MIO ujarlerpoq aalajaatsumik attaveqatigiinnermut siunnersortimik
Nutaaliorsinnaassuseqarpit, attaveqallaqqissuullutit meeqqallu pisinnaatitaaffiinik soqutigisaqarlutit? Inuiaqatigiinni allannguerusussuseqarpit, suleqatigiillu anguniagaqarluartut suliniutaanni attaveqarnermi siuttutut inissisimarusullutit? Taava immaqa illit attaveqaqatigiinnermut siunnersortissaraatsigit.
Naalagaaffiit Peqatigiivisa Meeqqat pillugit isumaqatigiissusiaata Kalaallit Nunaanni ilisimaneqarnerata siammarterneqarnissaa aammalu meeqqat atugarisaasa pitsanngorsarneqarnissaat MIO-p suliniutigaa. Suleqatigiit ikitsunnguit tunniusimasullu suleqatigiinnerisigut suliassaqarfiit assigiinngitsut akimorlugit qanimut suleqatigiinnikkut pitsaanerpaamik angusaqartarput.
Attaveqaqatigiinnermut siunnersorti suliassaqarfimmi ineriartorfiusumi assigiinngitsunillu suliassaqarfiusumi sulisinnaasoq ujartorparput. MIO-mi attaveqaqatigiinnermut siuttutut inissisimassaatit, suleqatigut qanimut suleqatigalugit attaveqaqatigiinnermut periusissiassamik ineriartortitseqataallutillu atuutsitsissaatit. Suliassatit siammasissuupput, illillu MIO-p sullinniagaannut anngussinissatsinnut ilusilersueqataassallutit.
Ilaatigut MIO-mi suliniutigineqartumi nutaami - Kalaallit Nunaanni meeqqat nipaat: Kinguaariinnik ukkataqarneq -mi attaveqarnissamut suliaqassaatit. Suliniummi meeqqat isiginnittaasii qitiutinneqassapput, ulluinnarnilu meeqqat misigisartagaat – angerlarsimaffimmi, atuarfimmi digitalimilu ataatsimoorfinni – itisilerneqassallutik.
Ilaatigut suliassat
Nittartagarisatta inuit attaveqaataannilu quppernitta (Facebook aamma TikTok) imarisaannik aaqqissuussineq
Saqqummersitassanik soqutiginartunik ikkussineq allannerlu
Ilusilersuinernik annikitsunik assinillu suliaqarneq – namminerlu assiliineq
Videunik naatsunik inuit attaveqaataanni, ingammik TikTok-imi, atugassanik suliaqarneq
Avataaniit suleqatigisartakkatta suleqatigineri, soorlu ilusilersuisartut videuliortartullu,
Tusagassiorfinnut sullissineq: Tusagassiutinut nalunaarutinik suliaqarneq tusagassiorfinnullu attaveqarneq
Soqutigisalinnut, politikerinut tusarniaanernilu ilisimasanik siammarterineq
MIO-mi suliniutigineqartut pillugit sulianik assigiinngitsunik suleqataaneq
MIO-p suliaani suliaqarneq tapersersuinerlu, tassunga ilanngullugu Meeqqat Oqaaseqartartuannik kiffartuussineq
Illit pillugit
Attaveqaqatigiinnermut siunnersorti ujartugarput:
Attaveqaqatigiinnermut suliaqarnermik misilittagaqarpoq
Management systeminik Meta Business Suitemillu misiligaqarsinnaavoq
Marlunnik oqaaseqartuuvoq, kalaallisut qallunaatullu
Nutaaliorsinnaassuseqarpoq, ilusilersukkanik suliaqarusussuseqarsinnaavoq brandimillu nittarsaassisinnaalluni
Videuliorsinnaassaaq aammalu aaqqissuinernik misilittagaqarsinnaalluni – TikTok-iusinnaaguni pitsaassaqaaq
Politikkitigut ingerlatsinermik ilisimasaqassaaq imaluunniit oqaaseqartartuuneq pillugu ilikkarusussuseqassaaq
Torersumik sulisinnaassaaq, namminersorsinnaassaaq ataatsimullu isiginnittaaseqassalluni – ass. Nittartakkap, inuit attaveqaataat tusagassiorfinnullu suliaqarnermi ataqatigiissusermik isiginnissinnaassuseq
Meeqqat pisinnaatitaaffiinik soqutiginnittuussaaq
Neqeroorutigisinnaasarput
Suleqatigiinni pissanganartumi annertuumik anguniagaqarfiusumi, aallussisunik suleqatigiiffiusumi atorfik. Inuiaqatigiinni suliniutini pingaarutilinni suleqataasinnaavutit, tassanilu meeqqat pisinnaatitaaffii pillugit allanngueqataasinnaallutit.
Atorfik
Atorfik tamakkiisumik atorfiuvoq, sapaatip-akunneranullu akunnerit 40-t sulisoqassalluni. Atorfeqarnermut angalasoqarsinnaaneq naatsorsuutigineqassaaq. Ulloq atorfiniffissaq: 1. Marsi 2025.
Assigiinngisitaarneq
MIO-mi assigiinngisitaarneq nukittut isigineqarpoq, taamaattumik piukkunnartut qanorluunniit suaassuseqaraluarunik, ukioqaraluarunik, innarluuteqaraluarunik, upperisaqaraluarunik, atoqatigeeriaaseqaraluarunik inuiaassuseqaraluarunilluunniit atorfimmut qinnuteqarnissaat kaammattuutigaarput.
Atorfik pillugu apeqqutissaqaruit siunnersortit pisortaat, Ditte Enemark Sølbeck, ditte@mio.gl -mut imaluunniit 264995 -mut saaffigineqarsinnaavoq.
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.
Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.