Kinaavit nutaamik suliniutinut allattoqarfimmi suliniutinik aqutsisutut/suliniutinik suliaqartutut suliffeqarfimmut nutaamik pilersinneqartumut Peqqissutsimut Naalakkersuisoqarfimmi?

Peqqinnissamut suliassaqarfik ukiuni kingullerni suliassaqarfittut qitiutinneqarpoq ineriartorneranullu ikioqataasinnaanngorputit. Peqqissutsimut Naalakkersuisoqarfik suliniutinut aqutsiffiusussamik peqqissutsimullu isumaqatigiissut nutaaq tunngavigalugu suliniutinut kiisalu peqqissutsimut ataatsimiititaliarsuup innersuussutaanik suliarinnittussamik allattoqarfittaassamik pilersitseqqammerpoq. Nammineq sunniuteqarfigisinnaasannik saniatigullu peqqissutsimut tunngatillugu suliassaqarfimmi kivitseqataanikkut allanngueqataarusukkuit ataani atuagassat atuakkit.

Peqqissutsimut Naalakkersuisoqarfik qaffasissumik ilinniagaqarsimasumik suliniummik aqutsisussarsiorpoq/suliniummut sulisussarsiorpoq

Peqqissutsimut Naalakkersuisoqarfik sulerusussusilimmik allallaqqissumillu qaffasissumik ilinniagaqarsimasumik suliniummut aqutsisussarsiorpoq imaluunniit suliniummut suleqataasussamik suliniutinut arlaqartunut november 2023-mi Peqqissutsimut Isumaqatigiissummit kiisalu Peqqissutsimut Ataatsimiititaliarsuup innersuussutai 2023 maajimeersunit tunngaveqartunit suliniuteqarfiginninnissamut piumassuseqartumik.

Piffissami killilimmi 31. december 2027-p tungaanut atorfeqarnissaq pineqarpoq, sivitsuinissarli periarfissaavoq.

Suliassatit

Suliniutinik assigiinngitsunik peqqissutsimut isumaqatigiissummit kiisalu Peqqissutsimut Ataatsimiititaliarsuup Innersuussutaanit ataqatigiissaarinermik atuutsitsilernissamillu qulakkeerinninnissaq suliassaraatit. Naalakkersuisoqarfiup tillerneraniissaatit peqqissutsimullu tunngatillugu suliassaqarfiup tunngaviinik siunnerfeqarlutit ineriartortitsinissamik suliniuteqarnikkut pitsanngorsarnissaanik periarfissaqassallutit.

Suliniutit annertunerit ilagaat Kalaallit Nunaannit Peqqinnissaqarfimmi nunanit allanit sulisussarsiortarnermi tunngavinnik ineriartortitsinissaq kiisalu kræfteqartunut ikiorsiissutinik ineriartortitsinissaq.

Suliniummik aqutsisutut/suliniummut suleqataasutut pingaartumik uku aallutissavatit:

• Suliniummik annertuumik ataatsimoorussamik akisussaaffeqarneq soorlu peqqinnissaqarfiup nunanit allanit sulisussarsiortarneranut tunngavissanik ineriartuineq.

• Suliniutinik allanik assigiinngitsunik suliaqarnermi suliassaqarfiillu attuumassuteqartut akimorlugit suliassanik kiisalu politikkikkut siunnerfinnik akisussaaffeqarneq.

• Suliniutinik aallartisaanermi ingerlatsinermi naammassinninniarnermilu aaqqissuussamik, malinnaaviginnilluni sulerusussuseqartumillu ingerlatsineq.

• Suliassaqarfimmi avataanilu suliassanik agguaassisinnaaneq malinnaaviginnissinnaanerlu.

• Saaffissanut assigiinngitsunut killiffiit angusallu pillugit allakkatigut erseqqarissumik paasinartumillu nalunaarusiorsinnaaneq.

Suliniutinut Allattoqarfik aallarteqqammerpoq taamaattumik suliniutinik suliassanillu toqqaannissamut nammineq sunniuteqaqataanissat periarfissaassaaq.

Peqqissutsimut Isumaqatigiissut 2023 una toorlugu (https://naalakkersuisut.gl/Nyheder/2023/11/1311_Sundhedsforlig?sc_lang=kl-GL) atuarsinnaavat aamma Peqqissutsimut Ataatsimiititaliarsuup isumaliuutissiissutaa uani atuarsinnaavat (https://naalakkersuisut.gl/Nyheder/2023/05/2405_sundhedskommissionen?sc_lang=kl-GL).

Illit piginnaasatit

Naatsorsuutigaarput qaffasissumik attuumassutilimmik, minnerpaamik kandidatitut qaffasissusilimmik ilinniagaqarsimassasuti. Suliniutinik aqutsinermik misilittagaqarneq imaluunniit suliniummik tunngavilmmik suliaqarsimaneq iluaqutaavoq. Ilanngullugu naatsorsuutigaarput, peqqinnissamut suliassaqarfimmi sulinermut paasisimasaqarluartutit tassunga ilanngullugit pisortat ingerlatsiviini suleriaatsinut paasisimasaqassasutit.

Taakku saniatigut naatsorsuutigaarput:

• Suliniutinut ataqatigiissaarinermut aqutsinermullu piginnaasaqartutit.

• Oqaluttariarsornikkut allattariarsornikkullu attaveqaqatigiinnermik piginnaasaqarluassasutit.

• Allakkianik naatsunik erseqqarissunillu kiisalu allakkanik takinerumaanik ataqatigiissaakkanik allassinnaasutit.

• Suliffeqarfimmi politikkikkut soqutigineqangaarfiusumi sunniuteqarluarnissamut piumassuseqassasutit

• Aaqqissuussaasumik sulisassasutit, peqqissaartuusutit pitsaassutsimillu pingaartitsillutit, piffissanillu killiliussanik eqqortitsillaqqissasutit.

• Kalaallinik inuiaqatigiinnik ilisimasaqarneq.

• Ajornanngippat pingasunik oqaaseqartutit – kalaallisut, qallunaatut tuluttullu.

• Suliassannik aaqqissuussillaqqissuussasutit

• Suliassaqarfiit peqatigiiffiillu akimorlugit suliniuteqarsinnaassuseqartutit kajumissuseqarluartumik.

• Ulluinnarni ulapaarfiusumi taarseraattunillu suliassaqarfiusumi sulilluarsinnaassasutit.

• Ilikkagaqarusussuseqartutit.

Suliassaqarfimmi misilittakkatit killeqarpata ilungersunartumik ilinniarnissaq naatsorsuutigineqassaaq. Ilinniakkaminik naammasseqqammersut qinnuteqarnissaminnut tikilluaqqusaapput.

Atorfik piginnaasat aallaavigalugit AC-fuldmægtigitut, peqqissutsimut siunnersortitut imal. immikkut siunnersortitut atorfiniffiussaaq, aamma isumaqatigiissutit/isumaqatigiinniarnerit atuuttut malillugit atorfinitsitsisoqassaaq.

Uagut neqeroorutigaavut

Oqartussaaffimmi angisuumi, pissanganartumi unammillernartumilu atorfimmik pissanganartumik nammineersinnaaffiusumillu neqerooruteqarpugut. Ulapaarfiusumik pitsaasunik suleqateqarluni persuarsiunngitsumillu oqaloqatigiiffiusinnaasumik suliffeqarpugut. Suliffiuvugut soqutiginartunik suliatigullu unammillernartulik, tassani suleqatigiissinnaaneq suliamullu tunngatillugu pikkorissuseqarneq assut pingaartinneqarput.

Sukumiinerusumik paasisaqarusuppit?

Atorfik pillugu paasissutissat sukumiinerusut allaffimmi pisortamut Martin Hønge Olsenimut saaffiginnilluni pissarsiarineqarsinnaapput, oqarasuaammut +299 345527 imaluunniit e-mail: mhol@nanoq.gl atorlugit attavigineqarsinnaavoq.

Ulloq qinnuteqarfissaq kingulleq

Inuunermit taasassat (CV), ilinniarsimanermut uppernarsaatit assilinerat kiisalu attavigineqarsinnaasut / allattorsimaffik qinnuteqaammut ilanngullugit innersuussissut ataaniittoq link aqqutigalugu kingusinnerpaamik 20. juuni 2024 nassiunneqassapput.

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 

E-mail-ikkut qinnuteqaatinik tigusineq ajorpugut.

Qinnuteqaat nassiuguk

Naalakkersuisut pillugu

Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job