Isumaginninnermut Aqutsisoqarfimmi pisortaq

Kalaallit Nunaanni isumaginninnermik suliaqarfik siunissami ilusilersueqataaffigerusuppiuk aamma aqutsisoqarfimmi Kalaallit Nunaanni meeqqat, inuusuttut ilaqutariit innuttaasullu ulluinnarni atugaannik pitsanngorsaanermi siuttoorusuppit?

Isumaginninnermut Aqutsisoqarfik inuiaqatigiit kalaallit atugarissaarnerisa ineriartortinneqarnerinut qitiusumik inissisimavoq. Aqutsisoqarfiup nunami tamarmi meeqqat, inuusuttut, ilaqutariit innuttaasullu immikkut pisariaqartitsisut suliniuteqarfigineqarneri ullut tamaasa nukittorsartarpai. Isumaginninnermut Aqutsisoqarfiup Naalakkersuisut isumaginninnermik suliaqarfiisa qeqqani inissisimasutut Meeqqanut, Inuusuttunut, Inatsisinik Atuutsitsinermut Naligiissitaanermullu Naalakkersuisoqarfik, kommunit suleqatigisartakkallu arlallit allat qanimut suleqatigalugit naalakkersuinikkut anguniakkat tigussaasunngorlugit aaqqiissutigineqarnissaat sulissutigisarpai. Aaqqiissutinik imminut akilersinnaasunik pilersitsinissaq anguniagaavoq, taamaalilluni Kalaallit Nunaanni tamarmi inuit suliniuteqarfigineqarneri nukittorsarneqassapput aamma innuttaasunut allannguinissamut tunngavilerneqartarput.

Naalakkersuisut Isumaginninnermut Aqutsiveqarfik aqutsiveqarfittut namminersortutut attatiinnarniarlugu aalajangiiffigaat. Tamatuma erseqqissarpaa aqutsiveqarfik isumaginninnermik suliaqarfittut qitiusumik inissisimasoq, aamma aqutsiveqarfiup, naalakkersuisoqarfiup kommunillu qanimut suleqatigiinnerannut pingaaruteqartuusoq. Illit aqutsiveqarfimmi pisortatut taamaattumik naalakkersuinermik suliallit anguniagaasa, isumaginninnikkut ilinniakkat pitsaassusaasa, Kalaallillu Nunaanni innuttaasunik ulluinnarni ataatsimeeqateqarnerit imminnut ataqatigiinnerinik pilersitsinissamut qitiusumik inissisimaffeqassaatit.

Isumaginninnermut Aqutsiveqarfiup kommunit, paaqqinniffiit Kalaallillu Nunaanni innuttaasut qanimut suleqatigisarmagit, illit kalaallit kulturiannik ilisimasaqarluarnissat, kalaallisut danskisullu allallutillu oqalussinnaanissat aamma nuna tamakkerlugu attaveqaatinik pilersitsisinnaanissat atorfimmi piumasaqaataapput. 

Akisussaaffeqarfiit

• Aqutsisoqarfimmi pisortap Isumaginninnermut Aqutsisoqarfimmi pisortaqatigiit sinneri suleqatigalugit Isumaginninnermut Aqutsisoqarfiup suliffeqarfittut aqunneqarnera akisussaaffigaa aamma Isumaginninnermut Aqutsisoqarfiup isumaginninnermik, peqqissutsimik siuarsaanermi pitsaaliuinermilu suliassaqarfinnik pisariaqartitat isumalluutillu oqimaaqatigiinnissaannik piviusunngortitsinissaq qulakkeerinninnissarlu suliassaralugit. Taamaammat suliassat pingaarnerit tassaassapput isumaginninnermi pitsaaliuinermilu kommuninik suleqateqarnerup inerisarnissaa patajaallisarnissaalu. Taakku saniatigut aqutsisoqarfimmi pisortaq kommuninik qanimut oqaloqatiginnittarnissamik qulakkeerinnittuussaaq, taamaalillunilu taakku suliaat ikorfartorneqassapput sapinngisamillu pitsaanerpaamik oqimaaqatigiissinneqassallutik. 

• Aqutsisoqarfimmi pisortap politikkip ingerlatsinermillu suliaqarnerup imminnut ataqatigiinnissaat akisussaaffigai. Aqutsisoqarfimmi pisortap pisortaqatigiit suleqatigalugit inatsisiliornermut politikkikkullu anguniakkat atuutilersinneqarnissaannut      suleqataassaaq aamma innuttaasunut inuiaqatigiinnullu angusaqartarnissamut ikorfartuisassaaq - anguniakkatut angusassatullu  aalajangikkat aningaasaliissutit iluini naammassineqarnissaat aalajangersartassallugit.

• Sammisassat, kiffartuussinissamik aamma pitsaassutsimik anguniakkat suliarineri malitseqartinnerilu kiisalu nuna tamakkerlugu katsorsaaanissamik neqeroorutit, ulloq unnuarlu paaqqinniffinni aamma ulloq unnuarlu paaqqinniffinnut neqeroorutit kiisalu qimarnguiit iliuusissatut pilersaarusiorneqarneri.

• Aqutsisoqarfimmi pisortap qulakkiissavai Isumaginninnermut Aqutsisoqarfiup periutsinik suleriaatsinillu, inuiaqatigiinni pisariaqartinneqartunik malinnaajuaannarniassammata, inerisaaneq, paasissutissiineq, nakkutiginninneq  nalilersuinerlu. Taakku saniatigut aqutsisoqarfimmi pisortap kommunit Isumaginninnermullu Aqutsisoqarfiup Naalakkersuisoqarfiullu akornanni attaveqaqatigiinnerup pingaartup qulakkeerneqarnera patajaallisarneqarneralu. 

Meeqqanut, Inuusuttunut Ilaqutariinnullu Naalakkersuisoqarfik nutaamik aqutsisoqarfimmut pisortassarsiorpoq 1. oktober 2026 imaluunniit piaarnerpaamik aallartittussamik. Illit aqutsisoqarfimmi pisortatut Isumaginninnermut Aqutsisoqarfimmi aqutsisunngussaatit qullerpaaq, taassumalu aaqqissuussaanera Meeqqanut, Inuusuttunut, Inatsisit atuutsinnerannut Naligiissitaanermullu Naalakkersuisoqarfiup ataani immikkoortortaavoq.

Illit pillutit

• Kalaallit Nunaanni isumaginninnermut tunngasunik ilisimasaqarluarputit aamma peqqissutsimik siuarsaanermi pitsaaliuinermilu peqqissuseq pillugu unammilligassanik ilisimasaqarluarlutit. Ilinniagartuutut naleqquttumik ilinniagaqarsimassasutit. Aqutsinermik aalajangiisarnernillu misilittagaqartutit.

Suleqatiginnillaqqillutit tusarnaarluarsinnaallutit. Nuna tamakkerlugu kommuninik assigiinngitsunik suleqateqarneq misilittagaqarfigaat. Oqaatsitigut attaveqartarnikkullu pitsaasumik piginnaasaqarputit. Aalajangerluarsinnaasutit naliliillaqqillutillu, taamaalillutit suleriaatsinik suliallu pingaarnersiornerinik isumannaatsumik aqutsilluarsinnaassaatit. 

Kalaallit oqaasiinik, kulturianik inuiaqatigiinnullu tunngasunik ilisimasaqarluartutit.

Uatsinnut pingaaruteqarpoq illit

• Aqutsisoqatigiinnik kajumissaarisinnaasutit  isumassarsisitsisinnaallutillu aamma pitsaasumik nutaaliorusussusermillu pilersitsisinnaasutit allallu anguniagassatut saqqummiussanik malinninnissaannut kajumissaarisinnaassallutit. Killiffik unammillersinnaassagit, taamaalillutit ingerlaavartumik ileqqoqalernissaq qulakkiissavat, ingerlaavartumimmi pitsanngorsaanissamut aamma "pitsaanerpaamik periuseqarnissamut" piareersimasoqartalissammat. Sulinerni uummaarissuusutit nukissaqarluarlutillu aamma suliassat siammasissut ataatsikkut suliarisinnaagitit. Minnerunngitsumik kingullertut naalakkersuinermik suliallit aaqqissuussaanerat illillu Isumaginninnermut Aqutsisoqarfimmi pisortaqatitit kiisalu aammaMeeqqanut, Inuusuttunut, Inatsisinik atuutsitsinermut Naligiissitaanermullu Naalakkersuisoqarfimmi pisortaqatigiit tunniusimaffigalugit tutsuiginartuullutit suleqataaffigisinnaagitit.

Isumaginninnermut Aqutsisoqarfik 

Isumaginninnermut Aqutsisoqarfik Meeqqanut, Inuusuttunut Ilaqutariinnullu Naalakkersuisoqarfiup ataaniippoq aamma tallimanik makkunannga immikkoortortaqarfeqarpoq: Paarisa, Ulloq Unnuarlu Inissitsiterinermullu Immikkoortoqarfik, Sullissisunik Siunnersuisarfimmi Immikkoortoqarfik, Aningaasaqarnermut Immikkoortoqarfik aamma Allattoqarfik. Immikkoortortaqarfiit qanimut suleqatigiittarput aamma suliffeqarfiuvoq suliatigut unammillernartorpassualik.

Isumaginninnermut Aqutsisoqarfiup pingaarnertut suliassai tassaapput

Isumaginninnermut Aqutsisoqarfik suliffiuvoq pissanganartoq, ulluinnarni ulapaarfiusumut attuumassuteqarluartoq, angusarusussuserlu qaffasissuulluni. Isumaginninnermut Aqutsisoqarfik peqqissutsimik siuarsaatit pitsaaliuinerillu pillugit naalakkersuinermik suliallit periusissiatut akuerisaasa atuutilersinneqarnerini peqataasarpoq. Aqutsisut ulluinnarni ingerlatsinerminni periusissiani anguniakkat atorlugit suliniutiginninnissaat anguniarlugu sulisarpugut. Naalakkersuinermik suliallit anguniagaannut innuttaasunullu iluaqutaasussanngorlugit suliassanik suliarinnittarnerput ataqqivarput.

Aqutsisoqarfiup pingaartitaasa ilagaat kommuninik suleqateqarneq. Isumaginninnermut Aqutsisoqarfiup peqqissutsimik siuarsaataasunik, pitsaaliuinermik, ineriartortitsinermik kiisalu isumaginninnermi suliassaqarfimmi siunnersuinermik suliat nukittorsarniarlugit kommuninik suleqateqarnini sulissutigisarpaa. Isumaginninnermut Aqutsisoqarfiup pingaartitaasa ilaat tassaavoq ulloq unnuarlu paaqqinniffinnik inerisaanerup nukittorsarneqarnera aamma innuttaasut innarluutillit atugassarisaannik pitsanngorsaaneq.

Isumaginninnermut Aqutsisoqarfik Meeqqanut, Inuusuttunut, Inatsisinik atuutsitsinermut Naligiissitaanermullu Naalakkersuisoqarfiup ataaniippoq. Aqutsisoqarfimmi pisortaata naalakkersuisoqarfiup pisortaa toqqaannartumik pisortaraa.

Soqutiginnippit?

Atorfik pillugu apeqqutissaqaruit Partner Dorthe Flies, Flies HR-imeersoq oqarasuaammut uunga: 583117 imaluunniit uunga: +45 4560833117 imaluunniit mailimut uunga dorthe@flieshr.dk attavigisinnaavat

Flies HR-ip sulisussarsiorneq isumagisassaraa, taamaammat saaffiginninnerit tamarmik tassunga ingerlateqquneqarput. Qinnuteqarfissaq kingulleq tassaavoq 22. september 2026 Atorfinitsitsinissamut oqaloqatigiinnerit sapaatit akunneri taassuma tulliini ingerlannissaat naatsorsuutigineqarpoq.

Allanik apeqqutissaqaruit Naalakkersuisoqarfimmi pisortamut Helena Lynge Møller helm@nanoq.gl -imut saaffiginnissinnaavutit.

Tusarfiginissat qilanaaraarput.

Akissarsiat atorfeqartitaanermilu atugassarititaasut:
Atorfik akissaateqarfimmi (LR 38-mi ) maanna inissisimavoq.

Aallaaviatigut isumaqatigiissutini atugassarititaasut naapertorlugit atorfinitsitsisoqassaaq, qinnuteqartoq tjenestemandi-tut atorfeqareersimaguni Nunatsinni pisortani tjenestemandit pillugit inatsisit malillugit tjenestemandinut atugassariti-taasut naapertorlugit atorfinitsinneqarsinnaavoq.

Atorfimmut atuuttoq tassaavoq, piffissap suliffiusussap qanoq sivisutiginissaa killilersugaanngimmat, aammalu qaangiuttoornermi ajunngitsorsiassat akilerneqarnissaat ullullu sulinngiffissat annaaneqartut ajunngitsorsiassarsissutiginissaat atorneqarsinnaanngillat.

Piffissap suliffiusussap sivisussusissaa aallaavittut sapaatip akunneranut nalunaaquttap akunnerinik 40-nik sivisussuseqarpoq.

Akissarsianut atorfeqartitaanermullu tunngasutigut piumasaqaatit, taakkununnga ilanngullugit atorfinikkiartorluni soraarlunilu angalanermut aamma pequtit nassiunneqarnerinut akiliunneqarsinnaatitaaneq, Namminersorlutik Oqartussat aamma pineqartup kattuffiata isumaqatigiinniarsinnaatitaasup akornanni isumaqatigiissutit piffissami atorfiniffiusumi atuuttut naapertorlugit pissapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.