Timersornermut soqutigisalimmut Timersoqatigiit Kattuffianni (GIF) Kattuffinnut siunnersortissamik atorfimmut inuttarsarsiuivugut

Timersoqatigiit Kattuffiata takorluugarivaa 2030-imi Kalaallit Nunaat nunarsuarmi timimik atuiffiunerpaatut inissisimalernissaa. Timersuutit kattuffii (Specialforbund) qanimut suleqatingalugit suliniutigut inerisaaffiginiarlugit Kattuffinnut sullissinissamik soqutigisalimmut siunnersortimik ujaasivugut.

Timersornermut peqatigiiffiit kattuffiillu akornerminni suleqatigiinnerat qaninnerulersissavat, nunatsinnilu kattuffiit peqatigiiffiillu kattuffeqanngitsut pitsaasumik sinaakkuteqarnissaat ineriartortuarnissaallu suleqataaffigissavat.

Sullitassatit tassaapput timersoqatigiiffinni kajumissutsiminnik suliaqartut kiisalu ulluinnarni timersornerup silarsuaani peqatigiiffilerinikkut kattuffilerinikkullu ingerlatsisut.

Kattuffinnut siunnersortitut suliassat ukuupput:

· Kajumissutsiminnik suliaqartarnermut suliniummik ingerlatsineq ineriartortitsinerlu

· Timersoqatigiit Kattuffiata Kattuffiillu suleqatigiinnissamik isumaqatigiissutaannik ingerlatsineq ataqatigiissaarinerlu

· Kattuffinnut aningaasanik tapiissutinik suliaqarneq ingerlatsinerlu

· Peqatigiiffiit isaaffiat/sammisassat.gl kommunit suleqatingalugit ingerlatsineq inerisaanerlu

· Utoqqaat sulisinnaajunnaarnersiutillillu ataatsimut timersornermi suleqatigiiffiata KNUSTAS-ip suliniutaannut ikortartueqataaneq

· Timersoqatigiit Kattuffiata suliniutaanut ikorfartueqataaneq

Sulianut tunngasutigut piginnaasat

· Ilinniagartooq imaluunniit suliassamut tulluartumik ilinniagaqarsimasoq, nunatsinni pissutsinik ilisimannittoq

· Suliniutinut aqutsisutut ingerlatsinermi misilittagaqartoq, timersornermi kattuffilerinermi, peqatigiiffilerinermi kiisalu allaffissornermut ilisimasaqartoq

· Suliusersuisoqarluni kattuffilerinermi peqatigiiffilerinermilu periarfissanik ujartuisinnaasoq aporfiusinnaasunillu qaagiiniarluni suliniuteqarsinnaasoq

· Aningaassaqarnermut ingerlatsinermut misilittagaqartoq, soorlu aningaasaliissutinut nakkutilliineq, misissuineq aammalu aningaasanut missigersuusiornermut ilisimasaqartoq

· Kalaallisut qallunaatullu allassinnaasoq oqalussinnaasorlu

Inuttut piginnaasat

· Oqaluttariarsornermi allattariarsornermilu piginnaasaqartoq

· Sulianik aallartitsinermik, ingerlatsinermik ataqatigiissaarinermillu piginnaasaqartoq

· Suleqatigiit assigiinngitsut akornanni pitsaasumik suleqatiginnissinnaasoq, akisussaassuseqarnermik pitsaassutsimillu pingaartitsisoq

Paasissutissat

Naatsorsuutingaarput 1. november 2024 imaluunniit immikkut isumaqatigiinnikkut sulilersinnaassasutit. Kattuffinnut siunnersortitut ulloq siulleq aallartinneranit suleqatit allat arfineq pingasut qanimut suleqatigilissavatit.

Timersoqatigiit Kattuffianni Nuummi Issortarfimmut 8 st.tv.-imi allaffeqassaatit, sulianullu atasumik angalasarnissat kiisalu ulluinnarni ualikkut unnukkullu piffiit ilaanni sulisarnissat naatsorsuutigisinnaavat.

Ima atorfimmut qinnuteqaasiussaatit

Kattuffinnut siunnersortitut qinnuteqaat CV ilanngullugu nassiutissavat, ilinniarsimanermut paasissutissat atorfimmullu inuttassarsiuunneqartumut qinnuteqaatit tunngavilersuinikkut allaaseralugu uunga: stilling@gif.gl nassiullugu.

Qinnuteqarfissaq kingulleq: 13. september 2024, kingusinnerpaamik nal. 08:00

Timersoqatigiit Kattuffiannit neqeroorutingaarput

· Suleqatit tunniusimasut, misilittagartuut minnerunngitsumillu suliaminnut pimoorussisut

· Atorfik suleqatit pikkorissut peqatingalugit allannguinissamut periarfissaqartitsisoq

· Suliffeqarfik suleqatigiiusunit ataatsimoorfiusoq

· Suliffeqarfik inuttut ineriartornissamut periarfissaqartitsisoq

· Suliffeqarfik takorlorluugalik angusaqarusuttorlu

Aningaasarsiat atorfininnermullu tunngasut

Atorfik tamakkiisumik atorfiuvoq. Piginnaasat aallaavingalugit akissarsiaqartinneqarlutillu atorfinitsinneqassaatit.

Atorfinitsitsineq qaammatini pingasuni misiliutaaqqaassaaq. Atorfimmut tunngatillugu inissaqartitsisoqanngilaq.

Apeqqutissaqarpit?

Atorfimmut tunngatillugu apeqqutissaqaruit, pisortaq Jonas Jensen, jonas@gif.gl oqarasuaat

+299 348151 / +299 553604 attavigisinnaavat.

Timersoqatigiit Kattuffiat pillugu

Timersoqatigiit Kattuffiat 9.500-nik amerlanerusunik ilaasortaqarpoq nunatsinnilu kattuffiit annerit ilangivaat. Kattuffiit quligiluaasut peqatigiiffiillu kattuffeqanngitsut peqatingalugit nunatsinni timersornermik inerisaanissamik suliaqartuuvugut, 2030-mullu anguniagaqarpugut nunarput nunarsuarmi timimik aalatitsinerpaanngornissaanik. Ulluinnarni meeqqat, inuusuttut, inersimasut, utoqqaat kiisalu innarluutillit timersornissaannut suliaqartuuvugut.

Upperaarput timersorneq timigissarnerlu aqqutingalugit ataatsimoortitsineq, susassareqatigiinneq minnerunngutsimillu peqqinneq inuunermut ilorrisimaartitsisartoq. Itinerusumik Timersoqatigiit Kattuffiat paasisaqarfigerusukkukku nittartagarput www.gif.gl takuuk.