Tarnip pissusaanik immikkut ilisimasalimmik suleqatissarsiorpugut
Kommuneqarfik Sermersooq / Meeqqanut Atuarfeqarnermullu Ingerlatsivik / Meeqqanik Inuusuttunillu Siunnersuisarfik - MISI
MISI Sermersuumut PPR tarnip pissusaanik immikkut ilisimasalik
Immikkoortortatsinnut ingerlalluartumut "Meeqqanik inuusuttunillu siunnersuisarfik" ulluinnarni MISI-mik taaneqartartumut tarnip pissusaanik immikkut ilisimasalimmik suleqatissarsiorpugut.
MISI Kommuneqarfik Sermersuumi Meeqqanut Atuarfeqarnermullu Ingerlatsivimmut ilaavoq. Meeqqanut Atuarfeqarnermullu Ingerlatsiviup anguniarpaa Kommuneqarfik Sermersuumi meeqqat tamarmik imaqarluartumik inuuneqarnissamut tunngavissamik pilersitsisinnaanissaannut ilinniartinneqarnerisigut, ineriartortinneqarnerisigut atugarissaartinneqarnerisigullu pitsaanerpaamik sinaakkusersuinissaq. Kalaallit Nunaanni meeqqanut tamanut inissaqartitsisunik meeqqallu innuttaasutut alapernaatsutut, tatituutut, peqqissutut, nuannaartutut nammineersinnaasutullu ineriartorsinnaanissaannut atugassaqartitsiffiusumik pitsaanerpaamik attassisinnaalluartunik meeqqeriveqarusuppugut atuarfeqarusullutalu.
MISI-mi Tarnip pissusaanik immikkut ilisimasalittut suliassatit pingaarnerit tassaapput, meeqqat inuusuttullu ilinniarnerat, ineriartornerat atugarissaarnerallu pitsanngorsarnissaat, pingaartumik meeqqat avatangiisiisa meeqqanut periuserisartagaannik tapersersuinikkut. MISI-mi ataatsimut isiginninneq tunngavigalugu sulisarpugut, ima paasillugu, MISI-mit meeraq, ilinniartitsisut/perorsaasut, inooqataanikkut ataatsimooqatigiiffiit aamma ilikkagassanut tunngasut imminnut ataqatigiissutut isigineqartarput. Tamanna isumaqarpoq, illit tarnip pissusaanik immikkut ilisimasalittut inersimasut meeraq pillugu unammillernartut misigisaannik siunnersuissasutit, ilitsersuissasutit siunersioqatigissagitillu.
Akisussaaffeqarfiit:
∙Suliassat qanoq ingerlanneqarnissaannut siunnersuisarpugut aamma atuarfinni meeqqerivinnilu perorsaanermik sulialinnik siunersioqateqartarpugut
∙Angajoqqaanik siunnersuineq
∙Meeqqap avatangiisai suleqatigalugit meeqqap ineriartornissaa, atugarissaarnissaa ilinniarnissaalu siuarsarniarlugit suliniuteqarnerit pillugu suleqataaneq
∙Perorsaanermut aamma tarnip pissusiinut tunngasunik nalilersuinernik suliaqarneq
∙Meeqqat immikkut atuartinneqartut imaluunniit immikkut perorsaanermik ikiorserneqartartut ukiumoortumik naliliiffigineqarnerannik suliaqarneq
∙MISI-mi atorfillit allat peqatigalugit ilinniagaq aallaavigalugu inerisaaneq aaqqissuussaanikkullu ineriartortitseqataaneq
∙Siunnersuinermut pisortaq, ilinnut pisortatut qaninnerusoq isumaqatigiissuteqarfigalugu suliassanik allanik suliaqarneq
Ilinnut tunngasut
Matuma ataani allassimasut amerlanersaat ilinnit naatsorsuutigaavut:
∙Tarnip pissusaanik immikkut ilisimasalittut ilinniarsimasuuvutit Cand.psych imaluunniit Cand.pæd.psych-itut taaguuteqarlutit.
∙PPR-mik suliassat kiisalu meeqqanik ulluunerani neqeroorutiniittunik aamma atuarfimmiittunik sulianut tunngasut soqutigisaraatit
∙Ilinniartitsisunik, perorsaasunik aamma angajoqqaanik siunnersuinermik ilitsersuinermillu suliaqarnissaq kajumissuseqarfigaat, suliamik ingerlatsisut piginnaanngorsarnerannik suliaqarnissaq piareersimaffigaat ilaatigut saqqummiussinerit, supervision imaluunniit sulisut suliamut tunngasunik siunnersornerannik
∙Suliassat namminersorlutit ingerlassinnaavatit aamma illit nammineq sulinissat pilersaarusiorsinnaavat, saniatigut suliassaqarfinnik suleqatigisanillu assigiinngitsunik arlalinnik ingerlatsisut suleqatigineranni nalerisimasuuvutit
∙Avammut sammisuuvutit ilakkuminartuullutit aamma uagutsinnut saaffiginnissuteqartut pitsaanerpaamik sullinneqarnissaat killiffigisaannilu naapinnissaat tamatigut pingaartitaraat
∙Ulluinnarni ulapaarfiusuni suleqateqarsinnaasuuseqarputit suliassanullu suliarineqarasuartussanut eqaassuseqarputit
∙Kalaallit Nunaanni inuiaqatigiinni pissutsinik ilisimasaqarneq aamma kalaallisut oqalussinnaaneq iluaqutaassaqaaq, piumasaqaataananili
Uagut pilluta
MTU-mi kingullermi upernaakkut 2024-mi suliarineqartumi, misissuinermi erserpoq sulinermi nuannaarneq, tunniusimaneq, suleqatigiinneq aamma suliat imarisaat uagutsinni qaffasissorujussuarmik inissisimasut.
Suliffipput pitsaasuuvoq aalajaatsunik, pikkorissunik, ilakkuminartunik tapersersuisunillu tikilluaqqusisussanik suleqatigeeqarpoq. Suliffimmut pitsaasumik ilitsersuunneqarnissat isumagissavarput, isertikkiartuaarneqarnissannut pitsaasumik pilersaaruteqassaagut. MISI-mi suleqataasutut suleqatigiinnut ilaassaatit suliassaqarfinni assigiinngitsuni tamaniittut tamarmik immikkuullarissunik piginnaanillit ilaattut. Piffissami matumani Siunnersortaaneq 1, Pisortap tullia 1, Allaffimmi sulisoq 1, Oqalunniarnermut tusaaniarnermullu perorsaasoq 1, Meeqqanut Inuusuttunullu siunnersortit 3 aamma tarnip pissusaanik immikkut ilisimasallit 4 immikkoortortami sulisuupput.
Immikkoortortaq Nuummi inissisimavoq, kisianni Kommuneqarfik Sermersooq tamaat sullitaraarput, tassani illoqarfiit nunaqarfiillu ilaallutik, Kalaallit Nunaata Kitaani aamma Tunumi. Suliamut atatillugu angalanerit pisinnaasarput. Atorfik inuttaqanngilaq ulloq 15.09.24 inuttalerneqassaaq.
Neqeroorutigisinnaavarput:
∙Suliffik pissanganartoq tamatigoortorujussuaq, illit suliassanik naammassinninnissat eqqarsaatigalugu Tassunga atasumik illit nammineq suliassannik aaqqissuussinissannut annertuumik sunniuteqarsinnaavutit
∙Suleqatit pikkorissut qanimut suleqatiginissaannut periarfissaavoq, matumani suleqatigiit akunnerminni ilisimasanik misilittakkanillu avitseqatigiittuupput
∙Nalerisimaneq suliassanullu piginnaasat imminnut ataqatigiipput
∙Suliffiup iluani avataanilu ilitsersuisarneq
∙Tarnip pissusiinut tunngasunik siunnersortinut pisortaq
∙Kalaallit Nunaanni illoqarfiit pingaarnersaanni najugaqarnissaq periarfissaavoq, tassanngaanniillu suliamut atatillugu kommunip illoqarfiinut nunaqarfiinullu angalaneq pisarsinnaalluni.
Piffissaq suliffiusussaq sapaatip akunneranut nalunaaquttap akunnerinik 40-nik sivisussuseqarpoq.
Pineqaatissinneqarsimannginnermut aamma meeqqanut pinerliisimannginnermut uppernarsaat:
Atorfik taanna meeqqanik pinerliisimannginnermut aamma pineqaatissinneqarsimannginnermut uppernarsaammik piumasaqaateqartussaatitaaneq pillugu inatsit naapertorlugu uppernarsaatinik piumasaqaateqarfiuvoq. Inatsit naapertorlugu Kommuni uppernarsaatinik naammaginatutut isigineqartunik pereerpat atorfinninneq aallartinneqarsinnaavoq. Taamaattumik malugeqqussavarput Kommunip uppernarsaatit nammaginartutut isigineqartut, meeqqanik pinerliisimannginnermik uppernarsaat rigspolitiinit, aammalu pineqaatissinneqarsimannginnermut uppernarsaat Politiinit pippagit atorfininnissaq inissinneqassammat.
Meeqqanik pinerliisimannginnermut uppernarsaat Kommunimit aaneqassaaq pineqartumik akuersissuteqarnikkut, pineqaatissinneqarsimannginnermullu uppernarsaat nammineq illoqarfigisami Politeeqarfimmut aaneqassaaq.
Akissaatinut atorfinitsitaanermullu tunngatillugu atugassarititaasut:
Akissarsiaqarnermut atorfinitsitaanermullu atugassarititaasut Namminersorlutik Oqartussani isumaqatigiissut atuuttoq, atorfininnerup nalaani Namminersorlutik Oqartussat kattuffiullu pineqartup isumaqatigiinniarsinnaatitaasup akornanni isumaqatigiissutit atuuttut naapertorlugit.
Atorfinititsineq qaammatini pingasuni misiliutitaqassaaq.
Inissaq:
Atorfininnermut atatillugu inissiamik innersuussisoqarsinnaanngilaq.
Paasissutissat annertunerusut uannga pissarsiarineqarsinnaapput:
Atorfik ilinnut soqutiginaateqarpat atorfik pillugu tassungalu tunngasumik suliassat itinerusumik paasisaqarfigerusukkukkit uunga saaffiginninnissannut tikilluaqqusaavutit: Siunnersortaaneq Laila Skydsbjerg Skytte saaffigineqarsinnaasoq oqa. + 299 36 63 38 imaluunniit e-mail: lass@sermersooq.gl
Qinnuteqaat:
Qinnuteqaat qulequtserlugu Atorfiup ilisarnaataa 796-24-mik, ilinniagaqarsimanermut uppernarsaat siornatigullu sulisimanermut uppernarsaatit qinnuteqaammut ilanngullugit, qinnuteqaateqarnissamut piffissarititaasup qaangiutinnginnerani qinnuteqartoqassaaq.
Imatut qinnuteqaateqassaatit:
Atorfik qinnuteqarfigerusutat takugukku, uagutsinnut qinnuteqaammik nassiutissavat nittartagarput aqqutigalugu. Atorfimmut qinnuteqarfiginiakkannut link-i, atorfimmi inuttassarsiorneqartumi takusinnaavat.
Malugiuk:
Qinnuteqaatit pappilissatigut mailikkulluunniit tiguneq ajorpagut, inussiarnersumik qinnuteqaatit nittartagaq aqqutigalugu nassiuguk.
Qinnuteqarnissamut killissarititaasoq: aggustip 20.-at, 2024