Socialstyrelsen AC-fuldmægtig-imik, Special- imaluunniit Chefkonsulent-imik, Sagsbehandlerinut Siunnersuisarnermi Immikkoortortami atorfinitsitsiniarpoq

Suliffeqarfimmi meeqqanut inuusuttunullu ilaqutaannullu kiisalu inuit innarluutillit pillugit ilisimasanik suliniutinillu nukittorsaaniarluni sulinermi, suliatigut akisussaaffimmik tigusisinnaanermut piareersimavit?

Suliassaqarfik
Sagsbehandlerinut Siunnersuisarnermi Immikkoortortaq assigiinngitsunik suliatigut suleqatigiinnik imaqarpoq. Taakku kommunit meeqqanut inuusuttunullu, innarluutilinnut kiisalu ilaqutariinnut paarsisartunut tunngasunik suliassanik ingerlatsineranni tapersersuisarput.

Aammattaaq ilaqutariit siunersioqatigiinnerannik suliaqarnermik tapersersuisarpugut, kiisalu ilaqutariinnut paarsisartunut pikkorissartitsisarluta. 

Illit inissisimanissat
Immikkoortortami pingaarutilimmik inissisimassaatit, ullut tamaasa suliatigut immikkoortut sulinerannik ingerlatseqqissaarinermik, ineriartortitsinermik ataqatigiissaarinermillu akisussaassallutit. Aamma immikkoortortap iluani suliatigut assigiinngissutsit akimorlugit suleqatigiinnermik ataqatigiissaarinermik kiisalu immikkoortortami pisortaq suleqatigalugu attaveqaataassaatit.

Immikkoortortaq tamakkerlugu suliatigut akisussaaffimmik tigusisinnaassasutit naatsorsuutigaarput, kisiannili suliassaqarfinni tamani immikkut ilisimasartuusimasariaqanngilatit. Paarlattuanilli suleqatitta pikkorissut suliatigut sulineranni siulersuinissat naatsorsuutigaarput. Tamanna ilaatigut isumaqarpoq, immikkoortortami suleqatigiinnik suliassanik agguaassinermi, pingaarnersiuinermi malitseqartitsinermilu tapersersuinissat, kiisalu suliassanik naammassinninniarnermi siunnersortitut oqaloqatiginnittartutut inissisimanissat.

Immikkoortortap suliassaqarfiinik tamakkiisumik takunnissinnaallutit ilisimasaqarnitillu tunngavigalugit immikkoortortami pisortamut pingaarutilimmik siunnersortitut suleqataassaatit. Aamma immikkoortortami pisortaq periusissiornikkut aalajangiinissamik pisariaqartitsigaangat, isumaqatiginnittarnermik kisiannili aamma apeqqusiisinnaanermik – tassa med- og modspil – tapersersussavat.

Suliassat ilaatigut tassaassapput

• Immikkoortortami sulinerup ataqatigiissaarinera ineriartortinneralu.

• Immikkoortortami suliassanik tamakkiisumik takunnissinnaaneq kiisalu suliassanik nutaanik agguaassineq.

• Suliassanik aqutsineq, suliassanik naammassinninniarneq pillugu suleqatit siunnersortarlugit kiisalu suliniutinik suliassanillu ineriartortitsineq, ilaatigut pikkorissartitsinernut ilitsersuutinillu atortussiornermut atatillugu.

• Suliniutinik nassuiaasersuineq aamma suliassanik agguataarineq (arbejdspakker).

• Suliniutinik angisuunik mikisunillu aqutsineq, ilaatigut digitaliusunik online-løsninginillu amerlanerusunik atorluni sulinerup ineriartortinneqarnera, soorlu e-læring aamma webinarit.

• Suliniutit ingerlanerat siuarsarlugu tapersersornissaa.

• Kommunit ESDH-systemiisa suliatigut tapersersorneqarnissaat pillugu suliap ingerlaannarnissaa, tassanilu immikkoortortaq ineriartortitsinermut atuutilersitsinermullu tapersersuisassaaq.

• Avataani suleqatigisartakkanik, pingaartumik kommuninik, suleqatigiinneq. Kommunit pisariaqartitaat aallaavigalugit sulinerput ingerlaavartumik naleqqussartarnissaa pingaaruteqarpoq.

• Immikkoortortami pisortap tapersersornera siunnersorneralu.

• Nalunaarsuutinik, planorama-nik, apeqqutinik immersugassanik kiisalu kisitsisinik, ilaatigut nalilersuinernut saaffiginnissutinillu naatsorsuinernut atatillugu, suliaqarnermi.

• Allakkatigut suliassat, soorlu allakkiat, ataatsimiinnermi imaqarniliat aamma paasissutissiissutit.

• Allaffissornikkut aamma AD-HOC-ikkut suliassat, soorlu workshop-inik seminar-inillu aaqqissuussinermut atatillugu.

• Sulisunut kiisalu peqataasunut allanut angalanernik unnuinernillu inniminniineq.

Ujartugarput
Ukiuni arlalinni misilittagaqartuuvutit, immaqa maannakkut Special- imaluunniit Chefkonsulent-itut atorfeqareersimallutit. Immaqalu misilittagaqarputit suliniutinik aqutsisutut, ineriartortitsinermut siunnersortitut assigisaattulluunniit – pingaartumik isumaginninnermut tunngasunik, politikkikkut aqunneqartumi sulianik misilittagaqaruit iluaqutaassaaq.

Ataqatigiissaarillaqqissuuvutit suliniutinillu aqutsillaqqissuullutit. Suliassat amerlasuut ataatsikkut ingerlanneqartut aqussinnaavatit, allannguutinullu naleqqussarsinnaallutit. Akisussaaffimmik tigusinissamik kiisalu suliniutit suliassallu naammassineqarnissaannik qulakkeerinissamik piumassuseqarputit.

Suleqatinnut, pisortannut kiisalu avataani suleqatigisartakkanut pitsaasumik tatiginnilersitsisumillu siunnersortitut suleqatitut inissisimasinnaavutit.

Piukkunnaatilittut qinnuteqartoq

• Atqaqatigiissaarisutut suliassanillu aqutsisutut misilittagaqarpoq.

• Suliniutinik aqutsinermik misilittagaqarpoq, ilaatigut peqataasunik suleqatigisartakkanillu arlalinnik peqataaffigineqartunik.

• Suliniutip immikkoortuini tamani suliaqarsinnaavoq, ineriartortitsinermi nassuiaasersuinermiit nalilersuinermut.

• Suliassanik ataqatigiissaarinermik agguaassinermillu misilittagaqarpoq, assersuutigalugu suliatigut aqutsisutut inissisimanermi.

• Isumaginninnermut suliassaqarfimmi misilittagaqarpoq kiisalu suliatigut immikkoortut assigiinngitsut akimorlugit sulisinnaavoq.

• Politikkikkut aqunneqartumi sulinermi misilittagaqarpoq, ilaatigut saqqummiussassanik aamma tusarniaanermi akissutinik suliaqarnermik.

• Suliatigut misissueqqissaarnerusinnaavoq periusissiornikkullu eqqarsarsinnaalluni.

• Aqutsinermut tapersersuinermik siunnersuinermillu misilittagaqarpoq.

• Allaffissornikkut pikkorippoq allattariarsornikkullu ersarissumik pitsaasumillu allassinnaalluni, suliassat mikisut angisuullu eqqarsaatigalugit.

• IT-mut pikkorissuuvoq digitaliusunillu aaqqiissutinik systeminillu atuisarnissamut soqutiginnilluni.

• SurveyXact-imik kiisalu kisitsisinik annikitsunik suliaqarnermik misilittagaqarpoq.

• Ilinniagaqarnini qaffasissumik naammassisimavaa, soorlu cand.soc., cand.mag., cand.pæd. assigisaalluunniit.

Immikkoortortarput pingaartumik kalaallisut oqaasilimmik ingerlatsiviuvoq. Taamaattumik kalaallisut attaveqarsinnaanissat iluaqutaassaaq. Taamaattorli marlunnik oqaaseqartumik sulinermik misilittagaqarpugut, immitsinnullu ataqqilluta suleqatigiittarluta, taamaattumik kalaallisut pikkorissuunissaq piumasaqaataanngilaq.

Neqeroorutigaarput
Suliffik isumaqartoq, tassani immikkoortortami ineriartortitsinermi ingerlatsinermilu pingaarutilimmik inissisimassallutit. Immikkoortortatta kommunit tamaasa tapersersormagit, periarfissaqassaatit nunatsinni tamarmi meeqqat, inuusuttullu eqqugaasut ilaqutaallu kiisalu inuit innarluutillit kommuninit neqeroorfigineqartartunut sullissinerup pitsaassusaanut sunniuteqarnissamut.

Atorfik annertuunik akisussaaffeqartitsisoq, taamaalillutit politikkikkut kommuninillu naatsorsuutigineqartunut immikkoortortatta naammassinnissinnaanissaanut pingaarutilimmik inissisimassallutit.

Suleqatit pikkorissut suliassaqarfinni assigiinngitsuni misilittagaqarluartut, praktikkimi misilittagaqarluartut. Immikkoortortami aamma ataatsimoorluta illarsinnaanermik nuannarisaqarluarpugut.

Meeqqat inuusuttullu pillugit immikkoortortaqarfiit sisamat – Meeqqat inuusuttullu, Innarluutillit, Paarsisartut ilaqutariit kiisalu Ilaqutariit siunersioqatigiinnerat – saniatigut immikkoortortami suliniutinik aqutsisut marluk, inatsisilerituu kiisalu immikkoortortami pisortaq aamma ilaapput.

Isumaginninnermik Aqutsisoqarfik
Isumaginninnermut Aqutsisoqarfik immikkoortortaqarfinnut tallimanut agguataagaavoq: Pitsaaliuinermut Immikkoortortaqarfik Paarisa, Ulloq Unnuarlu Inissitsiterinermullu Immikkoortortaqarfik, Sullissisunut Siunnersuisarfik, Aningaasaqarnermut immikkoortortaqarfik, Allattoqarfillu. Atorfik Sullissisunik Siunnersuisarfimmi Immikkoortoqarfimmi inissisimavoq, assigiinngittukkaanik suleqatigiittoqarpoq, kommunini  meeqqanut inuusuttuaqqanullu susassaqarfinnut attuumassutillit  kiisalu ilaqutariittut paarsisartut sullissisut tapersersortai. Tamatuma avataatigut Meeqqanut aamma Ilaqutariinnut Sullissiviit, Ilaqutariit Illui tapersersortarpagut, aamma ilaqutariinni aqqutissioqatigiitsitinermi ilinniartitsisarpugut, kiisalu ilaqutariit paarsisartunut pikkorissaasarluta.

Atorfinitsinneqarnissamut ullua

1. november 2026 imaluunniit isumaqatigiissuteqarnikkut.

Qinnuteqarnissamut killissarititaq: 30. september 2026

Atorfinitsitsinissamut oqaloqatiginninnerit tamatuma kingorna ingerlaannaq ingerlanneqarnissaat naatsorsuutigineqarpoq.

Akissarsiat atorfinitsitaanermilu atugassarititaasut
Akissarsiat atorfinitsitaanermilu atugassarititaasut, ilanngullugit atorfininnermut soraarnermullu atatillugu angalanissamut kiisalu pigisanik nuussinissamut pisinnaatitaaffiit, Kalaallit Nunaanni Namminersorlutik Oqartussat aamma kattuffiup pineqartup isumaqatiginninniarsinnaatitaasup akornanni isumaqatigiissut/overenskomst atorfinitsinneqarnermi atuuttoq naapertorlugu aalajangersarneqassapput.

Inissiaq
Sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa.

Paasissutissat amerlanerusut
Atorfik pillugu paasisaqarnerorusukkuit, immikkoortortami pisortaq Mia Nielsen oqarasuaammut +299 272505 imaluunniit e-mailikkut mine@nanoq.gl attavigisinnaavat.

Qinnuteqaat, CV, ilinniarsimanermut aamma pikkorissarsimanermut uppernarsaatit kiisalu allagaatit allat attuumassuteqartut “Send ansøgning” toorlugu nassiunneqassapput.

Qinnuteqaatit e-mailikkut tigusassaanngillat.