Aalisarnermut Piniarnermullu Naalakkersuisorqarfimmi inatsisileritooq

Ilaquttannut, sunngiffimmut aalisarnermullu piffissaqarnerorusuppit? Ulapaarfiusumi ulluinnarnilu suliffimmi allanngorarfiusumi namminersorluni suliassanik suliaqarneq nuannaraajuk, Kalaallit Nunaannilu allanngueqataarusuppit?

Imaassinnaavoq illiusoq kalaallit nunaata iluani tunniusimanerit pikkoriffiillu atorluarlugit inuiaqatigiinnut iluaqutaasumik aalisarnermut piniarnermullu suliassaqarfitta iluani pisuussutigut uumassusillit ingerlanneqarneranni suleqatiginiarlugu ujartugarput. Politikikkullu aqunneqartumik sukkasuumik suliaqarneq nuannarigukku, tunniussiffissat sivikitsut suleqataaffigerusukkukkit, imaassinnaavoq taava una suliffik ilinnoortoq.

Suliassat

Naalakkersuisoqarfimmi inatsisilerituutut - allat aamma inatsisilerituut suleqatigalugit - inatsisit nalunaarutillu suliarinissai nutarternissaalu akisussaaffigissavat, inatsisitigut allakkiat aamma Inatsisartut Ombudsmandianit saaffiginnissutit isumagalugit. Saniatigut aamma naalakkersuisup sullinnissaa, Inatsisartut ilaasortaannit ataatsimiititaliaanillu apeqqutigineqartut akillugit, inatsisinik tunngavigalugit ingerlatsinermi naalakkersuisoqarfimmi sulisut ilitsersuullugit aammalu inatsisinik nassuiaaneq, atuaasinnaaneq, pitsaasumillu qulakkeerinninneq isumagissavatit, aammalu piujuartitsinikkut ingerlatsinermi pinngortitami pisuussutinik politikikkut ilusilersueqataallutit. Kiisalu aamma nunani tamalaani aalisarneq pillugu isumaqatiginninniarnerni peqataanissamut sunneeqataanissamullu periarfissaqarpoq.

Illit piginnaasatit

- Inatsisilerituutut ilinniarsimaneq.

- Oqaatsit ersarissut atorlugit inatsisit tunngavigalugit allattariarsornikkut oqaluttariarsornikkullu ingerlatitseqqiisinnaanermut piginnaasaqarnissaq

- Suleqatikkuminartuuneq, eqinnaatsuuneq attaveqaqatigiinnikkullu piginnaasaqarluarneq.

- Politikikkut aqunneqartumi sulissutini sulineq ulapaarfiusumilu sulinissaq soqutigisaqarfiginissaa piumassuseqarfiginissaalu.

- Namminersorsinnaaneq.

Kalaallit Nunaanni Namminersorlutik Oqartussani sulineq, atorfimmilu periarfissat

Sulinerit allaffissornerinnaajunnanngilaq. Kalaallit nunaanni pinngortitaq alutornartoq kulturikkullu kingornussaq tupinnartoq misiginissaanut periarfissaqarumaarputit. Namminersorlutik Oqartussani sulinermi misilittagaqartitsiinnarneq ajorpoq, inuttulli aamma ineriartornarpoq. Nuup illoqarfittaani pissanganartumi pingortitamit uumasunillu avatangiiseqartumi najugaqassaatit, sunngiffimmilu sammisassat arlallit soorlu sangusaarfissat, ataarfissat, umiartorneq, aalisarneq, piniarneq, pisuttuarneq timersorneq allarpassuillu periarfissarissavatit. Inuit ataqatigiipput, inuiaqatigiinnilu pisuujusumi ilaajumaarputit.

Atorfiup inuttut suliassatigullu misilittagaqalersissavaatit, Kalaallit Nunaanni unamminartumik sulinissamut ujaasiguit sulinermi qaffakkiartornissamut periarfissat ammassapput.

Ulloq atorfiniffissaq

1. juni 2024 isumaqatigiissuteqarnikkulluunniit.

Paasissutissat allat

Atorfik pillugu paasisaqarnerorusukkuit naalakkersuisoqarfimmi pisortaq Emanuel Rosing saaffiginissaanut tikilluaqqusaavutit emro@nanoq.gl tlf. + 299 553345 imaluunnit inatsisileritooq Thomas Rassing thra@nanoq.gl tlf. 555333.

Qinnuteqarnissaq

Namminersorlutik oqartussani sulilernissamut piareersimaguit, qinnuteqaativit nassiunnissaanut ulloq killigitinneqarpoq 10. Maj 2024.

Kalaallit Nunaata utaqqivaatit iluliarasaarluni, arferit sarsuallutik, immami pinialugassaqarluni, arsarnerillu qaammarissut misigisassaqartikkusullutit. Ataatsimoornermut asseqanngitsumut peqataagit pissarititanillu uumassusilinnit issittumi piujuartitsisumillu ineriartortitseqataallutit.

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.

E-mail-ikkut qinnuteqaatinik tigusineq ajorpugut.

Naalakkersuisut pillugu

Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk