Kalaallit Nunaanni attaveqaasersuutinut taperseerusuppit? Ineqarnermut Attaveqaasersuutinullu Naalakkersuisoqarfik AC-fuldmægtigimik imaluunniit immikkut siunnersortimik pissarsiorpoq

Ineqarnermut Attaveqaasersuutinullu Naalakkersuisoqarfik AC-fuldmægtigissarsiorpoq

Nunarsuatsinni qeqertat annersaanni innuttaasunut allanngueqataallutillu attaveqaasersuutinut tunngatillugu suliatsinnut taperseerusuppit?

Tamat isiginnissuseqarlutit, isumassarsiallu timitalersinnaallugit ulluinnarni ulapaarfiusumi sulisinnaassuseqarpit? Taamaassimappat immaqa illit atorfissaqartippatsigit. Attaveqaasersuutinut Immikkoortortaqarfimmi suliat siammasimmata, suliassanik amerlasuunik ataatsikkut ingerlatsisinnaasunik Imarsiornermut immikkoortortatsinnut pikkorissumik sulisussarsiorpugut.

Atorfik

Atorfik AC-fuldmægtigitut atorfiniffiusussaq pineqarpoq. Piukkunnaatilik naleqquttumik piginnaasalik, naammaginartumillu misilittagalik nalililersuinikkut Immikkut Siunnersortitut atorfinitsinneqarnissamik neqeroorfigineqarsinnaavoq.

Umiarsualiveqarnermut assigiinngitsunik ilisimasalik

Kalaallit Nunaanni pissutsit immikkuullarissut eqqarsaatigineqarlutik, Kalaallit Nunaanni inatsisit aaqqissuunneqarnissaat pillugu Attaveqaasersuutinut Immikkoortortaqarfik Naalagaaffeqatigiinnermi oqartussaasunik attuumassuteqartunik qanimut suleqateqarpoq. Taassumap kingunerisaanik inatsisit, politikki, najukkamilu pissutsit atuuttut akornanni suliassaqarfiit suliaqarfiusarput.

Ajornartorsiutit unamminartut assersuutigalugu avataani soqutigisaqaqatigiinnut imaluunniit politikerinut ersarissumik paasissutissiarineqassallutik, suliat politikkikkut annertuumik eqqumaffigineqarput.

Umiarsualivinnut suliassaqarfimmi Umiarsualivinnut qitiusumik oqartussaanerup isumaginissaa suliassaavoq, imaappoq umiarsualiviit pillugit inatsit naapertorlugu ingerlatsineq kiisalu najukkami soqutigisaqaqatigiinnik soorlu assersuutigalugu umiarsualivinni oqartussanik, inuussutissarsiutilinnillu isumaginninneq. Nunat assigiinngitsut akornanni suleqateqarnermi nunani allani oqartussat, soqutigisaqaqatigiit il.il. suleqatigineqarput. Namminersorlutik Oqartussat umiarsualiviutai pillugit Iluarsartuussinermut Aqutsisoqarfik umiarsualivinnut suliassaqarfimmi qanimut aamma suleqatigineqarpoq. Umiarsualiviit, talittarfiillu sannai pillugit teknikkimut tunngasut aamma suliassaasarput.

Suliassat assigiinngitsorujussuupput, uanilu Umiarsualivinnut suliassaqarfimmi suliassat Imarsiornermut immikkoortortami allaffimmi pisortaq suleqatigalugu ataavartumik aaqqissuunneqassallutik.

Suliassat

Atorfinni taakkunani marluusuni akisussaaffigisat iluini tulliuttut suliassaapput:

• Suliniutinik aqutsineq
• Politikkiliornerit
• Nutaanik inatsisiliornerit
• Politikerinut sullissineq
• Soqutigisaqaqatigiinnik, suleqatigisanillu ataatsimeeqateqarneq, suleqatigiissitallu ataatsimiinnerini peqataaneq
• Innuttaasut saaffiginnissutaannik akissuteqarneq
• Tusarniutinut akissuteqaasiornerit
• Unammillernartut, suliassallu suussusersineqarneri
• Allaffimmi suliassat suliarineqartarnerinik pitsaanerulersitsineq
• Misissueqqissaarnernik, allakkianik, aaqqiissutissatullu siunnersuutinik suliaqarneq

Ilinnit naatsorsuutigisagut

Pingaartipparput:

• Ilinniarnertuutut ilinniagaqartutit
• Teknikkikkut inatsisitigullu ajornartorsiutit suliarisinnaagitit
• Ilisimasat, ajornartorsiutaasullu paasiuminartumik ingerlateqqissinnaagitit
• Tulleriiaarillutit sulisinnaassasutit, aaqqissuussillaqqissuusutillu
• Suliassaqarfik pillugu Danmarkimi Kalaallit Nunaannilu politikkit inatsisillu paasisimasaqarfigigitit
• Ajornartorsiutaasut misissorsinnaagitit, aaqqiissutissarsioqataasinnaasutillu
• Immikkoortortaqarfimmi suleqatinik kiisalu Kalaallit Nunaanni Danmarkimilu suleqatigisanik suleqateqarsinnaasutit
• Immikkoortortaqarfimmi suleqatit qaqugukkut isummersussanerlugit ilisimaaralugu, suliassat namminersuutigisinnaagitit
• Aaqqissuussaanermi politikkikkut aqutami sulisinnaasutit
• Suliat assigiinngitsut ataatsikkut suliarisinnaagitit, qaninnertullu pisortarisat peqatigalugu ataavartumik pingaarnersiuisinnaasutit

Inuiaqatigiit kalaallit, oqaasii, kulturiallu ilisimasaqarfigigukkit iluassaqaaq, piumasaqaataanngilarli.

Politikkikkut aqutami sulinermik misilittagaqaruit soorunalimi iluassaqaaq, piumasaqaataanngilarli. Ilinniakkannik naammassinnerlaaguit suliatigut tapersersorusuppatsigit, ilinniartikkusullutillu. Taamaakkaluartoq Kalaallit Nunaanni inuiaqatigiinnut soqutiginnissasutit, aaqqissuussamilu politikikkut aqutami sulinermik ilisimasaqarnerulernissannik soqutiginnissasutit naatsorsuutigaarput.

Siuliani allassimasut saniatigut naatsorsuutigaarput ileqqorissaartuusutit, pingaartorsiortuunngitsutit, sulinerullu nalaani nuannisaqataasinnaassasutit.

Uagut pillugit

Attaveqaasersuutinut immikkoortortaqarfimmi sulisut, allaffinnut marluusunut agguataagaallutik aqqaniliupput. Silaannakkut angallannerup, mittarfiit, imarsiornerup, umiarsualiviit, angallannerup, allakkat nalunaarasuartaatitigullu attaveqaatit iluini pilersaarusiornerit, ataqatigiissaarinerit, suliassallu assigiinngitsut immikkoortortaqarfimmi suliarineqartarput. Naalakkersuisoqarfimmi sulinitsigut politikerit aalajangiinissaanni tunngaviusariaqartut qulakkeertussaavagut, soorluttaaq politikerit kissaataasa piviusunngortinneqarnissaat qulakkiigassarigipput.

Suliat qaffasissumik qaffasissuseqarlutik, tulluusimaarutigisinnaasatsinnillu angusaqarfiulluartarluni sulinerup nuannersua, akisussaaffiillu ingiaqatigiissillugit sulineq ulapaarfiuvoq. Ulluinnarni ulapaarfiukkajuttartumi sulisut qiimasuupput. Suliffeqarfiuvugut inissaqartitsilluartoq, suleqatigiit ataatsimoorluartuuvugut, aammalu sulinerup ilaqutariittullu inuunerup ataqatigiinnissaannut ataqqinnittuulluta.

Naalakkersuisoqarfimmi atorfilinnut ukiumut arlaleriarluni aaqqissuussaqartarpoq. Nuniannissamut, assaannarnik eqalunnissamut imaluunniit pinngortitami kusanarluinnartumi eqqissisimaarnissamut periarfissaqarluni, ilaatigut ukiumoortumik Nuup Kangerluanut angalaqatigiittarput.

Pinerluuteqarsimannginnermut uppernarsaat

Atorfimmi atorfinissinnaassaguit malittarisassat naapertorlugit pinerluuteqarsimannginnermut uppernarsaateqartariaqarputit. Taamaattumik pinerluuteqarsimasunik nalunaarsuiffimmit pinerluuteqarsimannginnermut uppernarsaammik aallaqqaammut tunniussissaatit. Taanna najukkami politeeqarfimmi imaluunniit www.politi.gl/bestil-straffeattest/privat-straffeattest-imi pissarsiarineqarsinnaavoq.

Aningaasarsiatigut atorfinitsitaanermilu atugassarititaasut

Aningaasarsiatigut atorfinitsitaanermilu atugassarititaasut, matumani atorfininnermi suliunnaarnermilu angalasinnaatitaanerit pequtillu assartorneqarsinnaatitaanerat, atorfininnermi Namminersorlutik Oqartussat kattuffiullu isumaqatiginninniarsinnaatitaasup attuumassuteqarfigisap akornanni isumaqatigiissutaasut naapertorlugit inissinneqassapput.

Ineqarneq

Atorfinnut atatillugu ininik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Ulloq atorfiniffissaq

2024-mi aggustip aallaqqaataani, isumaqatigiissuteqarnikkulluunniit.

Piffissaq suliffiusussaq

Sapaatip akunneranut akunnerit 40-t.

Atorfinitsitsinissamut atatillugu ulloq oqaloqatiginniffissaq

Oqaloqatiginninnerit ataavartumik ingerlanneqassapput.

Soqutiginnippit?

Atorfinnut tunngatillugu apeqqutissaqaruit, allaffimmi pisortaq Anders May oqarasuaammut +299 34 52 63-imut imaluunniit mailimut amay@nanoq.gl-imut attavigisinnaavat.

Qinnuteqaatit, CV, ilinniarsimasanut pikkorissaatigisimasanullu uppernarsaatit, pinerluuteqarsimannginnermut uppernarsaat kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.

E-mail-ikkut qinnuteqaatinik tigusineq ajorpugut.

Qinnuteqaat nassiuguk

Naalakkersuisut pillugu

Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job