Inatsisileritooq (AC -fuldmægtig) Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmut

Kalaallit Nunaata imminut napatinnissaanut  inuiaqatigiinni immikkoortortat pingaarnersaasa ilaanni ataatsimi inatsisit sinaakkutaasa ilusilersornerini peqataarusuppit? Inatsisit paasiuminaatsut ajornartorsiutigineqartarnerinik, naalakkersuinermik sulialinnik sullississallutit aamma sullivimmi avatangiisini illit ilinniarsimassutsivit toqqaannartumik inuiaqatigiit ineriartornerinut sunniuteqartussanik suliaqassallutit ilorrisimaarnariviuk? Taamaappat illit taannaasimassaatit inatsisileritooq uagut ujartugarput.

Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmi Kalaallit Nunaata isumalluutai uumasut aqunneqarnerini imminut nammassinnaasumi akisussaassuseqartumillu qulakkeerinnilluni sulinermi qitiusumik inissisimaffeqalissaatit. Aalisarneq piniarnerlu nunap aningaasaqarneranut, kulturianut aamma siunissami ineriartorneranut qitiulluinnartuupput — aamma illit inatsisilerituutut aalajangiinerit, inatsisit aqutsinerillu inatsisinik patajaatsumik tunngaveqarneri pingaarutilittut inissisimallutit qulakkeertassavatit.

Suliassat

Atorfik aqqutigalugu siammasissumik unamminartumillu naalakkersuinermik suliallit aalajangersimasumik suliassaannik suliaqartalissaatit, tassani illit naalakkersuisoqarfiup suliassaqarfiata tunngavii aallaavigalugit inatsisiliorneq inatsisinik nalunaarutinillu nutarterinerit aamma inatsisilerituut oqaaseqaataannik suliaqarnerit suliarisassavatit. Naalakkersuisumik ingerlaavartumik sullissinermi peqataassaatit aamma Inatsisartunut taakkualu ataatsimiititaliaannut akissusiortassallutit. Taakku saniatigut naalakkersuisoqarfimmi sulisut aqutsinermut inatsit pillugu siunnersortassavatit, inatsisit qanoq paasineqarnissaannik nassuiaasassallutit, aalajangiussassat tunngaviisa pitsaassusaannik qulakkeerinnittarlutit kiisalu Inatsisartut Ombudsmandiata saaffiginnissutaanik suliaqartassallutit. pinngortitami isumalluutit nungusaataanngitsumik aqunneqarnerisa malittarisassiuunneqarnerini peqataanissannut aamma periarfissaqassaatit, aamma siunissaq ungasinnerusoq eqqarsaatigalugu nunat tamalaat aalisarneq pillugu isumaqatigiissusiorfiginerini peqataasinnaassallutit, taakkunani illit inatsisinik paasinnittarnerit iluaqutigalugu Kalaallit Nunaata inissisimaffianut sunniisarsinnaassaatit.

Immikkoortortaqarfimmi ilinniakkatigut ataatsimoorussillaqqissumi, ammasumik oqaloqatigiiffiusumi, aamma suliap aaqqiiviginiarnerani suleqatigiinneq qitiutillugu suliaqarfiusartumi peqataalissaatit. Suleqatit qanimut isumasioqatigisarlugit, ingerlaavartumik ilisimasanik avatseqatigiittarluni sulisoqartarpoq aamma inatsisiliornermi pitsaassuseq qaffasissoq qulakkeerniarlugu ikioqatigiittarneq ileqquuvoq. Ilutigisaanik Naalakkersuisoqarfiup immikkoortortaasa tallimaasut assigiinngitsut suleqatigiinnerini pissusissamisoortumik inissisimassaatit, taakkunani suliat pisariusut amerlanertigut ataqatigiissaarneqarnissaminnik, ataatsimoorunneqarlutik pingaarnersiuiffigineqarnissaminnik aamma suliaqarfiit assigiinngitsut ataatsimoorullutik inatsisitigut ikiorteqarnissaminnik pisariaqartitsikkajuttarput. Tamanna ima paasineqassaaq; illit immikkoortortaqarfimmi nukittuumik ataatsimoorfiusoq suliffimmilu tamarmi siammasissumik attaveqarfiusartoq suleqataaffigilissagit, tassani illit ataqatigiittoqarnissaanik, inatsisitigut qulakkeerinnittoqarnissaanik aamma naalakkersuisoqarfiup tamarmiusup sulinerata pitsaassusaanik pilersitseqataasassaatit.

Suliffimmi ileqqorissuunerup attatiinnarneqarnissaanik samminnittoqartarpoq, tassani sulinerup saniatigut eqaatsumik pissuseqarnissaq inuuneqarnissarlu inissaqartinneqartarput, aamma tassani illit sullivimmi avatangiisit pitsaasut ulluinnarnilu aalajaassuseq suliatigut angorusutatit oqimaaqatigiissaarsinnaassavatit.

Illit piginnaasatit

Inatsisileritooq inatsisilerituutut ilinniarsimasoq misilittagaqarluartoq aamma inatsisinik paasiuminaassinnaasunik erseqqissumik eqqortumillu oqaasertalersuisinnaasoq ujarparput. Suliffeqarfik naalakkersuinermik suliallit aqutaat suliffigissallugu ilorrisimaarnarissavat, tassani sulineq sukkasuumik pisarpoq, aamma inatsisinik nalilersuinerit pitsaasut qularnaatsullu tunniunneqartartussaapput. Namminersorlutit, aaqqissuussaasumik suleqatiginnikkusullutillu sulissasutit, naalakkersuinermik suleriaatsinik soqutigisaqassasutit aamma illit ilinniakkat suliffeqarfimmi atorusussagit, tassani inatsisitigut aalajangikkat toqqaannartumik inuiaqatigiit ineriartornerinut sunniuteqartarput.

Kalaallit Nunaanni Namminersorlutik Oqartussani sulisartutut inuuneq suliffimmilu qaffassarnissamut periarfissat

Kalaallit Nunaanni Namminersorlutik Oqartussani inatsisilerituutut suliffeqarfimmi inatsisit pitsaassusaannik inuiaqatigiinnullu akisussaaffik imminnut qanittuaqqat peqataaffigilissavatit. Naalakkersuinermik suliallit aalajangeeriaasii qanimut suliarisalissavatit aamma illit suliavit inuiaqatigiinnut toqqaannartumik sunniutaannik takunninnissamut periarfissaqalissaatit. Atorfiup suliatigut patajaatsumik inerisassavaatit, naalakkersuinermik suliallit aqutaannik suleriaatsit siammasissut paasinissaannut periarfississavaatit aamma suliaqarfiup ataatsip nuna tamakkerlugu sunniuteqartartorujussuup misilittakkanik tuniorassavaatit.

Ilutigalugu Nuummi inuiaqatigiit soqutiginartut neqeroorutaasinnaassapput aamma ilinniakkatigut itinerusumik paasisaqarnissannut pitsaasunik sinaakkutinik tunissavaatit inuttullu ilorrisimaartissallutit neqeroorfigisinnaassallutit. Neqeroorutit tamarmiusut inatsisilerituutut atorfinittussamut ilinniakkatigut qaffassarusuttumut aamma inuiaqatigiinnut attuumassutilimmik suliaqarusuttumut kajungerilersissapput.

Ulloq atorfiniffissaq  
Atorfiniffissaq tassaavoq 1. December 2026 isumaqatigiissuteqarnikkulluunniit inissinneqarsinnaalluni.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.
Qinnuteqartoq uppernarsaatitalinnik piginnaasalik immikkut siunnersortitut, siunnersortit pisortaatut siunnersortaanertulluunniit isumaqatigiissutit naapertorlugit atorfinitsinneqarsinnaasarpoq.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.