Meeqqanut Inuusuttunullu Naalakkersuisoqarfimmi inatsilerituumik ujaasivugut
Inatsisinut tunngasunut suliat soqutigivigit, allanngueqataarusullutillu, taava Meeqqanut Inuusuttunullu Naalakkersuisoqarfimmi inatsilerituumik ujaasivugut
Politikikkut aalajangiisarnerit qanillugit sulerusukkuit aamma meeqqanut innarluutilinnullu suliassaqarfinni inatsisiliorneq ilusilersueqataaffigerusukkukku, taava Meeqqanut Inuusuttunullu Naalakkersuisoqarfimmi inatsisilerinermut immikkoortortaqarfimmi pissanganartumik atorfimmik peqarpugut.
Naalakkersuisoqarfimmi suliassaqarfimmut politikkikkut anguniakkat piviusunngortinnissaat suliarisarparput. Ilaatigut inatsisiliorneq tassani ilaavoq, matumani naalagaaffimmi inatsisit Kalaallit Nunaannut atuuttussat, nunat tamat akornanni isumaqatigiissutit, periusissiat aamma suliniutit ilanngullugit. Meeqqanut inuusuttunullu aarlerinartorsiortunut aamma inunnut innarluutilinnut pissutsit kiisalu atualerneqanngitsunut suliassaqarfimmi ulluunerani neqeroorutit pillugit inatsisiliorneq immikkoortortaqarfimmi suliassat ilagaat.
Isumaginninnermi suliassaqarfiup ilarujussuani inatsisissatut nalunaarutissatullu siunnersuutit inatsisilerinermi immikkoortortaqarfiup piareersartarpai suliaralugillu. Meeqqat inuusuttullu eqqarsaatigalugit Naalakkersuisut suliniutinik annertuunik aallartitsisimapput, tassungalu atasumik immikkoortortaqarfimmi nutaanik patajaallisakkanillu inatsisiliornermi suliassat pissanganartut amerlasuut suliarineqartussaapput.
Taassuma saniatigut suliassaat ilaat tassaapput politikerinik sullissineq aamma politikerinit, innuttaasunit, kommuninit oqartussaasunillu allanit saaffiginnissutit akissuteqarfiginissaat. Tamatumani inatsisit nassuiarnissaannik soorlu aamma nalinginnaasumik inatsisilerinermut tunngatillugu apeqqutit pineqarsinnaapput.
Inatsisilerinermik immikkoortortaqarfik fuldmægtiginik/immikkut siunnersortinik marlunnik amerlassusilerneqarsimapput, taakkulu pisortaraat aqutsisunut allattoqarfiup pisortaa. Taamaammat illit qanittumik suleqatigiinni ikittunnguani ilaalissaatit, tassani aallaqqaataaniit nammineq suliassatit pissavatit annertuumillu sunniuteqaqataalissallutit.
Suliassat tamatigoortuupput piumasaqaataavorlu suliarisat assigiinngitsut kulturillu akornanni suleqateqarsinnaaneq aamma nammineq suliassaqarfigisanut namminerisamik akisussaassuseqarsinnaaneq.
Ima neqeroorfigisinnaavatsigit:
- Isumaginninnermut tunngasuni nalinginnaasumik aalajangersimasumillu inatsisinik atuisinnaanernik pikkorinnerulersinnaaneq
- Politikikkut ingerlatsinerit qanillu ulluinnarneq suliaqarneq
- Unammilligassat pissanganartut, assigiiaaginnartunngunngisaannartut
- Ullormit suliffiusumit akisussaaffeqalerneq sunniuteqarsinnaanerlu
- CV pitsaalluinnartoq
- Suliffik pitsaasunik suleqateqarfiusoq atugarissaarnissamillu ukkataqartoq aamma persuarsiorpalaanngitsumik oqaluuteriaaseqarfiusoq
Suliassatit
- Inatsisiliornissamik piareersaanerit, matumani inatsisissatut nalunaarutissatullu siunnersuutit suliarineri ilanngullugit.
- Politikikkut aqutsisunut aalajangiinissamut tunngavissat suliarineqarnerini pitsaassutip qulakkeerneqarnissaanut ilaaneq aamma politikikkut aalajangikkanik atortuulersitsineq
- Inatsisilerinermi siunnersuineq
- Inatsisilerinermi sammisat tunngavii pillugit allakkianik suliaqarneq
- Politikikkut tunngasut suliassat, assersuutitut periusissiat, iliuusissatut pilersaarutit, nalunaarusiat allallu pillugit naalakkersuisoqarfiup immikkoortortaqarfiinik allanik suleqateqarneq
- Isumaginninnermut Aqutsisoqarfimmik kiisalu Namminersorlutik Oqartussani immikkoortortat sinnerinik suleqateqarneq
Ilimagisagut
- Cand.jur.-itut, cand.merc.jur-itut imaluunniit assigisaannik ilinniagaqarputit. Inatsisilerinermi bachelorit aamma atorfinitsinneqarsinnaapput.
- Inatsisiliornermik misilittagaqarneq iluaqutaassaaq piumasaqaataananili
- Suliffimmi politikikkut aqunneqartumi sulinermik misilittagaqarneq iluaqutaassaaq piumasaqaataananili
- Nammineerlutit akisussaaffik tigusinnaavat, nammineerlutillu sulisinnaallutit
- Suleqatigiinnermi sunniivigeqatigiittarneq oqartussaasoqarfiillu assigiinngitsunik suliallit akornanni suleqatigiinneq pingaartippatit
- Suliannut suleqatinnullu ammasumik inussiarnersumillu pissuseqarputit
- Ilusilersorluakkamik suleriaaseqarputit, aamma tunniussivissatut killiffiliussat pitsaassuserlu ukkatarivatit
- Allannguinissamut piareersimavutit suleqatikkuminartuullutillu
Kalaallit Nunaanni inuiaqatigiinni pissutsinik kulturimillu ilisimasaqarneq iluaqutaassaaq, piumasaqaataananili.
Ulloq qinnuteqarfissap killinga
Ulloq 5. september 2024.
Ulloq atorfiniffissaq
Ulloq 1. november 2024, imaluunniit isumaqatigiissuteqarnikkut.
Paasissutissat annertunerusut:
Meeqqanut Inuusuttunullu Naalakkersuisoqarfik pillugu annertunerusumik paasissutissat uani takusinnaavatit: www.naalakkersuisut.gl. Atorfik pillugu annertunerusumik paasiniaaniaruit siunnersortaanermut Kirsten Olesen-Nzulumike-mut: kiol@nanoq.gl oqarasuaataanulluunniit +299 553252-mut imaluunniit allaffimmi pisortamut Susanne Qvist-Aaen-imut: sulq@nanoq.gl oqarasuaataanulluunniit +299 220303-imut attaveqarsinnaavutit. Eqqaamajuk nalunaaqutaq Danmarkimiit nalunaaquttap-akunnernik 3-nik nikingammat.
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.
Qinnuteqartumut eqqortunik piginnaasaqartumut, atorfik immikkut ittumik siunnersortitut neqeroorutigineqarsinnaavoq.
Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.
Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq
Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.
Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.
Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.
Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job