Air Greenlandip Piujuartitsinermut Attaveqaqatigiinnermullu Immikkoortortaqarfiani suleqataalerit

Air Greenland ineriartupiloorpoq, siunissarlu mittarfinnik alliliiffiusoq takornariallu amerliffissaat pissanganartoq ornillugu. Takorluugaraarput misigisassarsionermik pilersitsisuussalluta, Nunarpullu takornariartitsisartut peqatigalugit ataatsimut kivillugu – tamakku tamarmik piujuartitsinermik isumannaatsumik aallaaveqartinneqassapput.

Atuisutta siullertut toqqartassagaatigut anguniagaraarput, aammalu nunatta ataatsimuulersissinnaaneranut piginnaaneqarfitta nukittorsarnissaa kissaatigaarput. Tamanna anguniarlugu attaveqaqatigiinnermut siunnersortimik tunniusimasumik, suliffeqarfiup iluani avammullu piviusunngortitsiniarluni attaveqaqateqarsinnaasumik pissarsiorpugut. Septembarip aallaqqaataani imaluunniit isumaqatigiissuteqarnikkut atorfinitsitsinissaq kissaatigaarput.

Akisussaaffeqarfissatit

Attaveqaqatigiinnermut Immikkoortortaqarfimmi, Nuummi qullersaqarfitsinniittumi suleqatigiit piginnaanillit ilagilissavatit, tassani Piujuartitsinermut siunnersorti, Attaveqaqatigiinnermut ingerlatisoq kiisalu Piujuartitsinermut attaveqaqatigiinnermullu pisortaq issiallutik. Immikkoortortami attaveqaqatigiinnermut periusissiaq, anguniakkanik aalajangersaaffiusoq ersarissoq tunngavigalugu sulineq ingerlanneqarpoq. Piujuartitsinermik suliniutit pillugit suliaqartassaatit ukiumullu piujuartitsinermut nalunaarusiamik suliaqarnermi aaqqissuisooqataassallutit. Aamma SoMe-kanalit aqqutigalugit attaveqaqatigiinnermik suliaqartassaatit, tassanilu suliaqarnermi Community Management Manual-i atussavat. Tamatuma saniatigut attaveqaqatigiinnermut immikkoortortaqarfiup nittartagaa www.airgreenland.gl ingerlatissavat immikkoortortaqarfimmilu sulinerup nalaani vagt-iusarnermi peqataassallutit.

Suliassatit assigiinngitsorpassuussapput, taakkununngalu attaveqaqatigiittarfitsinnut assigiinngitsunut allakkiornerit, videoliornerit nipinillu immiussinerit ilaatinneqarput. Tusagassiorfinnut nalunaarutinik, attaveqaqateqarnissamut pilersaarutinik aammalu Attaveqaqatigiinnermut ingerlatsisoq suleqatitillu qanillugit suleqatiginerisigut suliffeqarfiup iluani avammullu pitsaasumik attaveqaqateqartarnissamik qulakkeerinninnissamik suliaqassaatit.

Air Greenland suliffeqarfiuvoq uummaarissoq, oqaluttuanik pissanganartunik ulikkaartoq. Atorfimmi suliassat annertuneri tamatigoortuunerilu tupaallaatigiumaarpatit. Air Greenlandimi immikkoortortaqarfiit assigiinngitsut, kiisalu avataani suleqatit pilersuisullu qanimut suleqatigissavatit.

Piginnaaneqarfitit

Eqqarsaatigaarput pilersaarusiorluni attaveqaqatigiittarnerup iluani attuumassutilimmik ilinniagaqassasutit misilittagaqassasutillu, kiisalu attaveqaqatigiittarfiit digitaliusut assigiinngitsut ilisimaarilluassagitit. Suliatigut piginnaaneqarfitit angusaqarfigerusussagitit, suleqatigiinnerlu aqqutigalugu aaqqiissutissanik pitsaanerpaanik ujartuiffiusuni suleqataasinnaassasutit naatsorsuutigaarputtaaq. Suliniutinik aqutsillaqqissuunissaq suliassanillu aaqqissuulluagaasumik suliarisinnaanermi assigiinngitsunik isiginnittaaseqarnermi inissaqatitsineq naatsorsuutigaarput.

Tunngavissanik ukuninnga naammassinnissinnaanissat naatsorsuutigaarput:

• Suliffeqarfimmi attaveqaqatigiittarnermik, tusagassiornermik assigisaanilluunniit attuumassutilimmik ilinniagaqarneq
• Atorfimmit assingusumit misilittakkat
• Allakkatigut – kalaallisut, danskisut tuluttullu – attaveqaqatigiittarnermut piginnaaneqarluarneq
• Inuiaqatigiit kalaallit pillugit ilisimasaqarluarneq
• Attaveqaqatigiittarfinnik digitaliusunik atuinissamut ilikkartikkuminassuseqarneq alapernaatsuunerlu

Air Greenlandip silaannakkut angallassinermi piujuartitsiffiusumillu ineriartortitsinermi siunissamut pissanganartumut ornigunnerani ilusilersueqataarusukkuit tusarfigerusuppatsigit. Ataatsimoorluta allanngueqataasinnaavugut, aammalu ilaasugut nunalu tamaat isigalugit attaveqaatinik suli nukittunerusunik pilersitsisinnaalluta.

Neqeroorutigaavut

Ulluinnarni pissanganartuni ulappuffiusartumilu atorfik pilerinartoq unammillernartorlu. Atorfimmi attaveqaqatigiinnermik ineriartortitsinermut pitsanngorsaanermullu piumasaqaatit eqqarsaatigalugit piginnaaneqarfinnik attuumassutilinnik qaffassaanissamut pikkorissarnissamut periarfissiisoqassaaq. Atorfimmi inunnut ataasiakkaanut piumasaqaatit naapertorlugit akissarsiaqartitsinissaq neqeroorutigaarput. Taakku saniatigut ilaqutariit ukiumoortumik sulinngiffeqarnermut atatillugu angalanernut akiliunneqartarnissaat, soraarnerussutisiassat, kiisalu sillimmasiissutit pilerinartut, ilaatigut piffissaq tamakkerlugu ajutoornissamut, ataatsimut inuunermut napparsimmavissuarmiinnermullu sillimmasiissutinik ilaqartinneqartut neqeroorutigineqarput.

Inga Dora G. Markussen telefon +299 34 32 47-mut imaluunniit e-mail: idm@airgreenland.gl aqqutigalugu attaveqarfigigukku paasissutissanik amerlanerusunik pissarsisinnaavutit.

Air Greenlandip ukiumoortumik nalunaarusiai uani atuarsinnaavatit: https://www.airgreenland.dk/om-os/ledelse-og-bestyrelse/arsrapport/

Pinerlussimannginnermut uppernarsaat: Piumasaqaatigut naapertorlugit uagutsinnut oqaloqatiginninnissamut aggersarneqarninni minnerpaamik pinerlussimannginnermut uppernarsaatip atuuttup assilineranik nassataqassaatit.