Kalaallit Nunaanni Uumasut Nakorsaqarfik Inuussutissalerinermullu Oqartussaaffik Uumasut nakorsaattut atorfinittussamik pissarsiorput

Uumasut nakorsaattut piginnaasatit tamakkiisumik atortarusuppigit, suliassanillu assigiinngitsunik anguniagaqarfiusumik nammineerlutillu sulisarusuppit - taamaappat Nuummi atorfimmik pissanganartumik neqeroorfigisinnaavatsigit.

Atorfik pillugu:

Kalaallit Nunaanni Uumasut Nakorsaqarfik Inuussutissalerinermullu Oqartussaaffik (UNIO) Kalaallit Nunaat tamakkerlugu uumasut nakorsaqarnermut inuussutissalerinermullu tunngasut tamaasa akisussaaffigai. Uumasut nakorsaattut tamakkuninnga suliaqartartut ilagilissavatit ulluinnarni suliassavit saniatigut UNIO-p siunissaq ungasinnerusoq eqqarsaatigalugu ineriartortinneqarnissaanut peqataassaatit.

Atorfik iluani suliassanik akisussaaffinnillu amerlasuunik assigiinngitsunillu periarfissaqarpoq, namminerlu piginnaanitit soqutigisatillu apeqqutaatillugit suleqatit suleqataasartullu allat peqatigalugit suliassatit sinaaqqusersorsinnaavatit.

UNIO-p akisussaaffiisa ilai:

• Qimmit nappaataannut parvovirusimullu aamma perlerornermut akiuussutissanik kapuisarnissamut pilersaarutit ingerlannissaat, kommuniniit akuerisatut akiuussutissanik kapuuisinnaanissaannik pikkorissaanerit taakkununnga ilaallutik.

• Uumasut illersorneqarnissaannut uumasullu peqqissuunissaannut tunngatillugu nakkutilliiartortarnerit, siunnersuisarnerit suliassanillu isumaginnittarnerit, taakkununnga ilaallutik;

  • Qimminik qimuttunik naliliinerit nakkutilliinerillu.

  • Telemedicin aqqutigalugu qimminik qimuttulinnut nakorsiartitsisarnerit.

  • Nersutaatilinni savaatilinnilu nakkutilliinerit uumasuutinillu alakkaasarnerit aamma nakorsiartitsisarnerit.

  • Uumasunik illersuinermut tunngasunik suliaqartarnerit.

• Innutaasunik sullissineq tassunga ilanngullugit uumasunik, inuussutissanik, nunatsinnut eqqussisarnermut nunatsinniillu annissisarnermut tunngatillugu siunnersuisarneq.

• Inuussutissalerinermut tunngatillugu nakkutilliiartortarneq, siunnersuisarneq suliassanillu isumaginnittarneq.

• Danmark-mi Fødevarestyrelsen-imik isumaqatigiissuteqarnermut atatillugu suliassat, taakkununnga ilaallutik:

  • EU Border Control Post-imi suliniutini uumasunut nakorsaqarneq (killeqarfinni nakkutilliineq).

• Toqoraavinni nakkutilliineq, tassunga ilanngullugu toqoraavinni nakkutilliinernit aaqqiinernik pitsaassusaannik misissuisoqartarneq.

• Kalaallit Nunaanni uumasunut nakorsaqarnermut inuussutissalerinermullu tunngatillugu suliassat eqqarsaatigalugit tamakku inatsisiliuunneqarlutillu maleruagassiuunneqarnissaanut suleqataaneq.

• Uumasut akornanni nappaatit tuniluuttarneri uumasullu nappaataannik inunnut tuniluuttarnerini nakkutilliinerit upalungaarsimanerillu

• Naalakkersuisunik sullissineq.    

UNIO pillugu:

UNIO Aalisarnermut, Piniarnermut, Nunalerinermut Imminullu Pilersornermut Naalakkersuisoqarfiup ataaniippoq. Aaqqissugaaneq eqqarsaatigalugu Nuummi allaffeqarpugut immikkoortoqarfimmi pingaarnermi katersuuteqqalluta. Tamatuma saniatigut uumasut nakorsaat massakkuugallartumik aamma Ilulissani inissisimavoq. Kalaallit Nunaat tamaat, susassaqarfitta iluani isumagisassat isumagisarpagut, taamaammat angalasarnerit sulinerup ilagivai.

Nuummi inissisimalissaatit ulluinnarnilu suliassat UNIO-mi ingerlanneqartartunut peqataassallutit suliffeqarfimmi eqeersimaarfiusumi suliassallu ingerlaavartumik takkussuuttartumi. Tassanilu Uu-masut Nakorsaqarfia Inuussutissalerinermullu Oqartussaaffimmi immikkoortortaqarfimmi pisortamut ulluinnarni attaveqartassallutit.

Ilinnut tunngasut:

Uumasut nakorsaatut (Cand.med.vet) ilinniagaqarsimassaatit Danmark-imiit allagartaqarlutit.

Qinnuteqartunit nalilersuinermi illit pillutit naatsorsuutigisagut uku pingaartippagut:

• nappaatinik tuniluussinnaasunut upalungaarsimanermut periusissianik ineriartortitsinissamik soqutigisaqarnissat.

• uumasut illersorneqarnissaannut aammalu peqqissusaannut tunngatillugu nakkutilliiartortarnerinut siunnersuisarnerinut suliassanillu isumaginnittarnerinut soqutigisaqarnissat.

• IT-nut tunngasunik ilisimasaqarluarnissat, peqqissaartumik sulisinnaanissat.

• allattariarsornikkut oqaatsitigullu paasiuminarsaallaqqissuussaatit.

• arlalinnik oqaaseqartuunissat. Ulluinnarni allaffimmi sulinermi kalaallisut danskisullu oqaatsit annertunermik atorneqarput, annikitsumillu tuluttut oqaasii atorneqartarlutik. Kalaallisullu allassinnaaguit oqalussinnaallutillu iluaqutaassaqaaq.

Sulinermi suleqatinik, innuttaasunik oqartussaasunillu allanik qaffasissumik suleqateqarsinnaalluarnermik naatsorsuutaavoq.

Taamaammat pingaaruteqarpoq illit inuttut:

• tamakkiisumik isiginnissinnaassuseqarnissat, aaqqissuussamik sulisinnaassuseqarnissat suliassannillu pilersaarusiorluarsinnaassuseqarnissat.

• tusarnaarluarsinnaasutit suleqateqarluarsinnaallutillu.

• nammineerluni sulisinnaassuseqarnermik nuannarisaqassaatit pisuni ilungersunartorsiorfiusuni eqqarsarluarsinnaassuseqassallutillu.

• Ikiorneqarnissamik siunersiueqatigisagaqarnissamik pisariaqartitsileraangavit aperisinnaanissamut sapiissuseqassasutit.

Immikkoortortaqarfimmi inussiarnersumik pitsaasumillu imminnut oqaluuttarfiusumi isumagissaarneq pingaartinneqarpoq.

Aningaasarsiaqartitaanermi atorfeqartitaanermilu atugassarititaasut

Akissarsiat atorfinitsitaanermullu tunngasut, taakkununnga ilaallutik atorfinikkiartorluni soraarnermilu angalanissanut pequtinillu nuussinermut tunngasut atorfininnerup nalaani Namminersornerullutik Oqartussat kattuffiullu ilaasortaaffigisap isumaqatiginninniarsinnaatitaasup akornanni isumaqatigiissutit malillugit aalajangerneqassapput.

Qinnuteqartunut tjenestemanditut atorfeqareersunut tjenestemanditut atorfinitsitsisoqarsinnaassaaq. Kalaallit Nunaanni Namminersornerullutik Oqartussani kommuninilu tjenestemandit pillugit Inatsisartut inatsisaat nr. 21, 18. december 2003-meersooq naapertorlugu tjenestemanditut atorfinitsitsisoqassaaq.

Piffissaq suliffiusussaq sapaatip akunneranut nalunaaquttap akunnerinik 40-nik sivisussuseqarpoq, kisianni piffissap ilaannaa artorfinitsinneqarnissaq aamma periarfissaavoq. 

Paasissutissat allat

Atorfik pillugu sukumiinerusumik paasisaqarusukkuit Uumasut nakorsaanermut Anna Jespersen-imut oqarasuaat +299 345353 / +299 566231 imaluunniit allagaqarlutit uunga uumasut@nanoq.gl attaviginissaanut tikilluaqqusaavutit.

Malugiuk Nunatta Danmarkillu akornanni akunnernik pingasunik nikingassuteqarmat.

Kalaallit Nunaanni pinngortitarsuaq alutornarluinnartuuvoq silamilu nammineerluni sammisassarsiornissamut periarfissaqarluarluni. Nuuk 20.000-tit missaannik innuttaassuseqarluni Kalaallit Nunaanni illoqarfiit pingaarnersaraat annersaralugulu. Illoqarfik kulturikkut illoqarfittullu pisoorsuuvoq kiisalu meeqqanut, inuusuttunut inersimasunullu sunngiffimmi susassaqartitsisarluni. Pinngortitami qaqqarsuit kangerluillu kusanaqisut illoqarfiup qeqqaniit qanittuaraapput sunngiffimmilu silaannarmiinnissamut periarfissarissaartitsisarlutik.

Kalaallit Nunaata avataaniit qinnuteqartunut tunngatillugu sungiusimasamit allaasumit kulturikkut piumasaqaateqarfiusumi sulinissamut piginnaaneqarneq, piumassuseqarneq kajumissuseqarnerlu pingaaruteqarpoq. Malugiuk Kalaallit Nunaanni nammineerluni angalasarnissaq atorfimmut ilaammat taamaattumillu kulturimi atuuttumi ataqqinnillutillu sapiissuseqarnissat namminersorlutit sulisinnaanissat pisariaqarpoq.

Kalaallit Nunaat Namminersorlutillu Oqartussat pillugit annertunerusumik paasisaqarusukkuit, ugguuna atuarsinnaavatit:

• www.sullissivik.gl

• www.naalakkersuisut.gl

Kalaallit Nunaanni kalaallit oqaasii pingaarnersaapput. Kissaatigigukku, piffissap suliffiusup nalaani kalaallit oqaasiinik ilinniartinneqarnissaq neqeroorutigineqarsinnaavoq.

Qinnuteqaat

Qinnuteqaat naalakkersuisoqarfiup tigoreersimassavaa kingusinnerpaamik ulloq 17. juli 2026.

Atorfinitsitsiniarluni oqaloqatiginninnerit ingerlaavartumik pissapput elektroniskimillu attaveqaatitigut ingerlanneqarsinnaallutik. 

Atorfinittoqassaaq 1. september 2026 piaartumilluunniit kingorna.

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Qinnuteqartoq uppernarsaatitalinnik piginnaasalik immikkut siunnersortitut, siunnersortit pisortaatut siunnersortaanertulluunniit isumaqatigiissutit naapertorlugit atorfinitsinneqarsinnaasarpoq.

Najugaq

Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik.  Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 

E-mail-ikkut qinnuteqaatinik tigusineq ajorpugut.