Tasiilaq Katersortarfik Aaqqissuussinermut Akisussaasumik pissarsiorpoq
Tasiilami Katersortarfimmi aaqqissuussinermut akisussaasumik pikkorissumik tunniusimalluartumillu Kommuneqarfik Sermersooq pissarsiorpoq.
Suliassat, soorlu isumassarsianik ineriartortitsineq, pilersaarusiorneq, ataqatigiissaarineq, missingersuusiorneq, pisiniarneq inniminniisarnerlu ilisimasaqarfigilluarpigit? Ulapaarfinnilu uippallernak suliassanik ingerlatsisinnaavit? Attaveqatigiinneq ulluinnarni sulininnut annertuumik ilaassaaq, suliffimmi suliassanik ataqatigiissaarisoqassatillugu aammali innuttaasunik attaveqateqassagaangavit? Taamaappat ujartugarput immaqa illiuvoq.
Suleqatigiit qulit sulipput, taakku timersortarfimmi, sisorarfimmi, katersortarfimmi aamma kommunip allaffiani siunnersorti kiisalu immikkoortortaqarfimmi aqutsisoq ilagilissavaatsit. Aaqqissuussinermut ataqatigiissaarisup katersortarfimmik aqutsineq akisussaaffigissavaattaaq. Atorfik ulloq naallugu suliffiuvoq Tasiilamilu Peqqinnermut Susassaqartitsinermullu immikkoortortami aqutsisoq qullersarissavat.
Atorfiup imarisaa:
Immikkoortortaq aaqqissuussinermut ataqatigiissaarisumik – misilittagalimmik – pissarsiorpoq, suleqatigiinnut piukkunnartunut siuarsaanermik nuannarisaqartunut ilannguttussamik. Suliassat makku ilaatigut isumagineqassapput:
∙ Aaqqissuussinermut ataqatigiissaarineq
∙ Katersortarfimmik ulluinnarni aqutsineq ingerlatsinerlu
∙ Immikkoortortap aaqqissuussaanik ingerlatsineq, tamatumunnga ilaallutik Nuannaffik aaqqissuussallu qaammammoortut
∙ Aaqqissuussassanik pilersaarusiorneq
∙ Illup iluani silamilu susassaqartitsinissanik nutaanik ineriartortitsineq.
∙ Pilersaarusioqataaneq skemalioqataaneq kiisalu katersortarfimmut tunngatillugu naatsorsuusiorneq
∙ Peqqinnermik, susassaqartitsinermik kulturimillu sammisanut tunngatillugu immikkoortortami assigiinngitsutigut suleqatigiinneq siunnersuinerlu
∙ Suliassat takkussuuttut
∙ Suliassat suliarineqassapput immikkoortortami sulisut allat immikkoortortamilu aqutsisoq qanimut suleqatigalugit
Qinnuteqartunut naatsorsuutigisavut:
∙ Susassaqartitsinissanik piareersaasinnaasutit ataqatigiissaarisinnaasutillu
∙ Susassaqartitsinerit ajornaatsumik ingerlanissaat soqutigigit
∙ Katersortarfiup aserfallatsaaliorneqarnissaanut akisussaasuussasutit
∙ Allaffissornikkut suliassanik suliaqarsinnaasutit
∙ Attaveqatigiinnerup tungaatigut piginnaasaqarluartutit
Tamatuma saniatigut pingaartipparput:
· Aalajaatsuusutit aamma torersuunissaq eqqumaffigigit
· Erseqqissumik paatsuugassaanngitsumillu atassuteqartartutit
· Nammineerlutit sulisinnaasutit, akisussaassusermik pingaartitsisutit sullissilluarusussuseqartutillu
· Tatituujusutit aamma pilersitserusussuseqartutit, nukissaqartutit iliuuseqarusussuseqartutillu
· Immikkoortortami suliassat ingerlanneqarnerini ingerlaavartumik ineriartortitseqataasinnaasutit pitsanngorsaaqataasinnaasutillu
· Tamanik suleqateqarnissaq pikkoriffigigit
∙ Marlunnik kalaallisut qallunaatullu oqaaseqartuuguit iluaqutaassaaq, piumasaqaataanngilarli
Neqeroorutigisinnaasavut:
Suliffik unamminartoq, Tasiilami susassaqartitsinerit sunniuteqarfiginissaannut periarfissaqarfiusoq aamma immikkoortortami, pitsaassusermik ineriartortitsinermillu pingaartitsiffiusumi, namminersorlutit annertuumik akisussaaffeqassaatit. Atorfimmut suliffimmullu tunngatillugu aallartisartitsilluarnissaq pingaartipparput aamma suleqatigiilluartoqarnissamik qulakkeerinissaq ilungersuutigaarput, aqutsisut akornanni qanimut immersoqatigiiffiusumik kiisalu aallarnissaanissamut nutaaliornissamullu inissaqartitsiffiusumik.
Pineqaatissinneqarsimannginnermut aamma meeqqanut pinerliisimannginnermut uppernarsaat:
Atorfik taanna meeqqanik pinerliisimannginnermut aamma pineqaatissinneqarsimannginnermut uppernarsaammik piumasaqaateqartussaatitaaneq pillugu inatsit naapertorlugu uppernarsaatinik piumasaqaateqarfiuvoq. Inatsit naapertorlugu Kommuni uppernarsaatinik naammaginatutut isigineqartunik pereerpat atorfinninneq aallartinneqarsinnaavoq. Taamaattumik malugeqqussavarput Kommunip uppernarsaatit nammaginartutut isigineqartut, meeqqanik pinerliisimannginnermik uppernarsaat rigspolitiinit, aammalu pineqaatissinneqarsimannginnermut uppernarsaat Politiinit pippagit atorfininnissaq inissinneqassammat.
Meeqqanik pinerliisimannginnermut uppernarsaat Kommunimit aaneqassaaq pineqartumik akuersissuteqarnikkut, pineqaatissinneqarsimannginnermullu uppernarsaat nammineq illoqarfigisami Politeeqarfimmut aaneqassaaq.
Akissaatinut atorfinitsitaanermullu tunngatillugu atugassarititaasut:
Akissarsiaqarnermut atorfinitsitaanermullu atugassarititaasut Namminersorlutik Oqartussani isumaqatigiissut atuuttoq, atorfininnerup nalaani Namminersorlutik Oqartussat kattuffiullu pineqartup isumaqatigiinniarsinnaatitaasup akornanni isumaqatigiissutit atuuttut naapertorlugit.
Atorfinititsineq qaammatini pingasuni misiliutitaqassaaq.
Inissaq:
Atorfik inissaqartitsivoq, taamaattumik qularnaveeqqummut ineqarnermullu, atuinermut il. il. akiliisoqartassaaq matumani Kalaallit Nunaanni Namminersorlutik Oqartussat kommunillu Kalaallit Nunaanni illuutaannut ineqarnermut akiliuteqartarnermut maleruaqqusat qaqugukkulluunniit atuuttut naapertorlugit akiliisoqartassaaq. Atorfineqqarnermi sulisutut ataavartumik initaarnissamut innersuussisoqarsinnaanngippat, sulisumut utaqqiisaasumik ineqartinneqarsinnaasoq inimik vakantboligmik neqeroorfigineqarsinnaavoq, siuliani taaneqartoq naapertorlugu ineqarnermut, atuinermut il. akiliuteqartoqartassaaq. Ineqarnermut atuinermullu akiliutigineqartartut pillugit annertunerusumik paasisaqarusukkuit www.iserit.gl qimerloorneqarsinnaavoq.
Sulilernissamut piffissaliussaq sulisutut ataavartumik initaarnissamut neqeroortoqarnissaa qaqugukkut pissanersoq apeqqutaajumaarpoq. Inatsisit atuuttut tunngavigalugit sulilernissamut atatillugu angalasoqassappat angalaneq akilerneqassaaq aammalu pisattat tikinnissaannut akiliunneqartussaalluni.
Annertunerusumik paasisaqarusukkuit:
Atorfik ilinnut soqutiginaateqarpat atorfik pillugu tassungalu tunngasumik suliassat itinerusumik paasisaqarfigerusukkukkit uunga saaffiginninnissannut tikilluaqqusaavutit: Gert Ignatiussen, oqarasuaat +299 36 77 99 imaluunniit e-mail: geit@sermersooq.gl
Qinnuteqaat:
Qinnuteqaat qulequtserlugu Atorfiup ilisarnaataa 1010-24-mik, ilinniagaqarsimanermut uppernarsaat siornatigullu sulisimanermut uppernarsaatit qinnuteqaammut ilanngullugit, qinnuteqaateqarnissamut piffissarititaasup qaangiutinnginnerani qinnuteqartoqassaaq.
Imatut qinnuteqaateqassaatit:
Atorfik qinnuteqarfigerusutat takugukku, uagutsinnut qinnuteqaammik nassiutissavat nittartagarput aqqutigalugu. Atorfimmut qinnuteqarfiginiakkannut link-i, atorfimmi inuttassarsiorneqartumi takusinnaavat.
Malugiuk:
Qinnuteqaatit pappilissatigut mailikkulluunniit tiguneq ajorpagut, inussiarnersumik qinnuteqaatit nittartagaq aqqutigalugu nassiuguk.
Qinnuteqarnissamut killissarititaasoq: oktobarip 22.-at, 2024