Isumaginninnikkut pilersaarusiornermilu aqutsinermut tunngasunik ineriartortitsinissamut peqataarusuppit Kalaallit Nunaanni?
Kalaallit Nunaanni pilersaarusiorneq aamma nunaminertat aqunneqartarnerat pillugu allaffissornikkut aamma periutsit sinaakkutaannik nukittorsaaqataallutillu ineriartortitseqataarusuppit?
Kalaallit Nunaanni nunassittarneq aamma inuussutissarsiornerup aaqqissugaanera ineriartupiloorpoq, tamannalu sanaartorfissanik pilersaarusiornerup pitsaassusaanut kiisalu kommunit nunaminertanik aqutsineranni allaffissornikkut sinaakkutinut nutaanik piumasaqaatitaqarpoq. Taamaattumik Nuna tamakkerlugu pilersaarusiortarnermut immikkoortortaqarfiup Allaffianut AC-fuldmægtigimik imaluunniit immikkut siunnersortimik tunniusimasumik ujartuivugut, kommunini kiisalu Namminersorlutik Oqartussani siunnersuinermik, pitsaassutsimik qulakkeerinninnermik aamma nakkutilliinermik suliaqarnermik tunniussaqarsinnaasumik. Avatangiisini peqataatitsisuni, isumassarsiavit aamma misilittakkavit naleqartinneqarfianni sulerusukkuit, taava immaqa suliffik una ilinnut tulluarpoq.
Ilaatigut makku suliarisassavatit:
Kommunit pilersaarusiornerat aamma nunaminertanik aqutsinerat pillugu siunnersuineq, nakkutilliineq aamma pitsaassutsimik qulakkeerinninneq
Sanaartorfissanik pilersaarusiornermi aamma nunaminertanik aqutsinermi allaffissornikkut aamma digitalimik suleriaatsinik ineriartortitsineq nutarsaanerlu
Nuna tamakkerlugu pilersaarusiornermik (immikkoortuni pilersaarutit) aaqqissuussamik sulinermi ineriartortitsineq ingerlatitseqqiinerlu
Politikkikkut sullissineq kiisalu oqartussaasunik allanik siunnersuineq
Piginnaasassatut kissaatigisat
Illit ujartorpatsigit, illoqarfimmi pilersaarusiortutut, illussanik titartaasartutut, civilingeniøritut, nunalerisutut imaluunniit assigisaanik ingerlariaqqiffiusumik attuumassuteqartumik ilinniarsimasoq – ukiuni arlalialunni misilittagaqaruit iluaqutaassaaq. Piginnaasat tulliuttut pingaartippagut:
Pilersaarusiornermik suliaqarnermik aamma pikkorissaqqinnissamut annertuumik soqutigisaqarneq
Sanaartorfissanik pilersaarusiornermik misilittagaqarneq
Paasissutissanik aamma systeminik paasisimannilluarneq – GIS misilittagaqarfigigukku iluassaaq
Nunaminertanik aqutsineq aamma sulianik ingerlatsinermik ilisimasaqarneq
Kalaallit Nunaanni nunassittarneq aamma attaveqaqatigiinneq pillugit ilisimasaqarneq
Suliffimmi politikkikkut aqunneqartumi sulinermik paasinninneq
Allattariarsornikkut, oqaluttariarsornikkut immaqalu aamma grafiskimik attaveqatigiinnermut pikkoriffeqarneq
Marloqiusanik oqaaseqarneq (kalaallisut/qallunaatut), piumasaqaataanngilarli
Inuttut piginnaasat
Immikkut pingaartissavarput illit:
Atassuteqarnernik pitsaasunik pilersitsisinnaaguit kiisalu suliamik naammassinninniaanermi allanik suliaqartunik ilaatitsinermut paasisimannillutit
Suliniutinut aamma sulianut ataatsimut isiginnillutit suliaqarsinnaasutit
Politikkikkut suleriaatsimut mianerinnittuullutillu ataqqinnittuusutit
Aaqqissuussillaqqittutit kiisalu suleqatigiinnerup kajumissuseqalersittaraatit
Ulluinnaat ilaatigut ulapaarfiusaraluartut, eqqissisimasinnaasutit
Aalajangiisuussanngilaq suut tamaasa immikkut ilisimasaqarfigissagitit. Paaserusupparput, misilittakkat isiginnittaatsillu suut suleqatigiinnut tunniussinnaaneritit.
Uagut pilluta
Nuna tamakkerlugu pilersaarusiornermut Allaffik Aningaasaqarnermut Akileraartarnermullu Naalakkersuisoqarfiup ataani Inatsisilerinermut aamma Nuna tamakkerlugu pilersaarusiornermut immikkoortup ataaniippoq. Pilersaarusiorneq aamma nunaminertat atorneqartarnera pillugu Inatsisartut inatsisaat malillugu Namminersorlutik Oqartussat suliassai suliarisarpagut. Mannakkorpiaq sulisut marluuvugut, naatsorsuutigaarpulli inuit 4-5-inngussalluta.
Allaffik siammasissunik suliassaqarpoq, sanaartorfissanik (nuna tamakkerlugu) pilersaarusiornermik aamma immikkoortut aamma kommunit akornanni ataqatigiissaarinermik, pingaarnertut piujuartitsilluni ineriartortitsinermik aamma FN-ip nunarsuarmi anguniagai 17-it aamma nunaminertanik suliassaqarfimmi tunngaviusumik paasissutissanik akisussaaffeqarnermik kiisalu pilersaarusiorneq aamma geodata pillugit digitalimik ingerlatitseqqiinermik ilaatigut imaqartunik.
Immikkoortortaqarfimmi suliatigut nukittuumik inissisimavugut kiisalu suleqatigiilluarluta. Suliatigut assigiinngissutsit ataqatigiinnerat sulinitsinni qaffasissumik pitsaassutsimik qulakkeerinniffiuvoq, naalakkersuisoqarfiit allat suleqatigalugit kiisalu kommunit soqutigisallillu avataaneersut qanimut attaveqatigalugit naammassinniffiusarpoq.
Akissarsiat aamma atorfeqarnermi atugassarititat
Sapaatip akunneranut 40 tiimit sulineq ingerlasarpoq.
Piffissami atorfininnermi Namminersorlutik Oqartussat aamma peqatigiiffiup isumaqatiginninniartussap akornanni isumaqatigiissut atuuttoq naapertorlugu akissarsiat aamma atorfininnermi atugassarititat atuutissapput.
Atorfik aallaavittut AC-fuldmægtigimut naatsorsuussaavoq. Qinnuteqartorli isumaqatigiissut atuuttoq naapertorlugu naammaginartumik attuumassutilimmik minnerpaamik ukiuni 3-ni misilittagaqarpat kiisalu suliatigut piginnaasaqarpat, atorfininneq immikkut siunnersortitut pisinnaavoq.
Naalakkersuisoqarfiup naligiissitaanerup siuarsarnissaa kissaatigaa, suiaassuseq, sumiuussuseq, upperisaq imaluunniit innarluuteqarneq apeqqutaatinnagit. Ilanngullugu inuunermi misilittakkat aamma inuttut inerisimassuseq iluaqutitut isigaagut.
Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.
Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq
Paasissutissat annertunerusut
Atorfik pillugu paasisaqarnerorusukkuit, Jonas Clemens oqarasuaat +299 260337 imaluunniit mail jokc@nanoq.gl imaluunniit Morten W. Selvejer oqarasuaat +299 346528 imaluunniit mail mws@nanoq.gl attaviginissaanut tikilluaqqusaavutit.
Qinnuteqarfissaq kingulleq aamma atorfininnissaq
Qinnuteqarfissaq kingulleq tassaavoq ulloq 18. juni 2024. Atorfininnissamut oqaloqatiginninnerit qinnuteqarfissap kingulliup naanerani erngertumik aallartinneqassapput.
Atorfininneq pissaaq ulloq 1. september 2024 imaluunniit isumaqatigiissuteqarnikkut.
Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.
Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.
Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.
Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job