Ilulissani Perorsaanermik Ilinniarfik Nutserisumik/oqalutsimik pissarsiorpoq

Unamminarsinnaasunut unammillernissamut isikkivinnullu nutaanut sapiissuseqarpit, taava atorfik soqutiginartoq ilinnut nutserisutut PI/SPS’imi neqeroorutigaarput. PI/SPS kisiartaalluni Kalaallit Nunanni perorsaanermik ilinniarfiuvoq, nunarsuarmi kangerluit iigartartut annersaat kusanarnerpaallu qanittuaniittoq, UNESCO’p kingornutatut allassimasuutigisaanut ilaasoq.

Suliffeqarfittut marlunnik oqaaseqarfiusumi oqaatsinik ikorfartuinerup qaffasissup qulakkeerneqarnissaa pisariaqartipparput. Atorfik kalaallisut qallunaatullu attaveqaqatigiinnerup pitsaasup qulakkeernissaanik imaqarpoq – naqitatigut oqalunnertigullu. Naqitanik kalaallisut qallunaatullu nutserinermik aammalu ataatsimiinnerni misilitsinnerni assigisaannilu nutserinernik suliassanik imaqarpoq. Pikkorissaanerit sineriammi ingerlanneqarsinnaasartut aamma nutserisumik pisariaqartitsiffiusinnaasarput, taamaattumillu angalasinnaaneq naatsorsuutigineqassaaq.

Qinnuteqartuni suliassaqarfimmut ilisimasaqassuseq piginnaaneqarfigineralu pingaartinneqarput

• Immikkut oqaatsit kalaallisut qallunaatut akornanni nutserisutut/oqalutsitut ilinniagaqarsimassaatit, assigisaanilluunniit.

• Assigiinngitsunut atatillugu nutserineq/oqaluttaaneq misilittagaqarfigivat nutserisutut/oqalutsitut sulinermi inissisimaffik ilisimaarilluarlugu.

• Allattariarsornikkut oqaluttariarsornikkullu ingerlatitseqqiineq pikkoriffigaat oqaatsinillu assigiinngisitaartumik nutsigassat assinginik atuisinnaallutit.

• Perorsaanermik suliassaqarfiup iluani oqaatsit taaguusersuinerlu ilisimasaqarfigereerpatit imaluunniit ilikkarnissaannut assut soqutigalugit.

• Oqalutsiullutillu nutsigassanillu suliaqarlutit nuannarisarivat, oqaluttoqareeraangat nutserineq aammalu toqqaannartumik nutserineq

• Immikkut oqaatsinik allanik atuisinnaavutit, assersuutigalugu tuluttut.

• Tiiminik atuinermi allattuineq, tiimit atukkat immikkoortortanut inissititersinnaanissai

Nutserisumik/oqalutsimik pissarsiorpugut suleqatiminut suliassanullu ammasuullunilu akuersaartuusumik. Unammillernartut nuannarivatit nutaanillu ilikkarusullutit.

Suleqatigiilluarsinnaasuuvutit ataatsikkullu suliaqarsinnaallutit. Nammineq sulisinnaavutit pingaarnersiuillutillu suliaqarsinnaallutit.

Suliffimmik nuannersumik suleqatigiilluarnertalimmik neqeroorpugut, immitsinnut kaammattoqatigiillutalu suliassatigut suleqatigiissinnaalluta immikkoortukkaarluta. Suliffik PI/SPS Ilulissani inissisimavoq, tassani nutaanik sanaartukkamik allaffeqarfeqarlunilu ilinniarfeqarpoq.

Paasissutissat atorfimmut tunngasut sukumiinerusut pillugit saaffigineqarsinnaavoq immikkoortortami pisortaq Kirsten P.Jensen oqarasuaat +299 38 35 50 e-mail allaffik@pi.sps.gl 

Seminaria pillugu annertunerusumik paasisaqarusukkuit nittartagarput www.pi.sps.gl aamma illoqarfik pillugu nittartagaq www.avannaata.gl takuuk.

Atorfik maj 1.-ani 2026 imal. piaartumik inuttalerneqarnissaa kissaatigineqarpoq.

Qinnuteqarfissaq kingulleq tassaavoq tallimanngorneq 21. april 2026.

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.

E-mail-ikkut qinnuteqaatinik tigusineq ajorpugut.