Maniitsumut Ilinniartitaanermut pisortaq

Suliassanik nutaanik pissanganartunillu misigisaqarnissannut piffissanngorsoriviuk?

Massakkut illoqarfimmi atuartut ilinniartitsisullu alloriarfikkaarlutik sumiiffinni assigiinngitsuni siammasissumik inissisimasunut ataqatigiisitsinermik pilersitsinissannut periarfissaqalerputit.

Qeqqata Kommuniani Ilinniartitaanermut immikkoortortamut Ilinniartitaanermut pisortamik pissarsiorpugut. Atorfik allaffissornikkut Maniitsumi inissisimavoq, aaqqissuussinikkullu Aningaasaqarnermut Ilinniartitaanermullu pisortaanerup ataani inissisimalluni.

Ilinniartitaanermut immikkoortortaq makkuninnga akisussaaffeqarpoq; atuarfiit, meeqqeriviit, Majoriaq kiisalu kultureqarnermut sunngiffimmilu sammisanut immikkoortortaq.

Maniitsumi Atuarfik Kilaaseeraq ukiuni tulliuttuni pingasuni tamakkiisumik nutarsarneqassaaq. Atuartut, ilinniartitsisut atuarfiullu allaffeqarfiata illoqarfimmi sumiiffinni assigiinngitsuni inissisimatillugit, atuarfimmi pisortaq peqatigalugu ikaarsaariarfimmi ataqatigiissaarinissaq toqqissisimanartuunissarlu pingaarnertut suliarissavatit, kiisalu atuartitsinerup pitsaasumik inissisimanissaa ilinniartitsisunillu orniginarsaaneq sulisorinniinnarnerlu qulakkiissallugu.

Suliassat akisussaaffiillu:

- Immikkoortortami missingersuutinik aningaasaqarnermillu malitseqartitsinermik akisussaaneq kiisalu missingersuutit aningaasaliissutitigut killiliussat malinneqarnissaasa qulakkeerneqarnissaat

- Ilinniartitaanermut ataatsimiititaliamut saqqummiussassanik suliaqarneq ataqatigiissaarinerlu kiisalu ataatsimiititaliap ataatsimiinnerani peqataaneq

- Pitsaassutsimik sullissinerullu qaffasissusaanik nukittunerusutut qulakkeerinnittumik immikkoortup ulluinnarni ingerlanneqarnera aqunneqarneralu siulersussallugu, kiisalu sulisut atugarissaarnissaat avatangiiserissaarnissaallu qulakkiissallugu

- Atugassarititaagallartuni atuartunut toqqissisimanartumik ilikkarfiusunik avatangiisinik aammalu ilinniartitsisut atuartullu akornanni sunniuteqarluartumik attaveqatigiinnermik suleqatigiinnermillu pilersitsineq

- Nutarsaanerup ingerlanerani kiisalu atuarfiup nutarsarneqarsimasup atoqqaarfissiornissaanut ilinniartitsisunik piginnaasaqarluartunik orniginarsaaneq sulisorinniinnarnerlu

- Piorsarsimassutikkut sunngiffimmilu sammisassaqartitsinernik ineriartortitsinissamik qulakkeerinninneq

Piginnaasat piginnaaneqarfiillu

- Arlalinnik oqaaseqartuussaatit, kalaallisut, qallunaatut tuluttullu

- Naleqquttumik ilinniagaqassaatit aammalu siusinnerusukkut suliffigisimasannit aqutsinermut misilittagaqarlutit, aammattaaq politikkikkut aqunneqartumik misilittagaqarsinnaallutit

- Kommunip aningaasartuutaanik naatsorsuutaanillu aqutsinermut ilisimasaqartuussaatit

- Attaveqaqatigiinnissamik piginnaasaqarluartoq aammalu allannguinermik ingerlatsinerni toqqissisimanermik pilersitsisinnaasoq

- Ammasumik ersarissumillu aqutseriaaseqassaatit aalajangiillaqqissuullutillu

- Sulisunik kajumissaarisinnaassuseqassaatit

- Eqaatsumik suleriaaseqassaatit kiisalu tamanik takunnillaqqissuussaatit aammalu suleqatiginnikkumasuussaatit

Neqeroorutigisinnaavagut

- Suliffik pissanganartoq unammillernartorlu

- Suliffeqarfik uummaarissoq ulluinnarni pissanganartunik unammillernartorpassualik

- Suleqatit pitsaasut amerlasuut

Akissarsiat atorfininnermilu atugassarititaasut

Akissarsiat atorfeqartitaanermilu atugassarititaasut, akiliunneqarluni angalaneq pequtinillu assartuineq ilanngullugit, Naalakersuisut aamma Ilinniartitsisut Meeqqat Atuarfianneersut Kattuffiat (IMAK) aamma Kalaallit Nunaanni Namminersorlutik Oqartussat Kommunillu ataanni allaffissornermut pisortanut akissarsiaqartitaanermut atorfinitsitaanermullu atugassarititaasut pillugit isumaqatigiissutaat sukkulluunniit atuuttut naapertorlugit inissinneqassapput.

Atorfinitsitaaneq isumaqatigiissuteqarnikkut pissaaq, kisianni Kalaallit Nunaanni allami tjenestemanditut atorfeqareersimagaanni toqqaannartumik tjenestemanditut ikaarsaartoqarnissaanut periarfissaqarpoq.

Atorfik pissanganarsoraajuk? Maannakkut qinnuteqarit Maniitsumilu, nunaqarfii ilanngullugit, Ilinniartitaanermut immikkoortortap siunissamut ilusilersorneranut peqataallutit.

Piaartumik isumaqatigiissuteqarnikkulluunniit atorfinittoqassaaq.

Atorfik pillugu paasissutissat sukumiinerusut Aningaasaqarnermut Ilinniartitaanermullu Pisortaanermut Malene Broberg-imut oqarasuaat (+299) 86 73 80, email: berg@qeqqata.gl saaffiginninnikkut pissarsiarineqarsinnaapput.

Qinnuteqaat ilinniarsimanermut uppernarsaatit assilinerinik, oqaaseqaatinik, imminut ilisaritinnermik, pinerluuteqarsimannginnermut uppernarsaammik attaveqarfissanillu ilalik nassiunneqassaaq.

Qinnuteqarnissamut ulloq killiliussaq 2/8-24

Qinnuteqarit una toorlugu