Departementimut Peqqissutsimut Inuiaqatigiinnullu Innarluutilinnut pisortaq

Namminersorlutik Oqartussat Peqqissutsimut Inunnullu Innarluutilinnut Naalakkersuisoqarfimmi pisortatut atorfimmut misilittagaqarluartumik aqutsisussarsiorput.

Aaqqissuussaaneq

Peqqissutsimut Inunnullu Innarluutilinnut Naalakkersuisoqarfik 20-nik sulisoqarpoq immikkoortortaqarfinnut sisamanut agguataarsimasunik. Naalakkersuisoqarfiup pingaarnertut suliassarai Peqqissutsimut Inunnullu Innarluutilinnut Naalakkersuisumut sullissinissaq siunnersuinissarlu, inunnut innarluutilinnut aamma imigassanik aalakoornartortalinnik nioqquteqarsinnaanermut akuersissutinut suliassaqarfinni oqartussanut pikkorissartitsinerit, peqqissutsimut, inunnut innarluutilinnut aamma innuttaasut peqqissusiannut periusissiorneq, pilersaarusiukkamik pinaveersaartitsinissamut suliniutinik aallartisaanissaq, inatsisiliorneq, kiisalu inatsisit atuuttut naapertorlugit nakkutilliinermik suliaqarnerit.

Peqqinnissaqarfik Peqqissutsimut Inunnullu Innarluutilinnut Naalakkersuisoqarfiup ataani qitiusumik ingerlatsinermut immikkoortortaavoq. Peqqinnissaqarfiup nuna tamakkerlugu neqeroorutaanik ulluinnarni aqutsineq immikkoortortamit akisussaaffigineqarpoq, tassunga ilanngullugit napparsimmaviit, peqqissaaviit katsorsaanermillu neqeroorutit immikkut ittut. Peqqissutsimut politikkip atulersinneqarnera, napparsimasunik katsorsaanerup pitsaasuunissaa aamma kommunit suliatigullu suliassaqarfiit akimorlugit peqqissutsimut tunngasunik suliniutit ataqatigiissarnissaat peqqinnissaqarfimmit qulakkeerneqartussaapput.

Pissassarfik Peqqissutsimut Inunnullu Innarluutilinnut Naalakkersuisoqarfiup ataani inissisimavoq.

Pissassarfik tassaavoq nuna tamakkerlugu inunnut innarluutilinnut sullissivik piginnaanngorsaavillu. Sullissivik siunnersuinermik, pikkorissartitsinermik, qulaajaanermik malitseqartitsinermillu neqerooruteqarpoq, aammalu kommunit peqqinnissaqarfillu qanimut suleqatigalugit ataatsimoortumik isiginneriaaseqarluni pilersaarusiornernik qulakkeerinninnissamik suliaqarluni.

Naalakkersuisoqarfiup aamma Nunatsinni Nakorsaaneqarfik aamma Kalaallit Nunaanni Peqqissusermik Ilisimatusarfik qanittumik suleqatigai.

Akisussaaffeqarfik

Naalakkersuisoqarfimmi ulluinnarni aqutsineq naalakkersuisoqarfiup pisortaanit aqutsisoqatigiit sinneri suleqatigalugit isumagineqarpoq aammalu Peqqissutsimut Inunnullu Innarluutilinnut Naalakkersuisumut naalakkersuisoqarfiup akisussaaffeqarfiata iluani siunnersuisarluni.

Suliassat ilaatigut tassaapput:

• Naalakkersuinikkut suliniutinik atulersitsineq aamma peqqissutsimut pinaveersaartitsinermullu suliassaqarfimmi ineriartortitsinerup ingerlateqqinneqarnerata suleqataaffiginera.

• Aningaasatigut atugassarititaasut pitsaanerpaamik atorluarneqarnissaat qulakkeerniarlugu suliniutinik aallartisarneqarsimasunik ingerlaavartumik nalilersuisarneq.

• Naalakkersuisoqarfiup peqqinnissaqarfiullu aningaasaqarnerisa aqunneqarnerinut qullersatut akisussaaneq, tassunga ilanngullugit aqutsinermut ilusilianik pingaarnersiuinissamullu sakkussanik ineriartortitsineq.

• Naalakkersuinikkuit aqutsisut isummernissaannut tunngavissianik suliaqarneq aammalu naalakkersuinikkut aalajangikkanik siunnerfilimmik angusaqarumallunilu piviusunngortitsineq.

• Naalakkersuisoqarfinnut allanut, sullissivinnut suliaqartunullu allanut tunngatillugu naalakkersuisoqarfiup suliassaanik ataqatigiissaarineq aammalu taakkununnga suleqatigiinnikkut atassuteqarnerit pitsaasuunissaannut maligassiuineq.

• Nalinginnaasumik allaffissornikkut malittarisassanik, ingerlatseriaatsinik pitsaassutsimullu piumasaqaatinik piviusunngortitsinissaq, aaqqissuussaanermik ineriartortitsineq aamma pitsaasumik erseqqissumillu attaveqaqatigiinnerup tungaatigut piginnaasanik ineriartortitsineq.

• Suliassat pillugit pilersaarusiorneq sulisutigullu isumalluutinik atuilluarneq.

• Peqqissutsimut tunngasunik suliniutit pillugit innuttaasunut paasissutissiisarnerup pitsaasuunissaanik qulakkeerinninneq.

Ukiuni aggersuni suliassaq qitiusoq tassaassaaq inuiaqatigiit agguataarsimanerannut tamatumalu aningaasatigut tatisineranut tunngatillugu unammilligassanut peqqinnissaqarfiup naleqqussarneqarnissaa. Taamaattumik pingaaruteqarpoq aningaasaqarnikkut ajornartorsiutit pisariusut pillugit naalakkersuinikkut aalajangiiffigisassatut pingaarnersiugassatullu saqqummiussissutinik suliaqarsinnaanissaq.

Piginnaasat

Atorfiup inuttalerneqarnerani pingaartinneqassapput:

• Naleqquttumik ingerlaqqiffiusumik ilinniagaqarneq, aammalu naalakkersuisoqarfiup akisussaaffeqarfianut tamarmut imaluunniit ilaanut suliatigut naleqquttumik ilisimasaqarneq.

• Inuiaqatigiit kalaallit paasisimasaqarfigilluarnissaat kalaallit oqaasii ilanngullugit aammalu Naalakkersuisut, Inatsisartut kommunillu akornanni sunniivigeqatigiittoqartarneranik ilisimasaqarluarneq.

• Periusissiornikkut aningaasaqarnermik aqutsinermik misilittagaqarluarneq, tassunga ilanngullugit missingersuusiornermik, pingaarnersiuinermik sulianik aningaasaqarnermillu misissueqqissaarnernik ukiuni arlalinni misilittagaqarneq – iluassaarlu peqqissutsimut tunngatillugu aningaasaqarnermik paasisimasaqarneq imaluunniit atugarissaarneq pillugu suliassaqarfinni anginerusuni allani aningaasaqarnermik aqutsinermik misilittagaqarneq.

• Atugarissaarneq pillugu suliassaqarfiit iluanni iluarsartuusseqqinnermik suliaqarnermi angusat uppernarsaatissartallit pingaartinneqarluassapput.

• Suliassanut aaqqissuulluakkamik suleriaaseqarneq aammalu suliani pisariusuni tamaginnik malinnaasinnaassuseqarneq siuariartortitsisinnaanerlu.

• Sulinermi avatangiisit pitsaasuunissaat qulakkeerniarlugu tatiginassuseqarneq inunnullu atassuteqarnissamik pingaartitsineq - aqutsisutigoortumik aammalu aaqqissuussaanermi sulisut akornanni.

• Periusissiornikkut piginnaasaqarluarneq, tassunga ilanngullugit pingaarnersiuineq, sunniuteqaqataaneq politikkimullu paasisimasaqarneq.

• Aaqqissuussaanermi naalakkersuinikkut aqunneqartumi aqutsinermik misilittagaqarneq aammalu aningaasaqarnermik aqutsinermut akisussaaffeqarneq.

• Naalakkersuisoqarfiup qitiusutut suliassaasa sunniuteqarluartumik naammassineqarnissaannut tunngatillugu suliffeqarfiup iluani avataanilu suliaqartartunik peqataatitsisinnaassuseqarneq.

• Aqutsisinnaanermut ataqatigiissaarisinnaanermullu piginnaasaqarneq, aammalu pilersaarutinik annertunerusunik ingerlatsinissamik qulakkeerinnissinnaaneq.

Inuttut piginnaasat

Qinnuteqartunut nunami namminermi nunanilu tamalaani pissutsinik ilisimasaqarluarnissaq naatsorsuutigineqarpoq. Qinnuteqartoq eqqortoq attaveqaqatigiinnermut suleqatigiinnermullu piginnaasaqarluartuuvoq inuttullu sunniuteqarsinnaassuseqarluni. Saqqumisumik aqutsinissaq atorfimmi pisariaqarpoq, aaqqissuussaanermik ineriartortuartumik inuiaqatigiinnilu pisariaqartitanut naleqqussarneqartumi sunniuteqarluartumik ingerlatsinikkullu isumannaatsumik pilersitsillunilu attassisinnaasumik.

Tamatuma saniatigut qinnuteqartumut naatsorsuutigineqarpoq tatiginassusermik takutitsissasoq, suliaminut aaqqissuulluakkamik suleriaaseqassasoq sulinermilu avatangiisit pitsaasuunissaat qulakkeerniarlugu inunnut atassuteqarnissamik pingaartitsilluni - aqutsisutigoortumik aammalu aaqqissuussaanerup sinnerani sulisut akornanni.

Attaveqarneq

Naalakkersuisoqarfiup pisortaa naalakkersuisoqarfiup suliassaqarfiini taamatullu sulianut tunngatillugu ingerlatsinermi naalakkersuisoqarfimmillu ingerlatsinermi Naalakkersuisut naalakkersuinikkut anguniagaasa piviusunngortinneqartarnerat pillugu apeqqutini Peqqissutsimut Inunnullu Innarluutilinnut Naalakkersuisumut attaveqartarpoq.

Naalakkersuisoqarfinnut allanut tunngatillugu naalakkersuisoqarfiup suliassanik ataqatigiissaarisarneranut tunngatillugu, aamma nalinginnaasumik allaffissornikkut ingerlatsinermi anguniakkanik, malittarisassanik, pitsaassutsinullu piumasaqaatinik malitseqartitsinissamut tunngatillugu naalakkersuisoqarfimmi pisortaq Naalakkersuisut Siulittaasuata Naalakkersuisoqarfiani pisortamut attaveqartarpoq.

Atorfeqarnermi atugassarititaasut

Atorfik ukiuni sisamani piffissalikkamik inuttassarsiuunneqarpoq, piaartumik isumaqatigiissuteqarnikkulluunniit artorfinitsitsisoqassalluni.

Atorfik akissaateqarfimmi LR 39-mi maanna inissisimavoq. Akissarsiat tapit aalajangersimasut, soraarnerussutisiaqalernissamut nammineq akiliutit aamma ukiunut aalajangersimasunut atorfeqartitaanermut tapit ilanngullugit apriilip aallaqqaataani 2025-mi qaammammut kr. 98.600-upput ukiumoortumillu kr. 1.183.200-llutik.

Isumaqatigiissutini atugassarititaasut naapertorlugit tunngaviatigut atorfinitsitsisoqassaaq. Qinnuteqartorlu tjenestemanditut atorfeqareersimaguni Kalaallit Nunaanni pisortani tjenestemandit pillugit inatsit malillugu tjenestemanditut atugassarititaasut naapertorlugit atorfinitsitaasoqarsinnaavoq.

Aammattaaq aningaasarsiaqarani sulinngiffeqarallarnissaq pillugu aalajangersakkat naalagaaffimmi tjenestemandinut aamma AC-nut isumaqatigiissutinut arlalinnut atuupput, taakkulu Namminersorlutik Oqartussani inuit atorfinitsinneqartut aapparisaannut/inooqataannut aamma atuupput.

Piffissaq suliffiusussaq tunngaviatigut sapaatit akunnerannut nalunaaquttap akunnerinik 40-nik sivisussuseqarpoq. Atorfimmut atuuttoq tassaavoq, piffissap suliffiusussap qanoq sivisutiginissaa killilersugaanngimmat, aammalu qaangiuttoornermi ajunngitsorsiassat akilerneqarnissaat ullullu sulinngiffissat annaaneqartut ajunngitsorsiassarsissutiginissaat atorneqarsinnaanngillat.

Ineqarneq

Atorfimmut atatillugu inissaqartitsisoqanngilaq. Qinnuteqartoq Namminersorlutik Oqartussani atorfeqarnerminut atatillugu ineqarsimappat, inigisaq pigiinnarneqassaaq. Atorfeqarnermut atatillugu ineqartitaaneq atorfeqarnerup nalaani atuuppoq soraarnermilu tamanna atorunnaassaaq.

Paasissutissat amerlanerusut

Aaqqissuussaanermut pilersaarut aamma naalakkersuisoqarfiup suliassaata allaaserineqarnera uani atuarneqarsinnaavoq: https://naalakkersuisut.gl/Departementer/Sundhed_Personer_med_handicap?sc_lang=kl-GL

Namminersorlutik Oqartussani aqutsinissamut tunngavissaq uani atuarneqarsinnaavoq:

naalakkersuisut.gl/Departementer/Formandens_Departement/Ledelsesgrundlag

Qinnuteqarnissamut killigititaq: 7. oktobari 2025 nal. 12:00.

Qinnuteqaat nassiuguk