Tusass Aasianni Transmissionimut sullivimmi teknikerissarsiorpoq
Tusassi Aasianni Transmissionimut immikkoortoqarfimmi sullivimmut Teleteknikerimik namminersorsinnaasumik, akisussaassuseqartumik teknikkikkullu piginnaasaqarluartumik pissarsiorpoq, sapinngisamik piaarnerpaamik sulilertussamik.
Nunatsinni atortulersuutit attatiinnarnissaannut pingaartutilimmik suleqataarusuppit? Taamaalillutit sullitatsinnut attaveqarluarnissaq qulakkeerlugu?
Tusassip ineriartortuarneq malinnaavigaa, telemullu tunngatillugu annertusiartuinnartunik piumasaqaateqartoqartarpoq. T&I-mik immikkoortortaqarfik ineriartortitsinermut angusaqarusussusilimmik siunertaqartumillu periusissiorpoq, periusissiarlu suliniutinik arlalinnik naammassinninnissamut piumasaqaateqarpoq. Periusissiaq ingerlanneqalerpat illit atorfissaqartinneqassaatit.
Atorfik pillugu:
Aasianni Transmissionimi sullivimmi pisortaq Teleteknikerillu marluk suleqatigilissavatit. Immikkoortortaqarfiup suliassarai nalunaarasuartaaserivinni kiisalu nuna tamakkerlugu illoqarfinni nunaqarfinnilu, Upernavimmiit Sisimiut tungaanut, telemut teknikkikkut atortunik nutarterineq iluarsaassineq/ajoqutinik aaqqiineq.
Suleqatigilerutsigut suliassatit aqqutigalugit teknikkikkut piginnaasannik ineriartortitsinissannut periarfissaqarluassaatit, ilaatigut:
- Ericsson Longhaul/minilink Radiokædesystemit aamma XMP-1 Multipleximik atortut
- Imaatigut kabelimut atortulersuutit
- Qaammataasamit nunami tigooraaviit
- Radiofoni, DVB-T aallakaatitsissutit, Sinerissami Timmisartuussinermilu radiomut HF-imik VHF-imillu attaveqaqatigiinnermut atortut
- Sanaartugassanut piffissap ilaani peqataasarneq
- Pingaarnertut suliassaavoq Aasiaat radioata ingerlanneqarnissaa.
Sulinermut atatillugu angalasarnissaq naatsorsuutigineqassaaq. Angallanneq amerlanertigut helikopterimik imaluunniit umiarsuarmik attartukkamik ingerlanneqartassaaq.
Illit:
Minnerpaamik Elektronikfagteknikeritut, Elektronikteknologitut imaluunniit assinganik ilinniagaqarsimassaatit imaluunniit teleteknikkimut tunngatillugu atorfeqarsimassaatit imaluunniit tamatumani suliassanik misilittagaqarlutit. Attaveqaqatigiinnermut atortunik ilisimasaqarputit (qaammataasat, imaatigut kabeli, radio, oqarasuaat) taakkualu ataqatigiissusaannik misissuisinnaallutit kiisalu serverit, routerit switchillu pillugit nalinginnaasumik ilisimasaqassallutit. Kalaallisut, qallunaatut tuluttullu allallutillu oqalussinnaassaatit.
Aamma erseqqissarparput illit:
- namminersorlutit sulisinnaassasutit
- akisussaaffimmik tigusisinnaanissat, mianersortartumillu suliassanik naammassinnissinnaanissat
- suleqateqarsinnaassaatit - aamma oqarasuaatikkut
- suliartortarnitit tatiginartuussapput ulluinnarnilu ilaatigut ulapaarfiusumi sulinissat nuannarissavat.
Neqeroorutigaagut:
Suliffik pissanganartoq unammilligassanik ulikkaartoq, immikkoortortaqarfimmilu mikisumi kisiannili ulapaarfiusumi suleqatit misilittagaqaluartut. Aammattaaq suleqatigisat piginnaasaqarluartut suliassaminnut piumassuseqarluartut – oqarasuaatikkut attavigisariaannaat. Kiffaanngissuseqarneq annertooq misigissavat. Sulianut tunngatillugu inuttut ineriartornissamut periarfissaqarluartoqarpoq. Inuttassaq eqqortoq piginnaasat naapertorlugit akissarsiaqartinneqassaaq.
Ilinnoorpa?
Atorfik pillugu apeqqutissaqaruit immikkoortortaqarfimmi pisortaq Mikisuluk Hammeken attavigisinnaavat, oq. +299 389394.
Qinnuteqaatit oqaloqatiginninnerillu
Qinnuteqaatit e-mailikkut tiguneq ajorpagut. Taarsiullugu qinnuteqaatit (allagaq qinnuteqaat, CV aamma allakkiat allat attuumassutillit) piaartumik Tusassimi suliffissarsiortarfik aqqutigalugu nassiutikkit.
Qinnuteqaatit aggeraangata suliarineqartassapput oqaloqatiginninnerillu ingerlanneqarlutik. Taamaattumik qinnuteqaatit piaartumik nassiuguk. Inuttassaq eqqortoq nassaarigutsigut atorfinitsitsissaagut.
Tusassip qinnuteqaatit aggeraangata suliarisassavai, qinnuteqarnissamullu killissarititaasq nallertinnagu oqaloqatiginninnernik aggersaasinnaalluni.
Tusass
Takorluukkap ´Tusassip nunarsuup sinnera qaninnerulersippaa – uagullu immitsinnut qaninnerulersilluta’ ataani suliffeqarfiup sulisui 350-t missaanniittut suleqatigiillutik Kalaallit Nunaat tamakkerlugu attaveqaqatigiinnermut atortulersuutit nutaaliaasut pilersillugillu qulakkeertarpaat.
Uani paasisaqarnerugit: www.tusass.gl