immikkoortortat faginik ingerlatsiviusunik qanimut suleqateqartarput soorlu namminneq akunnerminni aamma taamaattartut. Allaffissornikkut aqutsisoqatigiiffimmi suliassat tassaapput: ilinniartut pillugit-, sulisut pillugit aqutsineq, Siulersuisuniik, Akademisk Rådimik kiisalu ilimmarfimmi sulisunik ilinniartunillu sullissineq. Allaffissornikkut aqutsisoqatigiiffiup Ilimmarfiup ilutaanik sanaartornermik nakkutiginninneq aamma ingerlataraa.

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.

E-mail-ikkut qinnuteqaatinik tigusineq ajorpugut.

Qinnuteqaat nassiuguk

Naalakkersuisut pillugu

Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job