Inatsisartut pisortassarsiorput

Inatsisartut Allattoqarfianni Pisortatut atorfik 20. januar 2025 qinnuteqarnissamut killiliullugu inuttassarsiorneqarpoq, atorfinitsinissamulli suliaq naammassineqanngitsorlu qinersisoqarnissaanik nalunaaruteqartoqarmat atorfik inuttalerneqanngilaq. Suliap unitsiinnarneqarnera piffissallu sivisuup ingerlareernera eqqarsaatigalugit atorfiup inuttassarsiorneqaqqinnissaa aalajangerneqarpoq, atorfinitsinissamut suliaq qinnuteqartussatut piukkunnaatillit tamaasa ilaatinniarlugit aallaqqaataanit ingerlanneqarsinnaaqqullugu.

Kalaallit Nunaata inatsisiliortui Inatsisartut inatsisartut allaffeqarfiannut (Inatsisartut Allattoqarfiannut) pisortassarsiorput.

Pisortaq inatsisartut allaffeqarfiannut allaffissornikkut akisussaasut qullersaraat, tamatumunngalu ilanngullugu Siulittaasoqarfiup aalajangiinerisa piviusunngortinneqarnissaannut akisussaasuulluni. Pisortap Inatsisartut Siulittaasuat toqqaannartumik qullersaraa.

Pisortap ulluinnarni Siulittaasorlu sinnerlugu Inatsisartut Allattoqarfiata ulluinnarni aqunneqarnera isumagisaraa, tamatumunngalu atatillugu sulisoqarnermut tunngasunut inatsisartullu allaffeqarfiata aaqqissuussaanerata, suliassanik ingerlatsisarnerata isumaginnittarneratalu piareersarneqartarnerannut akisussaasuulluni. Pisortap siulittaasoqarfik suleqatigalugu Inatsisartunut ilaasortanut sulinermi atugassarititaasut ineriartortillugillu nukittorsassavai, tamatumunnga ilanngullugu nutaamik qinersinerup kingorna ilaasortanut nutaanut inatsisartutigoortumik sulinermut siunnersuisarnerup ilitsersuisarnerullu nukittorsarneqarnissaannut peqataassalluni.

Inatsisartut Allattoqarfiata inatsisartut inatsisartunullu ilaasortat 31-t sullitarai Inatsisartullu ataatsimiinnerisa nalaanni Inatsisartullu ataatsimiititaliaanni inatsisartutigoortumik sulinermut ikorfartuutaalluni.

Inatsisartut Allattoqarfiat inatsisartut allaffeqarfigaat naalakkersuinikkut arlaannaannulluunniit pituttorsimanngitsoq. Inatsisartut Allattoqarfiat 30-ngajannik sulisoqarpoq immikkoortunut tallimanut agguarneqarsimasunut: Siulittaasoqarfiup allatseqarfia, aningaasaqarnermut immikkoortortaq, ataatsimiititaliat allatseqarfiat, nutserisoqarfik sullissinermullu immikkoortortaq. Immikkoortortat tallimat tamarmik immikkut ulluinnarni aqutsisumit aqunneqarput.

Inatsisartutigoortumik sulinermut ombudsmandeqarfimmullu aningaasaliissutit 2025-mut katillugit 107 mio. kr.-iupput, Inatsisartunut aningaasaliissutit ulluinnarni allaffissornikkut aqunneqarnerat Inatsisartut Allattoqarfiannit isumagineqarluni Ombudsmandillu ombudsmandeqarfimmut aningaasaliissutit Inatsisartunut aningaasaliissutit tamarmiusut ilaat 14 mio. kr.-iusut allaffissornikkut aqunneqarnerat nammineq isumagisaralugu.

Pisortatut atorfimmut qinnuteqartunut naatsorsuutigineqarpoq:

• Inuiaqatigiilerinermik kandidatitut ilinniagaqarsimassasut
• suliffeqarfimmi naalakkersuisunikkut aqunneqartumi, pisortat ingerlatsivii ilanngullugit, sulinermit misilittagaqarluassasut
• aqutsisusut misilittagaqarluarlutillu tunniusimassasut, inerititaqarfiusumik oqaloqatigiinnermik pilersitsisinnaassasut sullivimmilu avatangiisinik pitsaasunik pilersitsinissamut timitalimmik peqataassasut
• Inatsisartunut inatsisartullu allaffeqarfiannut inatsisiliornikkut aningaasatigullu killiliussat iluanni aqutsisinnaassuseqassasut
• ajornartorsiutinik suussusersisinnaassasut, nalilersuisinnaassasut aaqqinniarlugillu isumaliutigilluakkanik aalajangiisinnaassuseqassasut
• suleqatigiissinnaanermut pitsaasunik piginnaaneqassasut
• kalaallisut, tuluttut qallunaatullu oqalussiinnaassasut

Pisortap partiilersorluni naalakkersuinikkut illuinnarsiunngitsumik suliassaminik isumaginninnissaa atorfimmi piumasaqaataalluinnarpoq. 

Atorfinitsitsineq pisortanut Namminersorlutik Oqartussani Kalaallit Nunaannilu kommunini atorfeqartunut akissarsiatigut atorfeqarnermilu atugassarititaasut pillugit Naalakkersuisut aamma ilinniagartuut kattuffiisa akornanni isumaqatigiissut (pisortat pillugit ataatsimut isumaqatigiissut) malillugu pissaaq. Atorfik ullumikkut akissaateqarfimmut 41-mut naapertuuttumik inissinneqarsimavoq/akissarsiaqarfiuvoq. Akissaateqarfiit 41-anni akissarsiat aalajangersimasut 1. april 2022-mi akissarsiat malillugit qaammammut 93.947,07 kr.-iupput ukiumullu 1.127.365 kr.-iullutik.

Aallaavittut isumaqatigiissutini atugassarititaasut malillugit atorfinitsitsisoqassaaq, qinnuteqartorli Kalaallit Nunaanni pisortani tjenestemandit pillugit inatsisit malillugit tjenestemanditut atorfeqareerpat tjenestemandinut atugassarititaasut malillugit atorfinitsitsisoqarsinnaavoq. Pifffissaq suliffiusussaq aallaavittut sapaatip akunneranut nalunaaquttap akunneri 40-uupput.

Akissarsiatigut atorfeqarnermullu atugassarititaasut, taakkununnga ilanngullugit atorfininnermut soraarnermullu atatillugu akiliunneqarluni angalasinnaatitaaneq pisattanillu nuussisinnaatitaaneq, piffissami atorfiniffiusumi Namminersorlutik Oqartussat pineqartullu kattuffiata isumaqatigiinniarsinnaatitaasup akornanni isumaqatigiissut malillugu pissapput.

Ukiunut aalajangersimasunut atugassaqartinneqarluni isumaqatigiissuteqarnikkut atorfinitsitsisoqarsinnaavoq.

Qinnuteqaat Inatsisartut siulittaasuannut ingerlatinneqassaaq, ilinniaqarsimaneq, inuussutissarsiornikkut misilittakkat attaveqarfigineqarsinnaasullu pillugit paasissutissanik attuumassutilinnik tamanik ilaqartinneqassalluni.

Oqaatigineqassaaq qinnuteqartut inuttut pissusiisa misilinneqarnerannik ingerlatsisoqarsinnaassammat.

Qinnuteqarnissamut killissarititaq tassaavoq 21. maj 2025.

Atorfinitsitsisarnermut ataatsimiititaliap sapaatip akunnerani 22-mi oqaloqatiginninnerit siulliit ingerlatissavai, tamatumalu kingorna Siulittaasoqarfiup oqaloqatigiinnerit aappaat ingerlatissallugit aammalu sapaatip akunnerani 26-mi aalajangiissalluni.

Taamaammat ulloq 1. august 2025 imaluunniit tamatuma kingorna sapinngisamik piaartumik atorfinitsitsisoqarnissaa naatsorsuutigineqarpoq.

Qinnuteqaatit qarasaasiakkut atorfik@ina.alla.gl-imut nassiunneqassapput

Atorfiup imarisai pillugit paasissutissat sukumiinerusut Inatsisartut siulittaasuannut taassuma allattaanut emailikkut paarc@ina.alla.gl-imut allagaqarluni imaluunniit oqarasuaatip normuanut +299 34 61 05-imut sianerluni pissarsiarineqarsinnaapput.