KRK-INUA-mut suliniutinut ataqatigiissaarisoq

Suliniummi 2028-p qiteqqunnerata tungaanut atorfinitsitsineq · sivitsorneqarsinnaasoq

Inuusuttunut pitsaasumik allannguinissamik kajumissuseqarpit? Attaveqatigiinnermut aamma suliniutinik suliaqarnermut pikkoriffeqarpit, aammalu aaqqissuussinermut, ingerlatanik ingerlatsinermut isumassarsiallu piviusunngortinneqarnissaannut isumassarsiorsinnaavit?

Taava immaqa KRK-INUA-mi suliniutinut ataqatigiissaarisutut illit ujartugaraatsigit.

KRK-INUA pillugu

KRK-INUA Kalaallit Røde Korsiata inuusuttunut immikkoortortaqarfigaa. Kalaallit Nunaanni inuusuttunut ataatsimoornernik nukittuunik, atugarissaarnermik aamma periarfissanik pitsaanerusunik inuusuttunut sullissivugut suleqateqarlutalu.

Inuusuttunut 18-it aamma 35-t akornanni ukiulinnut akeqanngitsumik tarnikkut ikiueqqaarnermik suliaqartarpugut kiisalu suliniutit Life Skills aamma SPRINT suliarisarpagut.

Suliniutinut ataqatigiissaarisumik, suliniutitsinnik ingerlareersunik ingerlatsisussamik aammalu KRK-INUA-ta siunissami suliaqarnissaanut ineriartortitsinermut tapertaasinnaasumik ujaasivugut.

Atorfik pillugu

Suliniutinut ataqatigiissaarisutut tamatigoortumik atorfeqassaatit, suliniutinut ataqatigiissaarinermut, attaveqaqatigiinnermut, inuusuttunik peqataatitsinermut aamma sammisassat ingerlanneqarnerinut akisussaaffeqarlutit.

Ilaatigut suliarissavatit:

• suliniutit aamma sammisat ataqatigiissaarlugit aamma malitseqartillugit

• inuusuttunut tarnikkut ikiueqqaarnermut suliniut ingerlallugu

• aaqqissuussinernik, pikkorissaanernik aamma workshopinik pilersaarusiorneq aamma ingerlatsineq

• inuusuttunik, kajumissutsimik suliaqartunik, suleqatinik aamma avataanit suleqatigisanik suleqateqarneq

• attaveqaqatigiinnermik, inuit attaveqaqatigiittarfiinik aamma nittarsaassinermik suliaqarneq

• suliniutinut aamma sammisanik nutaanik ineriartortitsinermut tapertaaneq

• missingersuusiorneq aamma aningaasaqarnermik malitseqartitsineq

• qinnuteqaatinut, uppernarsaatinut aamma nalunaarusiornermut tapertaaneq

atorfimmut atatillugu angalasarnissaq naatsorsuutigineqassaaq

Illit ujartorpatsigit

• inuusuttunut tunngasunik suliaqarusuttoq aamma inuusuttut isumaannik paasinnissinnaasoq

• tarnikkut peqqissuunissamik aamma inuusuttut atugaannik soqutiginnittoq

• NGO-ni imaluunniit inuiaqatigiinni sulinermik paasisimasaqartoq imaluunniit misilittagaqartoq, kiisalu allannguinissamut piareersimasoq

• attaveqaqatigiinnermut pikkorissoq aammalu piumassuseqalersitsisunik imarisanik pilersitsisinnaasoq

• inuit attaveqaqatigiittarfiinik aammalu nittarsaassinermik misilittagaqartoq

• attaveqarnernik pilersitsinermut aamma inunnik assigiinngitsunik suleqateqarnermut pikkorissoq

• aningaasaqarnermut tunngasunik paasisimasalik aammalu missingersuutinik pilersaarusiornermut aamma aningaasaqarnikkut malitseqartitsinermik misilittagaqartoq

Inuusuttunut, kajumissutsimik suliaqartunut imaluunniit inuiaqatigiinnik sullissisuni misilittagaqaruit iluaqutaassaaq.

Piginnaasat qulaani taakkartorneqartut tamakkerlugit pigisariaqanngilatit, suliassat suleqatigiilluta kivittarpagut.

Piumassuseqarneq, alapernaatsuuneq aammalu ilinniarusunneq pingaartippagut.

Aaqqissuussineq aamma tamakkiisumik paasisaqarsinnaaneq nutaaliorsinnaaneq aammalu attaveqarnermut piginnaasat pitsaasut ataatsimoortissinnaagitit.

Neqeroorutigaagut

• Suliniutinut isumalinnut atorfik inuusuttunik aamma tarnikkut peqqissuunissamik qitiutitsisoq.

• Sapaatip akunneranut akunnerit 35-t suliffiusut

• Suliniutinik soqutiginartunik aamma maanna ingerlasunik suliaqarnissamut periarfissaq

• Ulluinnaat tamatigoortut akisussaaffeqarfiusut aamma namminersornissamut periarfissaq

• Suliniutinik aqutsinermut, attaveqaqatigiinnermut aamma NGO-ni sulinermut piginnaasat ineriartortinnissaannut periarfissaq

• Suleqatit, inuusuttut aamma kajumissutsimik suliaqartut piumassuseqartut qanimut suleqatiginissaat

• Angalanerit aamma Kalaallit Nunaanni sumiiffinni assigiinngitsuni inuusuttunik suleqateqarnerit

• Suliffik isumassarsianik, iliuuseqarnermik aamma piumassuseqarnermik pingaartitsisoq.

Paasissutissat

Atorfininnissaq: Suliniummi 2028-p qiteqqunnerata tungaanut sivitsorneqarsinnaasumik atorfinitsitsineq
Piffissaq suliffiusoq: Sapaatip akunneranut akunnerit 35-t
Atorfininnerup aallartiffissaa: 1. november 2026 imaluunniit isumaqatigiissuteqarnikkut siusinnerusukkut
Qinnuteqarnissamut killiliussaq: 18. september 2026

Atorfik pillugu apeqqutissaqaruit allattoqarfimmi pisortaq Betina L. Petersen uunga krk@krk.gl imaluunniit tlf: +299 53 18 00 attaveqarfiginissaanut tikilluaqqusaavutit.

Qinnuteqaat uunga nassiunneqassaaq krk@krk.gl kingusinnerpaamik 18. september 2026.

Tusarfiginissat qilanaaraarput!