Attaveqaqatigiinnermut Immikkoortortaqarfimmi silaannakkut angallassinermut allaffimmi pisortaq

Kalaallit Nunaanni attaveqaatit ineriartupiloorput – attaveqaqatigiinnermut immikkoortortaqarfillu ulappuffiuvoq.

Inuiaqatigiinni aningaasaqarnermik paasisimasaqarluartumik, aningaasaqarnerullu ataqatigiinneranut tunngaviusunik, naalakkersuinikkullu aalajangeeriaatsinut ilisimasaqarluartumik, namminersorlutik oqartussallu ingerlatseqatigiiffiutaannik ilisimaqarluartumik allaffimmi pisortassarsiorpugut.

Timmisartuussinermut inatsisinullu kiisalu pisortat aningaasaqarnerinut missingersuusiortarnerinullu ilisimasaqartumik, immikkoortortaqarfimmilu sulianut immikkut ilisimasalinnik suleqateqarnissaminik kajumissuseqartumik nassaarsinnaassalluta neriuutigaarput. Tamanit eqqummaariffigineqarluni aaqqissuussaanermi pisariusumi aqutsinermik misissueqqissaarnermillu, politikkikkut anguniakkanik piviusunngortitsinermik attaveqaqatigiinnermillu suliaqarfiusumi atorfik pineqarpoq.

Atorfik pillugu nassuiaat

Attaveqaqatigiinnermut immikkoortortaqarfiup ”nunamut, immamut silaannarmullu” tunngasut iluini suliassanik pilersaarusiorneq, ataqatigiissaarineq suliaqarnerlu isumagisarai, taamaattumillu imarsiornermi, silaannakkut angallannermi, mittarfeqarnermi, umiarsualiveqarnermi, nalunaarasuartaateqarnermi kiisalu nunakkut imaatigullu assartuussinermi suliassaqarfinnut akisussaasuulluni.

Immikkoortortaqarfiuvugut mikisunnguaq assigiinngitsorpassuarnik suliaqartoq, nunarujussuarlu siammasissunik najugaqarfeqartoq, attaveqaatillu ingerlalluarnissaannik pingaartitsiviulluinnartoq sullitaralugu.

Attaveqaqatigiinnermut Immikkoortortaqarfimmi suliat politikkikkut eqqumaffigineqartorujussuupput, aammalu tamanit tusagassiorfinnillu soqutigineqarluni. Suliassat suleqataaffigisavut innuttaasut tamarmik ulluinnarni atugaannut pingaaruteqartorujussuupput, nunatsinnilu ineriartorfiusinnaasut piviusunngortinneqarnissaannut isumaqartorujussuullutik.

Immikkoortortaqarfimmi sulisut pisortarlu, Naalaakkersuisoqarfimmilu pisortat allat suleqatigalugit attaveqaqatigiinnermi suliassaqarfiit akimorlugit sulinermut allaffimmi pisortaq nukittorsaaqataasinnaassaaq.

Suliassat siumut ingerlannissaannut piginnaaneqaruit, politikkikkut oqaluuserisassat atuuttut tunngavigalugit suliassat ataavartumik tulleriiaarsinnaagukkit, aammalu suleqatit pisortallu suliani suleqatigisinnaagukkit atorfimmut naleqqussimassaatit.

Inatsisinik suliaqarnermut imaluunniit aningaasanut inatsisiliornermut misilittagaqaruit ilisimasaqaruillu iluaqutaassaaq.

Danskisut/Kalaallisut marlunnik oqaaseqartuuneq iluaqutaassaaq, kisianni piumasaqaataanani.

Attaveqaqatigiinnermut Immikkoortortaqarfimmi sulisut suliassaminnik namminneq suliaqartarlutik, suliassaminnullu akisussaaffeqarlutik sulisuupput pikkorissut, namminersorlutillu sulisinnaasut. Immikkoortortaqarfimmi sulisut allat peqatigalugit tunngavissanik pitsaasunik isumannaatsunillu pissarsiniarnissaq pitsanngorsaanissarlu suliassarissavatit, taakkulu atorlugit allaffimmi pisortap politikkikkut aalajangiisartut aamma immikkoortortaqarfimmi pisortaq siunnersorsinnaassallugit.

Suliat avatangiisini ulapaarfiusuni suliatigullu unammillernartuni ingerlanneqarput, tassanilu sulinermik nuannarisaqarneq akisussaaffeqarnerlu angusanik pitsaasunik, tulluusimaarutigisinnaasatsinnik inerneqartarput.

Ataatsimooqatigiinneq pitsaasuuvoq pingaartorsiorfiunanilu, ulluinnaallu amerlanertigut ulapaarfiusut isumagissaarnermik sunnersimaneqartarlutik. Suliffeqarfiorusuppugut inissaqartitsiviulluartoq, suleqatigiit nuannersumik ataatsimoorfigisaat,sulinerullu iluani ilaqutariittullu inuunerup ataqatigiinnissaannik ataqqinniffiusoq.

Misissueqqissaarsinnaanermi piginnaaneqarluartumik, aqutsinermik misilittagaqartumik kiisalu aaqqissuussaanermi politikkikkut aqunneqartumi ukiuni arlalinni misilittagaqareersumik piukkunnaatilimmik pissarsiorpugut. Piukkunnaateqartoq namminersorlutik oqartussat suliffeqarfiutaannik aamma suliffeqarfiit Naalakkersuisullu akornanni ataqatigiinneq uppernarsakkamik ilisimasaqarfigilluassavai. Qinnuteqartoq piukkunnaateqarluartoq silaannakkut angallassinermik aamma misilittagaqarsimassaaq, ilisimasaqarluassallunilu.

Tusarfiginissat qilanaaraarput, Kalaallit Nunaannilu naalakkersuisuni sulineq, attaveqaqatigiinnermut immikkoortortaqarfiup suliai. sullivippullu pitsaasoq pillugit paasissutissanik tunniussinissamut piareersimavugut.

www.naalakkersuisut.gl aqqutigalugu Kalaallit Nunaanni Namminersorlutik Oqartussani sulineq pillugu isumassarsiorsinnaavutit paasisaqarsinnaallutillu.

Akissarsiat atorfininnermilu atugassarititaasut

Atorfik massakkut akissaateqarfik 36-miippoq.

2025-imi apriilip aallaqqaataani akissaateqarfik 36-mi akissarsiat qaammammut 57.102,45 koruuniupput, ukiumullu soraarnerussutisiassat ilanngullugit 685.229,40 koruuniullutik.

Aallaavittut isumaqatigiissutitigut piumasaqaataasut naapertorlugit atorfinitsitsisoqassaaq, qinnuteqartorli Kalaallit Nunaanni pisortaqarfinni tjenestemandinut inatsisit naapertorlugit tjenestemandioreersimappat, tjenestemandinut atugassarititaasut naapertorlugit atorfinitsitsisoqarsinnaalluni.

Namminersorlutik Oqartussat, isumaqatiginninniarsinnaatitaallunilu peqatigiiffiup akornanni isumaqatigiissutit atorfininnermi atuuttut naapertorlugit akissarsiat, atorfininnermilu atugassarititaasut inissinneqassapput, matumani atorfininnermi soraarnermilu angalasinnaatitaaneq, pigisallu assartorneqarsinnaanerat ilanngullugit

Naalagaaffimmi tjenestemandit kiisalu AC-nut isumaqatigiissutit, ilaatigut DJØF-ip Finansministeriallu akornanni isumaqatigiissut, naapertorlugit atorfillit, Namminersorlutik Oqartussat ataanni atorfininnerminnut atatillugu akissarsiaqaatiginagu sulinngiffeqarsinnaatitaapput. Tamatuma saniatigut nunap iluani pissutsinut Naalakkersuisoqarfiup kommuninut, nunallu immikkoortortaannut innersuussutigivaa, Namminersorlutik Oqartussat ataanni atorfininnermi akissarsiaqaatiginagu sulinngiffeqarnissaminnik qinnuteqartut ammaffigineqassasut. Sulinngiffeqarnissaq pillugu aalajangersakkat, Namminersorlutik Oqartussani atorfinitsinneqartut aapparisaannut/inooqataannut aamma atuupput

Aallaaviusumik sapaatip akunneranut akunnerni 40-ni suliffiuvoq, atorfimmullu tunngatillugu ukiumut akunnerni 320-ni, qaammatinullu pingasunut akunnerni 80-ini suliartoqquneqaratarsinnaanermut pisussaaffeqarpoq. Ullut sulinngiffiusussat aannaanerinut ajunngitsorsiassat pillugit aalajangersakkat atuutinngillat.

Atorfimmut atatillugu inissaqartitsisoqanngilaq. Qinnuteqartoq Namminersorlutik Oqartussani atorfeqarnini aqqutigalugu ineqareersimappat, atorfimmut atatillugu inissaminik innersuunneqarsinnaatitaanini pigiinnassavaa. Atorfimmut atatillugu inissiaq atorfinitsitaanermut atammat, atorfimmit tunuarnermi inissiaq qimanneqassaaq.

Pinerluuteqarsimannginnermut uppernarsaat

Atorfimmi atorfinissinnaassaguit, malittarisassat naapertorlugit pinerluuteqarsimannginnermut uppernarsaateqartariaqarputit. Taamaattumik pinerluuteqarsimasunik/pinerluuteqarsimanngitsunik allattorsimaffimmit uppernarsaammik aallaqqaammut tunniussissaatit. Taanna najukkami politeeqarfimmi imaluunniit www.politi.dk/bestil/bestil-straffeattest-imi pissarsiarineqarsinnaavoq.

Ulloq atorfiniffissaq

Piaartumik. Ajornanngippat 2026-mi januaarip aappaani.

Piffissaq suliffiusussaq

Sapaatip akunneranut akunnerit 40-t

Qinnuteqarnissamut ulloq killigititaq

2026-mi januaarip aappaani.

Atorfinitsitsinissamut atatillugu ulloq oqaloqatiginniffiusussaq Oqaloqatiginninnerit ataavartumik ingerlanneqassapput.

Soqutiginnippit?

Apeqqutissaqaruit immikkoortortaqarfimmi pisortaq Kenneth Lund Bøjler, kebo@nanoq.gl, oqarasuaat34 66 56-imut attaveqarfigisinnaavat.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 

E-mail-ikkut qinnuteqaatinik tigusineq ajorpugut.

Qinnuteqaat nassiuguk