MIO pissanganartumik nutaamik suliniummik aqutsisussarsiorpoq
MIO-mi suliniummut immikkuullarissumut suliniummik ingerlatsisumik aallussisumik pikkorissumillu ujartuisoqarpoq, suliniummi Kalaallit Nunaanni kinguaariit atuartuusut inuuneri pisinnaatitaaffiilu misissorneqassapput. Meeqqat pisinnaatitaaffiinik suliaqarneq soqutigisaraajuk suliniutinillu ingerlatsineq misilittagaqarfigalugu? Taava immaqa illit ujartorpatsigit.
Naalagaaffiit Peqatigiivisa Meeqqat pillugit isumaqatigiissusiaata Kalaallit Nunaanni ilisimaneqarnerata siammarterneqarnissaa aammalu meeqqat atugarisaasa pitsanngorsarneqarnissaat MIO-p suliniutigaa. Suleqatigiit ikitsunnguit tunniusimasullu suleqatigiinnikkut suliassaqarfiit assigiinngitsut akimorlugit qanimut suleqatigiillutik pitsaanerpaamik angusaqartarput.
Suliniummik ingerlatsisinnaasoq, assigiinngitsorpassuarnik ataatsikkut suliaqarsinnaasoq, suliniummilu nutaami Kalaallit Nunaanni meeqqat nipaat: Kinguaariinnik ukkataqarneq -mi siuttutut inissisimarusuttoq ujartorparput. Suliniummi meeqqat isiginnittaasii qitiutinneqassapput, ulluinnarnilu meeqqat misigisartagaat – angerlarsimaffimmi, atuarfimmi digitalimilu ataatsimoorfinni – itisilerneqassallutik. Suliniut LEGO-p aningaasaateqarfianit aningaasalersugaavoq, suliniutillu ingerlanneqarnerani assigiinngitsorpassuit suleqatigineqassallutik. Atorfeqarnermi angalasoqartarnissaa naatsorsuutigineqartariaqarpoq.
Suliassatit
Suliniummik ingerlatsisutut suliniutip ulluinnarni ingerlanneqarnissaanut akisussaasutut aammalu suliaqartut assigiinngitsut attaveqaataattut inissisimassaatit. Oqaatsitigut piginnaanitit aallaavigalugit nutserinernik aammalu kalaallisut allassimasut pitsaassusaannik qulakkeerinnittussatut aamma suleqataassaatit. Ilaatigut uku suliarisassavatit:
Suliniummik aqutsineq allaffissornerlu
Oqaatsit pitsaassusaannik qulakkeerinninneq aammalu qallunaatuumit kalaallisuumut naatsunik nutserineq
Nuna tamakkerlugu atuarfeqarfinni attaveqaammik ineriartortitsineq
Paasissutissanik meeqqaneersunik katersineq misissuinerlu
Pissarsiarineqartut pillugit isumasioqatigiinneq pitsaassutsinillu qulakkeerinninneq
Ataatsimiinnernik workshopinillu assigiinngitsunik aaqqissuussineq
Allatanik assigiinngitsunik suliaqarneq
MIO-p suliaanut aammalu Meeqqat oqaaseqartartuannik kiffartuussinermi suleqataaneq
Illit pillutit
Suliniutinik ingerlatsisinnaasoq ujartugarput:
Naapertuuttumik qaffasissumik ilinniagaqarsimassaaq (ass. Isumaginninnikkut imaluunniit inuiaqatigiinni ilisimatusarneq)
Suliniutinik ingerlatsinermik misilittagaqassaaq, pilersaarusiorsinnaassaaq suliassallu assigiinngitsorpassuit ataatsikkut suliarisinnaassallugit
Meeqqat pisinnaatitaaffiinik soqutiginnissaaq aammalu meeqqat inuusuttullu pillugit suliassaqarfimmi ilisimasaqarsinnaalluni
Misissuinermik piginnaasaqassaaq namminersorlunilu sulisinnaassalluni
Attaveqallaqqissuuvoq, allakkatigut oqalunnikkullu – naatsunik nutserinermik misilittagaqarsinnaavoq oqaatsitsigullu pitsaassutsinik qulakkeerinnissinnaalluni
Suliassaqarfimmi assigiinngitsunik suliaqarfiusumi ineriartortumilu nuannaarluni sulisinnaavoq
Kalaallisut qallunaatullu oqalussinnaallunilu allassinnaavoq
Neqeroorutigisinnaasarput
Suleqatigiinni pissanganartumi annertuumik anguniagaqarfiusumi, aallussisunik suleqatigiiffiusumi atorfik. Suliniummi pingaaruteqaqisumi kalaallit meerartaasa inuunerminni atugarisaannut ukkataqarfiusumi qitiusumik inissisimallutit sulisinnaavutit.
Atorfik
Suliniut pillugu atorfinitsitsisoqassaaq, taannalu qaammatinik 31-nik sivisussuseqarpoq, sivitsuisoqarsinnaanera periarfissaassaaq. Ulloq atorfiniffissaq: 1. Marsi 2025.
Assigiinngisitaarneq
MIO-mi assigiinngisitaarneq nukittut isigineqarpoq, taamaattumik piukkunnartut qanorluunniit suaassuseqaraluarunik, ukioqaraluarunik, innarluuteqaraluarunik, upperisaqaraluarunik, atoqatigeeriaaseqaraluarunik inuiaassuseqaraluarunilluunniit atorfimmut qinnuteqarnissaat kaammattuutigaarput.
Atorfik pillugu apeqqutissaqaruit siunnersortit pisortaat, Ditte Enemark Sølbeck, ditte@mio.gl -mut imaluunniit 264995 -mut saaffigineqarsinnaavoq.
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.
Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.