Ilinniartitaanermut Aqutsisoqarfik atuarfinnut IT-Didaktikimut atuartitsinermi teknologimillu paasinninnermut siunnersortimik pissarsiorpoq

Ilinniartitaanermut Aqutsisoqarfik IT-Didaktikimik aamma teknologimik paasinninnermut atuartitsinermut siunnersortimik pissarsiorpoq.

Atorfininneq pissaaq 1. August 2026 imaluunniit isumaqatigiissuteqarnikkut.

Atorfik Perorsaanermik tunngasunut immikkoortortaqarfimmi inissisimavoq, tassani pisortap ataaniilluni.

Atuarfinnut siunnersorti atuartitsissummi pineqartumi ineriartortitsinissaminut periarfissaqarluassaaq Ilinniartitaanermullu Aqutsisoqarfiup IT-imut periusissiaa Meeqqat Atuarfiannut tunngasoq piviusunngortitseqataaffigissallugu. 

Atuarfinnut siunnersortip suliassai:

• Meeqqat Atuarfianni IT-imik atuartitsineq nukittorsaaffigeqataassallugu, matumani aamma atuartitsissutit siunertaat ilikkagassatullu anguniagassat atuutilersillugit.

• Ilinniartitaanermut Aqutsisoqarfiup IT-imut periusissiaata Meeqqat Atuarfiannut tunngasoq piviusunngortinnissaa peqataaffigissallugu.

• Ilinniartitsisut, atuarfiit kommunellu paasissutissiiffigisarlugit, isumataartittarlugit siunnersorlugillu.

• Isumasioqatigiissitsinerit pikkorissaanerillu ingerlattarlugit.

• Atuartitsitsissutissanik siunnersuusiornerit aamma atuartitsinermi atortussiuussinerit peqataaffigalugit.

• Naalakkersuisut ilinniartitaanermut pilersaarutaannut- periusissiaannullu kiisalu Meeqqat Atuarfiannut suliniutinut allanut suleqataassalluni.

• Suliniutinut allanut suliat akimorlugit suliani peqataanerit – siunnersortit allat peqatigalugit aamma immikkoortortaqarfiit kiisalu avataaneersut allat suleqatigalugit.

• Oqaaseqaasiorluni, akissusiorluni nalunaarusiorlunilu.

Illit pillutit:

• Ilinniartitsisutut ilinniarsimasoq, imaluunniit ilinniartitsisoq master/kandidatgradimut ilinniaqqissimasoq assigisaaluunniit.

• Nunatsinni atuarfimmik, kulturimik inuiaqatigiinnillu ilisimaarinnilluartoq, kiisalu meeqqat atuarfianni atuartitsinermik misilittagaqarsimasinnaasoq.

• Atortunik digitaliusunik aamma ilinniusianik aallanillu atuartitsissutinik atuartitsinermi atuilluarsinnaasoq.

• Perorsaanikkut atuartitsinermilu periutsinik nutaanik, pingaartumik atuartitsissummut tunngasunik ilisimasaqarluartoq.

• Ilinniakkatigut pædagogikkimilu tunngavilersuillaqqissoq aamma isumaliutiginnissinnaalluartoq.

• Allattariarsornikkut oqaatsitigullu piginnaasaqarluartoq.

• Aaqqissuussamik, akisussaasumik aaqqiissutissanillu ujartuilluni sulisinnaasoq.

• Suliniutinik aallartitsisinnaasoq, namminersorsinnaasorlu, kisianni aamma suleqateqarluarsinnaasoq.

Ilinniartitaanermut Aqutsisoqarfik pillugu:

Ilinniartitaanermut Aqutsisoqarfik tassaavoq suliffeqarfik politikkikkut ingerlatsiveqarfiusoq, naalakkersuisoqarfimmik politikkerinillu sullissisoq kiisalu inerisaanermik saqqummersitsinernillu suliaqartoq. Suliffeqarfiuvugut assigiinngitsorpassuarnik suliaqarfiulluta, aqutsinerit atuutereersut saniatigut ilaatigut aamma saqqummersitsiveqarluta, naqiteriveqarluta paasititsiniaanermik atorniartarfimmillu katersugaateqarfeqarluta. Aqutsisoqarfiup meeqqat atuarfiat, efterskolit, friskolit kiisalu GUX, Attat aamma NUIKI annerusumik susassaqarfigalugit sullivigisarpai. Suleqatigiit 55-it missaaniippugut, suliffeqarfimmi pingaartorsiorpallaanngitsumi suliat pitsaasuunissaannik pingaartitsisuulluta. 

Akissarsiat atorfinitsitaanermilu atugassarititaasut:

Atorfinitsitsineq, Naalakkersuisut Ilinniartitsisullu Meeqqat Atuarfianneersut Kattuffiat, IMAK-ip akornanni Meeqqat atuarfianni ilinniartitsisut pillugit isumaqatigiissutaat malillugu pissaaq. Qinnuteqartoq Kalaallit Nunaanni pisortat tjenestemandit pillugit inatsisaat malillugu tjenestemanditut atorfeqareersoq, tjenestemandinut atugassarititaasut atorlugit atorfinitsinneqarsinnaavoq.

Akissarsiat atorfeqarnermullu atukkat, taassuma iluani aamma atorfininnermut soraarnermullu atatillugu angalasinnaanermut pisinnaatitaanerit, atorfininnerup nalaani isumaqatigiissutip Kalaallit Nunaanni Namminersortut kattuffiullu isumaqatiginninniarsinnaatitaasup akornanni.

Ineqarneq:

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaat attaveqarnerlu:

Allanngueqataanissamut piareersimavit? Taava qinnuteqaatit, CV allallu ilanngullugit linki qinnuteqarfissap naqqani allassimasoq aqqutigalugu nassiunneqassaaq. Qinnuteqarfissaq kingulleq tassaavoq 19. juni 2026.

Atorfik pillugu apeqqutissaqaruit immikkoortortaqarfimmi pisortaagallartumut, Mette Larsen Lyberth, toqq. tlf. (+299) 346278 mail: mell@nanoq.gl imaluunniit immikkoortortami teamleder Karla Petrussen, toqq. tlf. (+299) 345658 mail: karp@nanoq.gl attaveqarfigikkit.

Kalaallit Nunaat Namminersorlutillu Oqartussat pillugit annertunerusumik paasisaqarusukkuit uani taakkua pillugit atuagaqarsinnaavutit Naalakkersuisut nittartagaat

Ilinniartitaanermut Aqutsisoqarfiup atorfinnut qinnuteqaatit e-mailikkut nassiussat tiguneq ajorpai.