FAKTA
Atorfik: Inatsisartut Allattoqarfiat Sulisoqarnermut (HR) Allaffissornermullu immikkoortortamut immikkoortortami pisortamik sulisussarsiorpoq
Suliffeqarfik: Inatsisartut Allattoqarfiat
Qinnuteqarfissamut killigititaq: 14. august
Attavissaq: Steen Lynge, e-mail stlyn@ina.alla.gl
Allattoqarfik Allattoqarfimmi Sulisoqarnermut Allaffissornermullu immikkoortortami pisortamik sulisussarsiorpoq.
Immikkoortortami pisortaq aqutsisoqatigiinni ilaassaaq pisortarlu qullersarissallugu.
Atorfik pillugu
Sulisoqarnermut Allaffissornermullu immikkoortortaq suliffeqarfimmut tamarmut attaveqartarpoq aammalu ullut tamaasa assigiinngitsorpassuarnut attaveqartarluni. Sullissinermut immikkoortortami sulisut aqutsisuuffigissavatit.
Immikkoortortami pisortap suliffeqarfimmi immikkoortortani tamani suliassat kingulianiittut ilaatigut ingerlatarissavai:
Immikkoortortani assigiinngitsuni sulisussarsiortarnermi ikiuunneq
Sulisoqarnermik nalinginnaasumik aqutsinermi ikiuunneq, sulisut ilaasortallu ineqartinneqarnerat kiisalu sulisoqarnermi inatsiseqarnikkut sulianik ingerlatsineq
Sulisut kattuffiinik isumaqatiginninniarnerni peqataaneq
Akissarsialerinermi, akissarsianut missingersuusiornermi soraarnerussutisialerinermilu ikiuunneq
Sulisunik aqutsisunillu ineriartortitsinermi peqataaneq, tassungalu ilanngullugu pikkorissartitsinernik ilinniartitseqqinnernillu aaqqissuussineq suliariumannittussarsiuussinerlu
Aqutsisunut paasissutissanik suliaqarneq, sulisoqarnermut politikimik ineriartortitsineq nutarterinerlu aammalu sulisut atugaat pillugit pisortanik sulisunillu nalinginnaasumik siunnersuineq
Allattoqarfimmi paasissutissanik nalunaarsuisarnermik toqqorsiveqarnermillu ineriartortitseqqinnissamik qulakkeerinninneq
Sulisunik Inatsisartunullu ilaasortanik sullissinerup ingerlaavartumik ineriartortinneqarnissaanik qulakkeerinninneq
Sullivimmik nalilersuisarnermi periutsinut, sulisut sulinerminni atugaannik misissuinernut sulisullu sullinneqarnerannut akisussaaneq aammalu sulisut atugarissaarnissaannut sulinermilu avatangiisiannut atatillugu suliassat
Illit pillutit
Ilinniagartuutut naleqquttumik ilinniagaqartuuvutit aammalu sulisoqarnermut suliassaqarfimmi sulianik ilisimasaqarluartuullutit.
Inatsisartut Allattoqarfiat isumaqatiginninniartarnernik nammineq ingerlatsisarpoq illillu sulisoqarnermut pisortatut sulisut kattuffeqarfiinik isumaqatiginninniartoqartillugu aqutsisartuussaatit. Taamaattumik akissaatit sulinermilu atukkat pillugit isumaqatigiissutit ilisimasaqarfiginissaat assut iluaqutaassaaq.
Suliffeqarfimmi naalakkersuinikkut aqunneqartumi aqutsisutut sulinermik aammalu aqutsisutut suliassanik assigiinngitsorpassuarnik ingerlatsinermik misilittagaqartuuvutit.
Siunissamut isiginnississaassuseqarluartuuvutit aaqqissuussaanermillu paasisimasaqarluarlutit kiisalu suliffeqarfiup, suleriaatsit sulisullu periutsit iliuusissatullu pilersaarutit naapertorlugit qanoq ineriartortinneqarsinnaanerannik soqutiginnittuullutit.
Inuttut attaveqartarnikkullu piginnaasat
Inunnut attaveqarsinnaassuseqarluarneq, tatiginartuuneq suliffeqarfimmilu sulisunik tamanik naligiimmik suleqateqarsinnaaneq
Aaqqissuussaanikkut sulisoqarnikkullu aaqqiagiinngissutinik ilisimasaqarluarluni piginnaasaqarluarlunilu sulissutiginnissinnaassuseqarneq
Aalajaatsuuneq, suleqateqarsinnaassuseqarneq, qiimasuuneq suleriaatsillu malillugit sullisserusussuseqarluni suleriaaseqarneq
Uagut pilluta
Inatsisartut Allattoqarfiat Kalaallit Nunaanni Inatsisartut allaffeqarfigaat. Inatsisartut ukiumut marloriarlutik nalinginnaasumik ataatsimiittarnerinik aaqqissuussisarpugut aammalu Inatsisartunut ilaasortat 31-t taakkulu ataatsimiititaliaat sullitaralugit. Maanna sulisut 30-t missaanniippugut, taakkunannga ataatsimiititalianut allatsit ilinniagartuut quliullutik.
Qinnuteqaat uunga nassiunneqassaaq:
Inatsisartut Allattoqarfiat
Postboks 1060
3900 Nuuk
Grønland
imaluunniit mailikkut uunga atorfik@ina.alla.gl
Inuunermit taasassat soraarummeersimanermullu uppernarsaatit, tassungalu ilanngullugit ilinniakkanit tamanit karakteerit allattorsimaffiisa assilineri qinnuteqaammut ilannguteqquneqarput.
Qinnuteqarnissamut killissarititaq: 14. august 2026
Atorfinitsitsineq pissaaq 1. oktober 2026 imaluunniit isumaqatigiissuteqarnikkut. Oqaloqateqarnerit ingerlaavartumik ingerlanneqassapput.
Pisortani atorfigisamit allamit sulinngiffeqarnissamut periarfissaq
Naalagaaffimmi atorfeqartuuit imaluunniit Danmarkimi kommunit ilaanni suliffeqartuuit? Naalagaaffimmi tjenestemandit imaluunniit AC-tut isumaqatigiissutit arlallit malillugit atorfillit Kalaallit Nunaanni Namminersorlutik Oqartussani atorfininnermut atatillugu akissarsiaqaratik sulinngiffeqarsinnaatitaapput.
Atorfimmut atatillugu inissiamik innersuussisoqarsinnaavoq malittarisassat atuuttut malillugit akilersorneqartussamik. Nuummili inissaaleqineq pissutigalugu inissiamik innersuussisoqannginnerani utaqqiisaasumik inissiami piffissami sivikinnerusumi inissinneqarnissaq naatsorsuutigineqarsinnaavoq. Atorfinikkiartorluni angalanermut pisattallu angallanneqarnerinut akiliunneqarsinnaatitaaneq isumaqatigiissut atuuttoq naapertorlugu pissaaq.
Akissarsiat atorfeqartitaanermilu atugassarititaasut pillugit paasissutissat
Naalakkersuisut ilinniagartuullu kattuffiisa akornanni pisortatut atorfiit pillugit isumaqatigiissut kiisalu Inatsisartut Siulittaasoqarfiata Djøf-illu isumaqatigiissutaareersumut ilanngunnermik isumaqatigiissutaat naapertorlugu immikkoortortami pisortatut atorfinitsitsisoqassaaq.
Atorfiup imarisai imaluunniit sulinermi pissutsit allat pillugit paasissutissanik erseqqinnerusunik pissarserusukkuit uunga saaffiginninnissannut tikilluaqqusaavutit:
Pisortaq Steen Lynge, e-mail stlyn@ina.alla.gl
Paasisaqarnerorusukkuit
Inatsisartut aamma Inatsisartut Allattoqarfiat uani annertunerusumik paasisaqarfigisinnaavatit www.inatsisartut.gl
