Styrmandimik ujarlerpugut Kalaallit Nunaanni Aalisarnermut Piniarnermullu Nakkutilliisoqarfimmut (GFJK) Nanoq IV
Nakkutilliinermi angallammut Nanoq IV-mut sulissarpassuarnut unamminartunut piginnaasaqarluartumik sullisserusuttumillu aquttumik pissarsiorpugut. Nakkutilliinermi angallat atorfiup inissisimaffigisaani sisamanik immikkoortortaqarpoq sisamanik sulisulik. Nakkutilliinermi angallat Nanoq IV-mi sinerissap qanittuani imartami
kangerlunnilu nakkutilliinermik pilersaarusiornermi ingerlatsinermilu nunap immikkoortuini immikkoortortaqarfiit qanimut suleqatigineqarput.
Piginnaaneqarfigissavatit:
• Sinerissami aquttutut (kystskipper) allagartaqarlutit misilittagaqarlutillu
• Sulianut atatillugu aqutsisinnaaneq, ilisimasaqarluanerlu.
• Oqartussaassuseqarlutit namminersorsinnaallutillu sulinissaq
• Ulapiffiusumi ajornartoorfiusumilu sulianik malinnaasinnaaneq aqutsisinnaanerlu
• Aalisarnermut nalunngisaqarneq suleqatigisanullu avataaniittunik attaviginnilluarsinnaaneq
• Isumannaallisaanermut ilisimasaqarluarneq pissutsinullu malinnaaneq, suleqatikkuminartuunerlu
• Allakkatigut oqaatsikkullu attaveqarnermi paasinarsarluarsinnaaneq, kalaallisut, qallunaatut tuluttullu
Suliassatit pingaarnerit tassaassapput:
nakkutilliinermi angallammik ingerlatsineq
aquttarfimmi pigaartuuneq
umiarsuarmi assistentinik ilinniartitsineq
angallatinut ikisarluni, nalunaarsuisarluni allaffissorlunilu immami aalisarnermik piniarnermillu nakkutilliineq
ISM – tassunga ilanngullugu isumannaallisaanermi atortunik misissuisarneq aserfallatsaaliuinerlu
Napparsimasunik passussineq
Piffissaq suliffik anngallorassaaq, qaammammullu siumut suliarineqartartoq malillugu sulisussatullu pilersaarut malillugu sulisoqartarluni.
Illit pillutit
Aamma sullisserususseqarneq, ikiuukkusunneq ulluinnarnilu nuannaartuuneq pingaartippagut. Aaqqissuussamik sulisinnaassaatit, suliassallu pitsaassusilimmik piffissarlu eqqorlugu naammassisarlugit. Pisariaqartillugu immikkut suliaqarusussinnaanerit aamma pingaartipparput.
Aquttutut aalisarnermik nakkutilliinermi sanileralutit ilinniartinneqarnissat piareersimaffigissavat.
Aalisarsinnaanermut Piniarnermullu Nakkutilliisoqarfiup soqutiginnittut tamaasa qanoq tunuliaquteqarneq apeqqutaatinnagu atorfimmut qinnuteqarnissaannik kaammattorpai.
Qinnuteqarnissamut piffissaliussaq : 15-01-2025
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.
Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.
Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.