IT-supporteri Akileraartarnermut Aqutsisoqarfimmi

IT-supporteri Kalaallit Nunaanni Akileraartarnermut Aqutsisoqarfimmi

IT-supportimik sulinissaq soqutigaajuk, suliniaqatigiiffimmi attuumassuteqarfigisai amerlasuut aamma inuiaqatigiinnut akisussaaffik annertooq? Taava maanna periarfissaqarputit Kalaallit Nunaanni Akileraartarnermut Aqutsisoqarfimmi IT-supporteritut (1st line) sulilernissamut, Nuummi qullersaqarfimmi aallaaveqarlutit.

Akileraartarnermut Aqutsisoqarfimmi sulisutut ingerlatsinermut, sullissinermut supportimullu tunngasunik suliassanik pissanganartunik assigiinngitsorpassuarnik isumaginnittussaavutit. Suliassatit tassaassapput suleqatinnut assigiinngitsunik qaffasissuseqartunut tapersersuineq, ilaatigut oqarasuaatikkut supporti, inuttut ilitsersuineq, “hands on”-imik suliat kiisalu pilersuisunik isumaginninneq.

Allattoqarfimmi inissisimassaatit, allattoqarfimmi pisortaq qaninnertut pisortaralugu, digitalisering aamma data-mut immikkoortortaqarfik qanimut suleqatigissallugu. Suliffeqarfimmi ilinniartitaanikkut inuttullu ineriartornissamut periarfissat pitsaasuupput, aammalu ingerlaavartumik suliatigut unammilligassanik pissarsisassaatit.

Akileraartarnermut Aqutsisoqarfik suleqatigiiffiuvoq unamminartoqartartoq, attaveqarfigisai amerlallutik. Taamaattumik programm-it arlalippassuit assigiinngitsorpassuarnik ataqatigiipput. Pingaaruteqarpoq suliassat assigiinngitsut ataatsikkut ingerlatissinnaassagitit, suliassatit pingaarnersiorlugit aaqqissuussinnaagitit aammalu suliassatit pillugit tamakkiisumik takunnissinnaassuseqarlutit.

Misilittakkatit ilinniakkakkullu tunuliaqutavit pingaaruteqangaarnatik, pingaarnerpaavorli IT-systeminik paasinninnissamut kajumissuseqarlutillu piginnaasaqarnissat.

Atorfik pillugu

• Suliffiusussat piareersarnissaat, aaqqissuunnissaat ikkussuunneqarnissaallu 

• Hardware-imik, attaveqaatinik kiisalu AV-mi atortorissaarutit aaqitassanik ujartuinerit

• Atuisunik systeminut nutaanut ilinniartitsineq 

• Atortorissaarutigut itinerusunik tunngasunik suliassanik isumaginninneq, ilaatigut pilersuisunik isumaginninneq aamma systeminut akuersissutinik nutarterineq  

• Ilisimasanik avitseqatigiinneq suleqatillu allat peqatigalugit ataqatigiissaarineq 

• Suliassanut assigiinngitsunut piareersimanissaq 

• Immikkoortortaqarfiit allat sullissivigalugit ilinniartitsivigalugillu angalanissaq pisariaqarsinnaavoq 

Inuttut piginnaasat

Pingaaruteqarpoq sullissinermik pingaartitsisuunissat, suliassat tigussaasut nuannarisinnaagitit aammalu tunniiusimallutit atuisunullu pinasuartumik atortorissaarutitigut  tunniussinissamut kajumissuseqarnissat.

Suliassatit nammineq aallartitsiffigisinnaassavatit akisussaaffigalugillu, aammalu aaqqiissutissanut sammititamik suleriaaseqassaatit.

Aaqqissuussaasumik namminerisamik sulisinnaassaatit, ulluinnarnilu sulinerpit pilersaarusiorneranut, malitseqartitsinermut uppernarsaatinillu suliaqarnermut piginnaasaqassaatit. 

Suleqatigiinnut sammititaasumik sulisinnaassaatit, aammalu immikkoortortat akimorlugit suleqatigiilluarsinnaassallutit. 

Sulianut pimoorussisuussaatit aammalu ineriartornissamut kajumissuseqarlutit. Piumassuseqarlutillu piginnaasaqassaatit, pisariaqartissavat atortorissaarutinut assigiinngitsunut nutaanut kajumissuseqarnissat. 
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.
Qinnuteqartoq uppernarsaatitalinnik piginnaasalik immikkut siunnersortitut, siunnersortit pisortaatut siunnersortaanertulluunniit isumaqatigiissutit naapertorlugit atorfinitsinneqarsinnaasarpoq.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.