Visit Greenland Social Media & Digital Marketing Managerissarsiorpoq

Visit Greenlandip digitalikkut nittarsaassineranut, attaveqatigiittarfinnut aamma pilerisaarutinut qitiusumik inissisimaqataarusuppit, isumassarsianik piviusunngortitseqataasarluti imarisassanik saqqummiussisarlutit sullinniakkanullu eqqortunut apuusseqataasarlutit?

Visit Greenlandimi nuna tamakkerlugu takornariaqarnerup ineriartortinneqarnissaa tapersersorniarlugu sulivugut, akisussaassuseqartumik ineriartortitsinissaq aamma sumiiffinni najukkani naleqarnerulersitsinissap pilersinneqarnissaa ukkataralugit. Kalaallit Nunaat soqutigineqaleraluttuinnarpoq, nunallu tamalaat akornanni attaveqaatit nutaat nunatsinnut tikikkuminarsaaqataapput. Tamanna periarfissanik nutaanik pilersitsivoq, aammali nunarsuup sinneranut digitalikkut qanoq attaveqarnissatsinnut akisussaaffimmik annertunerusumik nassataqarluni.

Taamaattumik Nuummi Digital & Communicationsimi suleqatigiit akornanni Social Media & Digital Marketing Managerissarsiorpugut.

Suliffik pillugu 

Digitalikkut pilerisaarinitsinni qitiusumik inissisimassaatit, pingaartumik inuit attaveqatigiittarfiit sammissallugit. Periusissiornermit pilersaarusiornermut, attaveqatigiittarfittalu ulluinnarni ingerlanneqarnerani suliassat assigiinngitsut suliassarissavatit. 

Sammivissamik aalajangersaaqataassaatit sullinniakkat, niuerfiit ukiullu qanoq ilineri akimorlugit sammiviliussap imarisassanngortinnissaa, tigussaasumillu pilerisaarutinngortinnissaa suliniutinngortinnissaalu suliarissavatit. Tamatumunnga ilutigitillugu namminersuutigisannik imarisassanik suliaqartassaatit, attaveqatigiittarfimmi atuisunik attaveqarnermi isumaginnittuussallutit (Community management), Meta Adsilerisuullutit aammalu angusanik malittarinnittassallutit. 

Attaveqatigiittarfiit digitalikkullu pilerisaarinerup ineriartornerat malittarissavatit, periarfissanut nutaanut alapernaatsuussallutit aamma misileraanissamut sapiissuseqassallutit. Pissutsit nutaat malunnaatilimmik ineriartornerat tigussaasunngorlugit isumassarsianngortissinnaassavatit, ilusilersuutinngortissinnaassallugit suliniutinngortissinnaassallugillu.

Suliassatit pingaarnerit

● Digitalikkut periusissiap ineriartortinneqarneranut peqataaneq, taassumalu tigussaasunik imarisassanngortinnissaa pilerisaarutinngortinnissaalu

● Inunnut attaveqatigiittarfitsinni digitalikkullu siammarteriffitsinni imarisassanik pilersaarusiorneq, pilersitsineq saqqummiussinerlu

● Imarisassat, pilerisaarutit aamma nittarsaassinerit imminnut ataqatigiissuunissaasa qulakkeernissaat

● Attaveqatigiittarfimmi atuisunik attaveqarnermik isumaginninneq – ilaatigut akissuteqartarneq, oqaaseqaataasunik aqutsineq atuisunullu aqqutissiuussineq

● Meta Ads Managerimi nittarsaassinernik pilersitsineq, aqutsineq pitsanngorsaanerlu

● Digitalikkut pilerisaarutinik ingerlatsineq, kiisalu tusagassiutilerinikkut suliniutinut attuumassuteqartunut immikkoortortaqarfiit allat suleqatiginerat

● Pilerisaarutit imarisallu malittarinissaat, paasissutissallu atorlugit suliniutitta pitsanngorsartuarnissaat

● Attaveqatigiittarfinni, digitalikkut pilerisaarinermi angalanikkullu ileqqut ineriartornerisa nakkutiginissaat, taakkulu nalilersorlugit uatsinni qanoq pitsaanerpaamik atorneqassanersut

● Kalaallit Nunaanni angalanermeersunik immiussinissamut imarisassanik pilersaarusiorunilu ataqatigiissaarineq, kiisalu nunap immikkoortuinit tamanit imarisassanik pitsaasunik ingerlaavartumik pissarsisarnissap qulakkeernissaa

● Digitalikkut attaveqaqatigiinnermut siammarteriffinnillu toqqaanissamut tunngatillugu suleqatit siunnersortarnissaat

Illit pillutit

Digitalikkut pilerisaarinermi, inunnut attaveqatigiittarfinnik ingerlatsinermi imarisassanillu pilersitsinermi misilittagaqarluassaatit, sungiusimassallugulu suliassavit nammineq akisussaaffiginissaat.

Suliassaq isumassarsiarineraniit naammassillugu piviusunngortissinnaanissaa ingerlassinnaassavat, tamakkiisumik isiginnissinnaassallutit namminerlu suliassanni ingerlariaqqissinnaassallutit. Tamatumunnga ilutigitillugu suleqatigiinneq allanillu siunersiueqateqarneq ilorrisimaarnartissavatit.

Alapernaatsuussaatit nutaanik misileraanissamut sapiissuseqassallutit, inuillu attaveqatigiittarfii digitalikkullu saqqummiussisarfiit ineriartornerannik malittarinnittuussaatit. Misileraasinnaassaatit pisariaqaraangallu allanngortitsisinnaassallutit, aammali sammivimmik attassisinnaasuullutillu suliassanik naammassinnissinnaasuussaatit.

Suliatigut piginnaasat

● Namminersuutigalugu Meta Ads Managerilerisinnaaneq aammalu digitalikkut isumassarsiamiit pilerisaarutinngortitsinissaq piviusunngortillugu naammassinnissinnaaneq

● Allaatigisanut, assinut aalasulianullu takunnissinnaalluartuuneq, kiisalu saqqummiussisarfinni assigiinngitsuni suut sunniuteqarluartarnerannik paasisimasaqartuuneq

● Sulianik nalilersuinissamut pitsanngorsarnissamullu paasissutissanik nalunaarsuutinik atorsinnaaneq

● Tuluttut attaveqaqatigiinnermi saqqummiussillaqqissuuneq, inuit attaveqatigiittarfiini saqqummiuttakkagut pingaarnertut tuluttuujummata. Kalaallisut danskisullu ilisimasaqarneq iluaqutaassaaq, piumasaqaataanngilarli. 

Atorfimmut ima qinnuteqassaatit

Suliffissat Nuummi Visit Greenlandip allaffianiippoq.

Piginnaasat misilittakkallu aallaavigalugit, aningaasarsiat atorfeqartinneqarnermilu atugassarititaasut immikkut isumaqatigiissutigineqassapput. 

Atorfimmut atatillugu angalasoqartarsinnaavoq.

Piaarnerpaamik atorfinitsitsinissaq kissaatigaarput – suleqatissarpulli eqqortoq utaqqeqqaarusupparput.

Qinnuteqaatit ataavartumik suliarineqassapput, taamaammat piaarnerpaamik qinnuteqaatit Mirjam Johannesenimut, Head of Digital & Communicationsimut, uunga nassiuguk: mirjam@visitgreenland.com

Visit Greenland pillugu

Visit Greenland tassaavoq Kalaallit Nunaata takornariaqarnikkut siunnersuisoqarfia, tamakkiisumik Namminersorlutik Oqartussanit pigineqartoq.  Nunat tamalaat aammalu Kalaallit Nunaanniittut Visit Greenlandip soqutigisaqaqatigiivi suleqatigalugit, aammalu pilerisaarinerit tuniniaavissanillu ineriartortitsinerit aqqutigalugit Visit Greenlandip Kalaallit Nunaat, ornitassatut nuna nunallu isikkua pillugu ilisimasassarsiorluni takornariagassatut, nittarsaattarpaa. 

Suliffeqarfik pillugu paasisaqarnerugit uani