Isumaginninnermut Aqutsisoqarfik Ulloq unnuarlu inissitsiterinermullu immikkoortortaqarfik isumaginninnermut siunnersortimik pissarsiorpoq

Isumaginninnermut Aqutsisoqarfik pillugu 
Isumaginninnermut Aqutsisoqarfik Meeqqanut, Inuusuttunut aamma Ilaqutariinnut Naalakkersuisoqarfiup ataaniittuuvoq, immikkoortortallu tallimat makku immikkoortortaralugit: Paarisa, Ulloq Unnuarlu inissitsiterinermullu immikkoortortaqarfik, Sullissisunik siunnersuisarnermut immikkoortortaqarfik, Aningaasaqarnermut immikkoortortaqarfik aammalu Allattoqarfik. Immikkoortortaqarfiit imminnut qanimut suleqatigiittuupput aamma suliffeqarfik suliatigut unammillernartorpassuaqarluni. 
 
Atorfik pillugu:
Isumaginninnermut siunnersortimik pissarsiorpugut Ulloq Unnuarlu Inissitsiterinermullu immikkoortortaqarfimmi innersuussisartussamik, kommunimi inunnik isumaginninnermik sullissinermik misilittagalimmik kiisalu inatsit naapertorlugu sulinermik ilisimasalimmik. 

Ulloq unnuarlu inissitsiterinermullu immikkoortortaqarfimmi innersuussinerit, kommunini aammalu ulloq unnuarlu paaqqinnifinni/ulloq unnuarlu neqeroorutini sullissisunik siunnersuineq ilitsersuinerlu suliarineqartarput. 

Ulloq Unnuarlu Inissitsiterinermullu immikkoortortaqarfiup qitiusumik inissiinissamut innersuussisarfimmik (inissiinissamut innersuussisarfik) ingerlatsivoq, aammalu nuna tamakkerlugu meeqqanut inuusuttunullu ulloq unnuarlu paaqqinniffiit Namminersorlutik Oqartussanit pigineqartuni pingaarnertut aqutsineq, ataqatigiissaarineq aammalu ingerlatsineq ingerlanneqarlutik. Taamatuttaaq ulloq unnuarlu paaqqinniffinni aammalu ulloq unnuarlu neqeroorutini sulisut aqutsisullu piginnaanngorsaqqinneqarnissaannut atatillugu ineriartortitsinermi suliassat ingerlatarai. Suliassaqarfimmi inatsisitigut aammalu inunnik sullissinermi suliatigut ilisimasat aammalu suleriaatsit nukittorsernissaat siunertaralugu.

Innersuussisartup pingaarnertut suliassai tassaapput ulloq unnuarlu paaqqinniffinnut inissiinissamut innersuussinerit, angerlarsimaffiup avataanut inissiinerit imaluunniit meeqqanut, inuusuttunut imaluunniit inunnut innarluutilinnut ulloq unnuarlu neqeroorutit pillugit kommuninik siunnersuineq aammalu ilitsersuineq. Sulianik ingerlatsinermi inatsisilerinikkut aamma isumaginninnikkut pitsaassutsip qaffassarneqarnissaanut peqataaneq kiisalu kommunit akornanni assigiissaartumik suliamullu tunngavilimmik ingerlatsinermik tapersersuineq aammattaaq innersuussisartup suliaanut ilaapput. 

Sulinermi suliassat/suliassaqarfiit:

• Inissiinermi sulianut, innersuussinernut aammalu inatsimmut tunngatillugu sulianik suliarinninneq.

• Ulloq unnuarlu paaqqinniffinni isumaginninnermi suliatigut siunnersuineq ilitsersuinerlu. 

• Kommuninut isumaginninnermi suliatigut siunnersuineq ilitsersuinerlu. 

• Siunertarisanut nassuiaasiornerit aammalu ulloq unnuarlu paaqqinniffinnut Namminersorlutik Oqartussanit pigineqartunut sullissinissamik nalunaarusiornerit. 

• Ulloq unnuarlu suliassaqarfik ataatsimut isigalugu suliniutinik nutaanik ineriartortitsineq. 

• Inissiinermi suliani aammalu innersuussisarnermi maleruagassat suleriaatsillu suliarineqarnerinut ikiuunneq.  

• Forstanderit isumasioqatigiissinneqarnissaannut ataqatigiissaarinermut suleqataaneq. 

• Allaffissornermi saniatigut suliassani allani ikiuunneq. 

Uagut naatsorsuutigaarput illit tassaasutit:

• Isumaginninnermi siunnersortitut ilinniarsimasoq. 

• Sulianik suliarinninneq aammalu isumaginninnermi inatsit pillugit ilisimasaqarluartoq. 

• Isumaginninnermi suliassaqarfimmiit misilittagalik. 

• Namminersorluni sulisinnaasoq, eqinnaatsoq, aaqqissuussamik sulisinnaasoq aammalu aaqqiissutissarsiorluni sulisinnaasoq. 

• Kalaallisut aammalu danskisut allattariarsornikkut/oqaluttariarsornikkut pikkorissoq. 

• Suleqatiginnillaqqissoq aammalu attaveqaqatigiinnermut pikkorissoq.  

• Isumaginninnermi Aqutsisoqarfimmi suliassat pillugit namminersuutigalugu aaqqiissutissarsiornermi akisussaaffimmik tiguserusussuseqartoq. 

• Suliffimmi sulisunik assigiinngitsunik tunuliaqutaqartunik, sulisut tamarmik ataasiakkaarlutik tamakkiisumik aaqqiissutissarsiornissamut sulisunut, suleqataarusussuseqartoq.

• Suliffimmi ulapaarfiusumi ineriartorfiusumilu sulerusussuseqartoq aammalu sulianik arlalinnik ataatsikkut ingerlataqarsinnaasoq. 

Sulinermut atatillugu angalasarnissaq naatsorsuutigineqassaaq. 

Akissarsiat atorfininnermilu tunngasut
Akissarsiat atorfeqarnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut pisinnaatitaaneq, Kalaallit Nunaanni Namminersorlutik Oqartussat kattuffiullu isumaqatigiinniarsinnaatitaasup akornanni isumaqatigiissutaasut atorfininnerup nalaani atuuttut naapertorlugit.

Ineqarneq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik.  Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq.

Piffissaq atorfinititsiviusussaq:
1. september 2026 imaluunniit qanimut isumaqatigiissuteqarnikkut atorfinititsineq. 
 
Paasissutissat sukumiinerusut
Atorfik pillugu paasisaqarnerorusukkuit allaffimmi pisortap Sorlannguaq Mørch-ip mailatigut somo@nanoq.gl imaluunniit oqarasuaataatigut 34 64 30 attaviginissaanut tikilluaqqusaavutit.