Peqqissutsimut Naalakkersuisoqarfimmi Periusissiornermut, Pilersaarusiornermut immikkoortortaqarfimmi immikkoortortaqarfimmut pisortaq
Peqqissutsimut Naalakkersuisoqarfik Periusissiornermut, Pilersaarusiornermut immikkoortortaqarfimmi immikkoortortamut pisortassarsiorpoq. Immikkoortortaqarfik pingasunik suleqateqarfeqarpoq – peqqinneq, pilersaarusiorneq aamma aningaasaqarniarneq - suleqatigiit akimorlugit suliaqartuupput. Immikkoortortaqarfimmi pisortaq naalakkersuisoqarfiup pisortaanut nalunaartarpoq.
Peqqissutsimut Naalakkersuisoqarfimmi suleqatigiiuvugut 21-it tassaallutalu inatsisilerituut, peqqinnissaqarfimmi sulianut tunngasutigut siunnersortit, nutserisut aammalu AC-fuldmægtigit, suleqatigiinnermik suliamullu tunngasunik sulinermi qaffasissumik ingerlatsinermik pingaartitsisut. Suleqatigiit suleqatigiilluartuuvugut siunnersoqatigiittarnissamik ikioqatigiittarnissamillu pingaartitsisut. Suliffitsinni pissutsit ammasuullutillu persuarsiortuunngillat, nutaanik isumaliornissamut kiisalu suliassanik naammassinninnissamut kikkut tamarmik peqataasarnissaannut periarfissinneqartarnerannik ileqqoqarpugut. Naalakkersuisoqarfik kalaallit nunaanni peqqinnissaqarfimmi, Allorfik, Pinngitsuuisinnaajunnaarnermik Paasisimasaqarfimmi aamma Nunatta Nakorsaaneqarfiani aqutsisut qanimut suleqatigai.
Periusissiornermut, Pilersaarusiornermut immikkoortortaqarfiup Peqqissutsimut Naalakkersuisoq sullitarivaa pisortaqarfittullu ineriartortitsinermilu suliassat kiisalu peqqinnissap iluani suliassat akisussaaffigalugit.
Immikkoortortaqarfimmi sulinermi pineqarput immikkoortortaqarfimmi sulisunik aqutsineq kiisalu Peqqissutsimut Naalakkersuisumik aamma naalakkersuisoqarfimmi pisortamik sullissineq. Immikkoortortaqarfimmi pisortaq naalakkersuisoqarfimmi pisortaqatigiinnut ilaassaaq aqutsisoqatigiinnullu allat ilaasut peqatigalugit naalakkersuisoqarfiup suliffeqarfittut suliaqartarnermut, siumukarnermut ineriartornermullu tunngatillugu qulakkeerinnittussaalluni.
Suliassat ilaatigut makkuussapput:
- Immikkoortortami ulluinnarni aqutsineq
- Peqqinnissamut tunngasut pillugit Peqqissutsimut Naalakkersuisumut siunnersuineq aqqutissiunerlu
- Immikkoortortami suliassat agguataarnerat pingaarnersiuinerlu
- Allorfimmut aamma Peqqinnissaqarfimmut politikkikkut siunertat suliarineqarnissaanik qulakkeerinninneq
- Piffissaliussat killingi anguniakkallu pilersaarutaareersunik qulakkeerinninneq
- Immikkoortortaqarfimmut aningaasanut missingersuutit akisussaaffigineri
Piginnaasaqarnerit
Naatsorsuutigaarput ingerlaqiffiusumik ilinniagaqarsimanissat, pisortatullu ilinniagaqaqqissimanissat. Taamatuttaaq naatsorsuutigaarput, politikkikkut aaqqissuussinermi imaluunniit pisortaqarfinni suleriaatsimik misilittagaqarsimanissat.
Tamatuma saniatigut naatsorsuutigaarput inuiaqatigiinni pissutsinik annertuumik ilisimasaqassasutit, tamatumani ilaasinnaapput peqqinnissakkut aamma politikkikkut ilisimasat.
Peqqissutsimut tunngassutillit soqutigisaqaqatigiit siammasissut suleqatigineqassammata attaveqarniarnikkut annertuumik piginnaasaqassasutit naatsorsuutigaarputtaaq, taamatuttaaq siornatigut aqutsisutut suliffigisimasavit pitsaasumik, suleqatiginnissinnaanermik takussaasunillu inerneqarsimaneranik, uppernarsarneqarsinnaassapput.
Taakku saniatigut makku naatsorsuutigaavut:
- Kalaallit Nunaanni pissutsinik ilisimasaqarnissat
- Ajornanngippat pingasunik oqaaseqartoq – kalaallisut, qallunaatut tuluttullu
- Oqaluttariarsornikkut allaffissornikkullu attaveqatigiinnermut ilisimasaqarluarnissaq
- Ataqatigiissaarilluarsinnaanissaq, aammalu faginut arlalinnut aammalu inuiaqatigiit arlalinnut suleqateqarnissamut soqutiginnittoq misilittagaqartorlu
- Aaqqiissutissanik siunnerfeqarlutit sulisinnaasutit
- Aaqqissuulluagaasumik suliaqarsinnaasutit, peqqissaartuusutit aammalu pitsaassusermik ilisimaarinnittuusutit aammalu suliassat piffissarititaanik eqqortitsilluarsinnaallutit
- Ulluinnarni suliffimmi ulapaarfiusuni suliassanik allanngorartunik suliaqarluarsinnaasutit
- Politikkikkut eqeersimaarfiusumi suliassanik allanngorarfiusinnaasumik ulapaarfimmilu sulilluarsinnaallutit
Neqeroorutigaarput atorfik pissanganartoq namminersortorlu sammisami angisuumi, pissanganartumi unammillernartumilu. Ularpaarfiusumik pitsaasunik suleqateqarluni pisortatigoortuunngitsumillu oqaloqatigiiffiusinnaasumik suliffeqarpugut. Suliffiuvugut soqutiginartunik ilinniakkatigullu unammillernartulik, tassani suleqatigiissinnaaneq ilinniakkatigullu inuussutissarsiorpalaartumik sulineq annertuumik pingaartinneqarluni. Ukiuni aggersuni peqqinnissaqarfik annertuumik allannguuteqarumaarpoq. Taamaattumillu naatsorsuutigissavat atorfiup imarisaa ataavartumik allannguuteqarnissaa.
Sukumiinerusumik paasisaqarusuppit?
Atorfik pillugu paasissutissat sukumiinerusut Naalakkersuisoqarfimmi Pisortamut Nike Berthelsen-imut saaffiginnilluni pissarsiarineqarsinnaapput, oqarasuaammut +299 346690 imaluunniit email: nike@nanoq.gl
Kingusinnerpaamik qinnuteqarfissaq
Qinnuteqaat CV-imik aamma soraarummeersimanermut uppernarsaatit assilinerinik ilanngussalik link ataaniittoq aqqutigalugu kingusinnerpaamik 9. aggusti 2024 nassiunneqassaaq.
Akissarsiat atorfeqartitaanermilu atugassarititaasut:
Atorfik akissaateqarfimmi LR 38-mi maanna inissisimavoq.
Aningaasarsiat aalajangersimasunik aningaasarsianut ilallit LR 38-mi 1. April 2022-miit qaammammut 56.910,- koruuniupput ukiumullu 682.930,- koruuniullutik.
Aallaaviatigut isumaqatigiissutini atugassarititaasut naapertorlugit atorfinitsitsisoqassaaq, qinnuteqartoq tjenestemandi-tut atorfeqareersimaguni Nunatsinni pisortani tjenestemandit pillugit inatsisit malillugit tjenestemandinut atugassariti-taasut naapertorlugit atorfinitsinneqarsinnaavoq.
Atorfimmut atuuttoq tassaavoq, piffissap suliffiusussap qanoq sivisutiginissaa killilersugaanngimmat, aammalu qaangiuttoornermi ajunngitsorsiassat akilerneqarnissaat ullullu sulinngiffissat annaaneqartut ajunngitsorsiassarsissutiginissaat atorneqarsinnaanngillat.
Piffissap suliffiusussap sivisussusissaa aallaavittut sapaatip akunneranut nalunaaquttap akunnerinik 40-nik sivisussuseqarpoq.
Akissarsianut atorfeqartitaanermullu tunngasutigut piumasaqaatit, taakkununnga ilanngullugit atorfinikkiartorluni soraarlunilu angalanermut aamma pequtit nassiunneqarnerinut akiliunneqarsinnaatitaaneq, Namminersorlutik Oqartussat aamma pineqartup kattuffiata isumaqatigiinniarsinnaatitaasup akornanni isumaqatigiissutit piffissami atorfiniffiusumi atuuttut naapertorlugit pissapput.
Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.
Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq
Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.
Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.
Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.
Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job