Attaveqaqatigiinnermi sulisussaq

Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoqarfik attaveqaqatigiinnermi sulisussamik sulisussarsiorpoq

Suliassaqarfimmi inuiaqatigiinni pingaaruteqartumi attaveqaqatigiinnermik nukittorsaaqataarusuppit ineriartortitsiseqataarusullutillu? Periusissatigut paasissutissiisarneq, tusagassiuutileraluni sulineq qarasaasiatigullu attaveqaqatigiinneq kissalaarfigaagit? Taamaappat atorfimmi pissanganartumi suliffissaqartippatsigit.

Atorfik pillugu

Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoqarfik atorfilittani attaveqaqatigiinnermi sulisussamik suliassaqarfimmi pikkorissumik tamatigoortumillu sulisussarsiorpoq. Naalakkersuisoqarfimmiit attaveqaqatigiinnerup paasissutissiisarnerullu ersarissuunissaanik, siunnerfeqarnissaanik paasiuminartuunissaanillu – suliffiup iluani avataanilu – qulakkeerinissami qitiusutut suliaqartussat ilagilissavaatsit.

Akisussaaffeqarfitit suliassatillu

• Tusagassiuutit ilanngutassiallu: Naalakkersuisoqarfiup Aqutsisoqarfiullu sulinerat pillugit tusagassiuutitigut nalunaarutinik, ilanngutassianik paasissutissiinernilu najoqqutassanik suliaqarneq.

• Inuit akornanni attaveqatigiittarfiit: Facebook-ip, LinkedIn allallu naapeqatigiittarfiit imarisaannut suleriaatsit nutarterisarnerlu.

• Politikkikkut attaveqaqatigiinneq: Innuttaasunik ataatsimiititsinerni aaqqissuussinernilu attaveqaqatigiinnikkut tapersersuineq aamma SoMe-mi tusagassiisarneq.

• Innuttaasunik attaveqarneq: Innuttaasunit, suliffeqarfinnit kattuffinniillu saaffiginnissutinut akissuteqarneq.

• Tusagassiortunut attaveqarneq: Tusagassiortunut suleqatigisartakkanullu attaveqarnermik ataqatigiissaarineq.

• Pisortanut siunnersuisarneq: Pisortanik periusissiat paasissutissiisarnerlu pillugit siunnersuisarneq.

• Oqaluttaaneq nutserinerlu: Sivikitsumik oqaluttaalluni aammalu allattoqarfik suleqatigalugu nutsigassanik ataqatigiissaaraluni ikiuunneq.

• Nittartagaq: Nittartakkanik nutarterisarneq aaqqissuussisarnerlu.

Takorloorparput illit

• Attaveqaqatigiinnerup, tusagassiornerup assigisaasaluunniit iluanni naleqquttumik ilinniagaqarsimasutit.

• Tusagassiornermik suliaqarnermik periusissatigullu attaveqaqatigiinnermik misilittagaqartutit – politikkimut imaluunniit pisortanut atatillugu misilittagaqarneq iluaqutaassalluni.

• Kalaallisut danskisullu ersarissumik siunnerfilimmillu paasissutissiisartutit. Tuluttoorsinnaaneq iluaqutaassaaq.

• Ulluinnarni ulapaarfiusuni aaqqissuussaasumik sulisartutit nuannaralugulu.

• Inuit akornanni attaveqatigiittarfiit qarasaasiatigullu paasissutissiisarneq pikkoriffigigitit.

• Suleqatigiinnissaq pingaartikkit aammalu paasisimaarinniinnarsinnaasutit – aamma sulerulunnerup nalaani.

Kikkuuvugut?

Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoqarfik arlalinnik immikkoortortaqarpoq, tassaasut Inuussutissarsiornermut immikkoortortaqarfik (niuerneq, takornariartitsisarneq il.il. ilanngullugit), Aatsitassat, Nukissiutit, Inatsisit Atuutsinneqarnerannut suliassaqarfik aamma Naligiissitaaneq. Immikkoortortat tamarmik suliassaqarfimminnut pingaarnertigut politikkimut, periusissianut, pilersaarusiornermut ataqatigiissaarinermullu akisussaasuupput.

Sulisut 55-t missaanniippugut, tassaallutalu 1) Qitiusumi atorfilittat, 2) Aningaasaqarnermut immikkoortortaqarfik 3) Inuussutissarsiornermut immikkoortortaqarfik, 4f) Ujarassiornermut immikkoortortaqarfik 5) Nukissiutinut immikkoortortaqarfik aamma 6) Inatsisit atuutsinneqarnerannut – Naligiissitaanermullu immikkoortortaqarfik. Qitiusumi atorfilittani ilaalissaatit aammalu Naalakkersuisoqarfimmut pisortaanerup toqqaannartumik ataaniissallutit. Ulluinnarni Naalakkersuisup allattaa, Naalakkersuisoqarfimmut pisortaaneq pisortallu sinneri qanimut suleqatigissavatit. Suliniutinik aqutsineq, politikkikkut aalajangiinissamut tunngavissiat ukkataralugit pisortat qanimut suleqatigalugit politikkikkut suliaqarnermut pingaarutilimmik ilaalissaatit

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 

E-mail-ikkut qinnuteqaatinik tigusineq ajorpugut.

Qinnuteqaat nassiuguk