Atuisartoqarnermut Unammilleqatigiinnermullu Aqutsisoqarfik inatsisilerisunik 1 – 2-nik – sullissisumik naammagittaalliuuteqartarnermilu allatseqarfiup pisortaanik inuttassarsiorpoq

Atuisartoqarnermut Unammilleqatigiinnermullu Aqutsisoqarfiup inuussutissarsiornermut immikkoortortaminut inatsisilerisunik marlunnik angusarissaarnissamik pingaartitsisunik naleqqussallaqqittunillu inuttassarsiorpoq.

Atorfimmi inatsisitigut sullissineq, siunnersuineq, ilitsersuineq, inatsisilerinermik suliaqarneq, ingerlatsivinnik allanik suleqateqarneq, aamma ataqatigiissaarineq suliassaapput. Inatsisitigut sullissinermik misilittagaqartunik suleqatissarsiorpugut.

Sungiussiassaatit, piumassuseqassaatit, inuiaqatigiinni suliaqarusussuseqassaatit, suliassanillu aaqqiissuteqariinngitsunik suliaqarsinnaassaatit. Suliassanik nutaanik tigusisinnaassaatit -  sulianilu ajornarsinnaasuni misilittagaqarfiginngisanilu aaqqiissuteqarsinnaassaatit.

Taakku ilagalugit ulloq ulapaarfiusumi amerlasuunillu suliassaqarfiusumi sulisinnaassaatit. Suliatit unittuunnginnissaat anguniarlugu pilersaarusiorsinnaanissat, aaqqissuussisinnaallutillu pingaarnersiuisinnaassaatit, eqeersimaassaatit aaqqiissutinillu ujartuisinnaassaatit. 

Siunnersortit pisortaatut atorfinitsitaanissamik piumasaqaatit naammassineqarpata naammagittaalliuuteqartarnermi allatseqarfiup pisortaatut atorfinitsitsisoqarsinnaavoq, misilittakkalli apeqqutaatillugit immikkut siunnersortitut atorfinitsitsisoqarsinnaavoq. 

Suliffik pillugu
Maalaaruteqartarfitsinni qitiusumik atorfinissaatit, oqartussaasutut ineriartortitsinermilu suliaqarnermik akisussaaffeqassallutit. Naammagittaalliuuteqartarnermi allatseqarfiup pisortaatut ataqatigiissaarisutut atorfinissaatit, suliniutinillu aqutsisuussallutit. Sullissisutut soqutigisatit misilittakkatillu naapertorlugit suliassanik assigiinngitsunik suliassaqassaatit. 

Saniatigut aqutsisoqarfimmi suliassat assigiinngitsut suliarinissaanut piareersimassaatit..

Suliassatit ilaatigut tassaapput:

• Inatsisilerinermi suliaqarneq oqartussaasunullu allanut suleqateqarneq 

• Inatsisitigut ataqatigiissaarineq

• Sullissineq

• Ilinniartitsineq

• Suliniutinut aqutsineq aamma/ imaluunniit suliniutinut peqataaneq 

• Immikkoortunik oqartussaasunillu allanik ataqatigiissaarineq 

• Inatsisitigut suliassat allat 

Piginnaassutsit piumasaqaatigineqartut: 
Inatsisilerisutut kandidatitut ilinniagaqarneq cand.jur. imaluunniit cand.merc.jur., tulliuttunilu ataatsimik arlalinniluunniit misilittagaqarneq:

• Oqartussaasumit allamit sullissinermik misilittagaqarneq

• Suliffeqarfimmi naalakkersuinikkut aqunneqartumi, naalakkersuinikkullu aalajangiiniartarnermi suleriaatsinik misilittagaqarneq imaluunniit ilisimasaqarneq.

• Suliniuteqarnermik, inatsisilerinermik sullissinermilu soqutigisaqarneq misilittagaqarnerlu 

• Attaveqallaqqissoq, allakkatigut oqaatitsigullu suliassanik pisariusunik nassuiaallaqqissoq 

• Namminersorsinnaasoq aaqqiissuteqarusuttoq, suliassanut suliniutinullu annernik suliaqarluarsinnaasoq

• Suliassaminut sungiussiasoq, peqqissaartoq misissueqqissaartartorlu

• Sungiussialluni, peqqissaarluni, misissueqqissaarlunilu suliaqartartoq

• Qallunaatut tuluttullu oqallorissoq 

• Aalajangiisinnaassuseqartoq

• Inunnik oqaloqateqarluarsinnaasoq

Aqutsisoqarfik pillugu
Pisortatut oqartussaavugut, qitiusumillu inatsisilerineq aningaasalerinerlu suliarisarlugit. Ukiumut suliat 600 800-llu akornanni suliarisarpagut, saniatigullu ingerlatsiviillu allat suleqatigalugit suliniutinut ikiusarluta, inatsisiliornermillu suliaqartarluta.

Suliffeqarfiuvugut angusaqarluarusuttut aaqqissuussaalluartumillu sulisartut, suleqatigiinneq, akisussaaffeqarneq, kinaassutsimillu assigiinngiiaarneq pingaartippagut. Suliffiuvugut tatiginnittut, ataaqqinnittut oqaluukkuminartullu.

Neqeroorutigaagut:

• Atorfimmi annertuumik akisussaaffeqarneq, allannguinissamullu periarfissaqarneq 

• Suliffeqarfik pilerinartoq, suliffimmilu oqaloqatigiissinnaaneq, ataqqinninneqarneq tatiginninneqarnerlu

• Suliffeqarfik tamatigoortoq pissanganartorlu, nunatsinnut nunanullu tamalaanut aallussineq 

• Kisivit inatsisilerisuunavianngilatit, inatsisilerituullu misilittagaqarluartut akornaniissaatit 

Paasissutissat allat:
Atorfik pillugu annertunerusumik paasisaqarusukkuit, Aqutsisoqarfimmi Pisortaq Kristina Nordby oqarasuaatikkut +299 539452 imaluunnit e-mailikkut krno@nanoq.gl attavigisinnaavat.

Qinnuteqaat:
CV misilitsinnermilu allagartat attuumassuteqartut qinnuteqaammi ilanngunneqassapput.

Qinnuteqarnissamik piffissarititaq: 14. aggusti 2026 nal. 12:00. 

Oqaloqatigiinnerit ingerlaavartumik ingerlanneqarumaarput, piaarnerpaamillu atorfinitsitsisoqassalluni.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.
Qinnuteqartoq uppernarsaatitalinnik piginnaasalik immikkut siunnersortitut, siunnersortit pisortaatut siunnersortaanertulluunniit isumaqatigiissutit naapertorlugit atorfinitsinneqarsinnaasarpoq.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.