Socialrådgiver Meeqqat angerlarsimaffiat Sarliaq pissarsiorpoq

Sulilerfissaq: 1. oktober 2026 imaluunniit isumaqatigiissuteqarnikkut.

Meeqqat inissinneqarsimasut pillugit sullissinissarnik nuannarisaqarpit?

Meeqqanut inuusuttunullu inissinneqarsimasunut sulinermik nuannarisaqaruit, allanngueqataarusullutillu, taava illit pisariaqartippatsigit.

Meeqqat angerlarsimaffiat pillugu; 

Meeqqat Angerlarsimaffiat Sarliaq tassaavoq meeqqat inuusuttullu inissinneqarsimasut angerlarsimaffiat, Ilulissaniittoq. Katillugit 20-nut inissalimmik, 0–18-inillu ukiulinnut immikkoortunut pingasunut agguagaavoq. Meeqqat inissinneqarsimasut Kalaallit Nunaata immikkoortuini assigiinngitsuneersuupput, ilaallu isumassorneqannginnermik imaluunniit atornerluisoqarsimaneranik sunnerneqarsimasuullutik.

Sarliaq-mi attaveqatigiinnermik tunngaveqartumik perorsaanermik, meeqqanik inuusuttunillu ataqqinnittumik akuersaarinnittumillu isiginnittumik, aaqqissuussaasumillu sulivugut. Meeqqat inuusuttullu ulluinnarni toqqissisimanartumik aalajangersimasumillu inuuneqarnissaat, atuarnerat, sunngiffimmi soqutigisaat kiisalu suliffeqarfiup avataani inooqataanerat pingaartipparput.

Sapaatip akunnerata naanerani aamma feeriarnermi meeqqanut pitsaasunik misigisaqartitsiniartarpugut, ilaatigut Sarliap Oqaatsup iluani angalanikkut, sisorarnikkut kiisalu illoqarfimmi aaqqissuussanut assigiinngitsunut peqataatitsisarnikkut.

Socialrådgiveritut suliassatit tassaassapput:

• Meeqqat inuusuttullu pillugit suliat ineriartornerallu malinnaaffigalugit.

• Katsorsaanissamut pilersaarutit, iliuusissatut pilersaarutit aamma nalunaarusiat suliaralugit malinnaaffigalugu.

• Allagaatinik uppernarsaatinik qulakkeerinninneq, sulisullu peqatigalugit malinnaaffiginninneq.

• Kommunimi sagsbehandlerinik ingerlaavartumik attaveqarlunilu suleqatigiinneq.

• Kommunimik, atuarfinnik, peqqinnissaqarfimmik allallu suleqatigisariaqartunik ataatsimiinnerni peqataaneq.

• Meeqqap/inuusuttup, ilaqutaasa kiisalu meeqqeriviup akornanni suleqatigiinnermik tapersersuineq.

• Meeqqap/inuusuttup pisinnaatitaaffiisa pisariaqartitaasalu tusarneqarlutillu peqataatinneqarnissaat qulakkeerlugu.

• Meeqqamut ataasiakkaamut isumaqatigiissutit, suliniutit anguniakkallu malinnaaffiginerat.

• Suliamut tunngasunik naliliinernik innersuussutinillu suliaqarnermut peqataaneq.

• Meeqqat inuusuttullu pisariaqartitaat pillugit sulisunut socialfagligimik siunnersuineq.

• Attaveqatigiinnermi ataatsimiinnernik, killiffissiuilluni ataatsimiinnernik kiisalu ataatsimiinnernik allanik pilersaarusiorneq.

• Meeqqat pillugit sulianik assigiinngitsunik suliaqartartut akornanni suleqatigiinneq pitsaasoq qulakkeerlugu.

• Meeqqat angerlarsimaffiata suleriaasiisa sulinerullu pitsaassusaata ineriartortinneqarneranut peqataaneq.

Illit pillutit ujartorparput

• Socialrådgiveritut ilinniarsimasuusutit imaluunniit ilinniagaq socialfagligimik naleqartoq pigigit.

• Meeqqanik inuusuttunillu immikkut pisariaqartitsisunik misilittagaqartutit.

• Socialfagligimik oqartussaasutut suliaqarnermik kiisalu inatsisinik attuumassuteqartunik ilisimasaqartutit.

• Aaqqissuussaasumik namminersorlutillu sulisinnaasutit.

• Allakkatigut dokumentationimik suliaqarsinnaallutillu suliamut tunngasunik saqqummiussisinnaasutit.

• Suleqatiginnilluarsinnaasutit, meeqqanut, inuusuttunut, ilaquttanut kiisalu suleqatinut allanut pitsaasumik attaveqarnermik pilersitsisinnaasutit.

• Suliani ajornakusoortuni ataatsimut isiginnissinnaasutit.

• Isumassuisuusutit, erseqqissuusutit kiisalu suliamut tunngatillugu pimoorussisartutit.

• Akuersaarinnittumik attaveqatigiinnermillu tunngaveqartumik suleriaaseqarsinnaasutit.

• Meeqqat Angerlarsimaffiata Sarliaq sulinerata pitsaassusaanik ineriartortitseqataanissamik kissaateqartutit.

Neqeroorutigaarput

• Suliffik pissanganartoq isumaqarluartorlu, meeqqat inuusuttullu atugarissaarnerat qitiutillugu.

• Perorsaasunik aqutsisunillu qanimut suleqatigiinneq.

• Socialfagligimik suliniutinik ineriartortitsinissamut nukittorsaanissamullu periarfissaq.

• Ullut suliffiusut suliassanik assigiinngitsunik fagligimillu unammillernartunik imallit.

• Ilinniartitaanikkut ineriartortitsinissamut siunnersorneqarnissamullu periarfissat.

• Suliffik suleqatigiinneq, ataqqinninneq akisussaassuserlu pingaartinneqartut.

• Suliffiup sivisussusaa: Sapaatip akunneranut 40 tiimit.

Akissarsiat atorfinitsitaanermilu atugassarititaasut

Akissarsiat atorfinitsitaanermilu atugassarititaasut, ilanngullugit sulilernerup nalaani angalanissamut aamma suliffimmit soraarnermi angalanissamut pisinnaatitaaffik kiisalu pigisat nuunnissaannut pisinnaatitaaffik, atorfininnerup nalaani Kalaallit Nunaanni Namminersorlutik Oqartussat aamma kattuffiup pineqartup isumaqatiginninniarsinnaatitaasup akornanni isumaqatigiissut/overenskomst atuuttoq naapertorlugu pissapput.

Inissaq

Atorfimmut atatillugu malittarisassat atuuttut naapertorlugit inissiamik sulisut inaannik, peqanngitsumik, innersuussisoqarsinnaavoq.

Inissiamik sulisunut atugassarititaasumik imaluunniit kommunimit imaluunniit Kalaallit Nunaanni Namminersorlutik Oqartussanit pigineqartumik allamik ineqareersimasunut inissiamik innersuussisoqarsinnaanngilaq.

Inissiamut akiliut aamma qularnaveeqqusiissut inissiamut innersuunneqartumut malittarisassat atuuttut naapertorlugit akilerneqassapput.

Inissiaq atorfinitsitaanermut attuumassuteqarpoq, taamaattumik atorfeqarnerup naanerani inissiaq qimanneqassaaq.

Inissiamut akiliut aamma inissiap pitsaassusaa assigiinngissinnaavoq, inissiap pisoqaanera, piginnittua il.il. apeqqutaallutik.

Inissiamik sulisunut atugassamik ataavartumik innersuussisoqarnissaa utaqqineqarsinnaavoq. Taamaattumik utaqqiisaasumik inissinneqartoqarsinnaavoq, ilaatigut ineqatigiiffinnut mikisunut imaluunniit hotellejlighed-inut, tamakkulu akileraaruserneqarsinnaapput.

Inissiani sulisunut atugassani imaluunniit utaqqiisaasumik inissiani uumasuutigisat angisuut, soorlu qimmit aamma qitsuit, tigummineqarsinnaanngillat.

Paasissutissat / attaveqarfik

Apeqqutissaqaruit attavigisinnaavatit:

Fung. forstander Sofie Jensen 

Fung. souschef Ane Karen Fly

Oqarasuaat: 943361

Qinnuteqarnissamut killiliussaq:

15. september 2026

Qinnuteqaat, CV, ilinniarsimanermut aamma pikkorissarsimanermut uppernarsaatit kiisalu allagaatit allat attuumassuteqartut nassiunneqassapput ”Send ansøgning” toorlugu.

E-mailikkut qinnuteqaatit tiguneqassanngillat.