Tusagassiorfimmi Sermitsiami tusagassiortoq

FAKTA

Atorfiup suussusaa: Tusagassiorfimmi Sermitsiami tusagassiortoq

Suliffeqarfik: Mediehuset Sermitsiaq

Qinnuteqarfissamut killigititaq: 10. december

Attavissaq: Kassaaluk Kristensenimut nassiunneqassapput, uunga; kassaaluk@sermitsiaq.gl, oqarasuaallu 566156

Tusagassiorfik Sermitsiaq nutaarsiassaqartitsivimmi tusagassiortussarsiorpoq

Kalaallit Nunaanni sukkasuumik ineriartortoqarpoq. Inuussutissarsiornermi periarfissat nutaat, politikikkut aalajangiinerit, inuiaqatigiinni allanngoriartortoqarnera sammisanillu pingaarutilinnik pitsaasumik tutsuiginartumillu tusagassiuutitigut allaaserinnittarnissaq pisariaqarpoq.

Taamaammat tusagassiortumik pisunut qanimut malinnaasussamik, nutaarsiassiisartussamik oqaluttuanillu paasinartunik, assigiinngitsunik isiginnittaasilinniit oqallinnermillu pilersitsisinnaasumik suleqatissarsiorpugut.

Suliffeqarfitsinni ulloq nalinginnaasoq

Sermitsiami tusagassiortutut ulluinnarni nutaarsiassiisartutut Kalaallit Nunaanni inuttaasunik peqataatitsisarlutit suliaqartassaatit.

Nutaarsiassanik, tunuliaqutaasunik, misigisanik aamma inuussutissarsiornermi inuiaqatigiinnilu ineriartornermik kiisalu politikki pillugu allaaserinnittassaatit. Sulininni aalajangiisartunut innuttaasunullu qanimut attaveqartassaatit, nunamilu ineriartornerup inunnut qanoq sunniuteqarnerata qulaajarnissaanut periarfissaqassallutit.

Sermitsiami ilaatigut uku periarfissarissavatit:

• Sammisat inuiaqatigiinnut sunniuteqartorujussuit allaaseralugit

• Inuussutissarsiortut, politikerit innuttaasullu attaveqarfigalugit

• Tusagassiorfimmi sunniuteqarluartumi sammineqartunut sunniuteqarsinnaaneq

• Tusagassiortutut piginnaasat suliat akisussaaffillu aqqutigalugu ineriartortinnerat

Uku pingaartippagut:

• Alapernaatsoq, paasiniaasinnaasoq soqutiginnittorlu

• Namminersorluni sulisinnaallunilu iliuuseqarsinnaasoq

• Inunnik, ineriartornermik inuiaqatigiinnilu pissutsinik malinnaasoq

• Attaveqaatinik tatiginninnermik pilersitsisinnaasoq

• Paasinartumik, tiguartinnartumik soqutiginartumillu allattartoq

 

Suliffeqarfik sunniutilik

Sermitsiaq Kalaallit Nunaanni oqallinnermi qitiusumik inissisimaffeqarpoq. Tusagassiortutut sammisani pingaarutilinni allaaserinnittarnissanik periarfissaqassaatit, tamat oqartussaaqataanerannut tunniussaqarsinnaallutillu allanngueqataasinnaasumik sunniuteqarsinnaassaatit.

Tusagassiorfimmi suleqatigiinnut tunniusimasunut ataqatigiilluartunullu ilanngutissaatit. Suliani avitseqatigiittoqartarlunilu tusagassiorluarnissamik pingaartitsisuni.

Tusagassiorfik Sermitsiaq pillugu

Sermitsiaq nittartakkamik nutaarsiassaqartitsivimmik Sermitsiaq.gl-imik ingerlatsisuullunilu atuagassiat Sermitsiaq AG-lu saqqummersittarpai. Nuummi, Ilulissani Danmarkimilu sulisoqarpugut, atuartartugullu sumiikkaluarpataluunniit anguniarlugit assigiinngitsunik sulissuteqartarluta.

Paasissutissat pingaarutillit

Sulilerfik: Jannuaarip aallaqqaataa 2027, isumaqatigiissuteqarnikkulluunniit

Qinnuteqarnissamut killigititaq: Decembarip qulingat

Atorfiup suussusaa: Piffissaq tamakkiisoq

Akissarsiat atorfinitsitsinermilu atugassarititaasut Dansk Journalistforbundip tusagassiivik Sermitsiaq.AG-llu isumaqatigiissutaat atuuttoq naapertorlugu aalajangersarneqarput.

Marluinnik oqaasillit qinnuteqarnissaat kissaatiginarpoq, piumasaqaataananili. Allaaserinikuusat ilanngullugit nassiunneqarsinnaapput.

Qinnuteqaatit nutaarsiassalerinermut pisortamut Kassaaluk Kristensenimut nassiunneqassapput, uunga; kassaaluk@sermitsiaq.gl, oqarasuaallu 566156 aqqutigalugu pissarsiarineqarsinnaavoq. Atorfimmut apeqqutissaqaruit aamma saaffigisinnaavat.

Powered by Labrador CMS