Inatsisilerituutut atorfik soqutiginartoq – Siunissami nunatsinni ilisimatusarnermut sinaakkutit ilusilersoqataaffigikkit

Ilisimatusarnerup inuiaqatigiit nammaqatigiissumik ineriartortissagaa qulakkeernissaa

peqataaffigerusuppiuk? Inatsisilerinermik misilittagaqarpit aamma ilisimatusarnermi sinaakkutit ukkatarerusuppigit? Taava immaqa tassaavutit inatsisileritooq Ilisimatusarnermik Ingerlatsivimmut ujartugarput.

Atorfik pillugu

Kalaallit Nunaanni ilisimatusarnerup ineriartorteqqinnissaanut kiisalu Ilisimatusarnermik ingerlatsivimmut inatsisitigut siunnersuisussamik, Naalagaaffinngornissamut Nunanullu allanut Naalakkersuisoqarfik inatsisilerituussarsiorpoq.

Aaqqissuussaanikkut atorfik Ilisimatusarnermik ingerlatsivimmi allaffimmi pisortap ataaniippoq. Kalaallit Nunaanni ilisimatusarnermut, Ilisimatusarnermik ingerlatsivik Naalakkersuisut oqartussaraat. Ilisimatusarnikkut oqartussatut, ineriartortitsinermillu suliassat Ilisimatusarnermik ingerlatsiviup qitiusumik suliassarai. Politikkikkut anguniagassatut akuersissutigineqarsimasut piviusunngortinneqarnissaannut tamatigoortumik isiginnissuseqartumik aaqqiissutissarniornissanut akisussaaqataassaatit. Nunatsinni Ilisimatusarnermut periusissiaq 2022-2030-mi anguniakkat atuutsilersinneqarnissaat, Ilisimatusarnermik ingerlatsivimmi ilaatigut ukkatarineqarpoq.

Taassumap saniatigut ilisimaqqaakkat, najukkamilu ilisimasat ilisimatusarnermi eqqarsaatigineqarnerulernissaat, najukkamilu tunngaveqarnissaat, taamaalillunilu inuiaqatigiinnik piujuartussamik ineriartortitsinermut tapersiinissaat sulissutigineqarpoq.

Ilisimatusarnermik ingerlatsivimmi pingaarnertut inatsisilerituujussaatit, naalakkersuisoqarfimmilu aamma Namminersorlutik Oqartussani inatsisilerituunik allanik suleqateqassallutit. Pikkorissarnikkut, pilersaarusiukkamillu atorfimmi ineriartornikkut sulisut suliatigut ineriartornissaanni tapersersussallugit Naalakkersuisoqarfiup pingaartippaa. Naalakkersuisoqarfimmi suleqatigiinneq persuarsiunngitsumik suleqatigiinneruvoq, suliniutillu pingaartinneqarlutillu tapersersorneqartarlutik.

Ilaatigut suliassatit

Ineriartortitsineq, Kalaallit Nunaannilu ilisimatusarnermut inatsisitigut naleqqussaanissamut periarfissaasunut atatillugu inatsisitigut siunnersuinissaq pingaarnertut suliassarissavatit.

Taassumap saniatigut ilisimatusarnissamut qinnuteqaatinut atatillugu kiisalu ilisimatusarnermut atatillugu inatsisitigut suliassanut allanut suliaqarsinnaanissaq naatsorsuutigineqassaaq.

Taassumap saniatigut maani nunami, nunallu avataani suleqatigisanik isumaqatiginninniarnerni peqataasinnaassassaatit.

Atorfimmut atatillugu angalangaatsiartarnissaq naatsorsuutigineqassaaq.

Neqeroorutigaarput

• Annertuumik akisussaaffeqarneq, pitsaasumillu allanngueqataanissamut periarfissat.

• Suliatigut ineriartornissamut periarfissagissaarluni atorfik pissanganartoq.

• Immikkoortortaqarfik suliatigut ilisimasaqarluartoq, piginnaasaqarluartoq, nuannersumillu sulliviusoq.

• Ataqqinnilluni, tatiginnillunilu persuarsiunngitsumik, nuannersumillu suliffiulluni suliffik pilerinartoq.

• Nunagisaq, nunarsuarmioqataanerlu annertuumik ukkataralugit suliaqarfik tamatigoortoq, soqutiginartorlu.

Pingaartipparput

• Inatsisiliornermik aamma inatsisinik misissuinermik misilittagaqartutit,

• Bacheloritut imaluunniit kandidatitut inatsisilerituutut ilinniarsimasutit,

• Politikkikkut aqutami sulinermik misilittagaqarlutillu paasisimasaqartutit,

• Suliniutinik suliaqallaqqittutit, namminersorlutillu sulisinnaasutit,

• Kalaallit Nunaanni pissutsinik ilisimasaqartutit imaluunniit taakkua ilisimalernissaannut piumassuseqartutit.

Qinnuteqartunut ukiorpaalunni misilittagaqarnerminnik uppernarsaasinnaasunut, siumut isumaqatigiissuteqarnikkut immikkut siunnersortitut atorfinitsitsisoqarsinnaavoq.

Paasissutissat annertunerusut

Paasissutissanik annertunerusunik pisariaqartitsissaguit allaffimmi pisortaq Kunuk Holm, oqarasuaammut +299 345127-imut, e-mail: khol@nanoq.gl-imut attavigisinnaavat.

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.

E-mail-ikkut qinnuteqaatinik tigusineq ajorpugut.

Qinnuteqaat nassiuguk