Visit Greenland akisussaassuseqartumik takornariaqarnermik inerisaanermut soqutigisaqarluartumik anguniagaqallaqqissumillu suliniutinut aqutsisussarsiorpoq

Takornariaqarnerup iluani pingaarutilimmik Kalaallit Nunaat ineriartortitsiviuleruttorpoq. Siornatigut takusimanngisatsitut nunarsuup sinneranut nunarput ammaakkaluttuarneqarpoq, aammalu takornariaqarnermut naatsorsuutit alliartuinnarlutik. Tamanna nutaanik piumasaqaateqarfiuvoq, takornariaqarnikkulli inuussutissarsiuteqarnermut aamma periarfissanik nutaanik pilersitsiviulluni.

Akisussaassuseqartumik periarfissat atorniarlugit, nunatut ornitassatut misigisassat pitsaassutsimikkut qaffasissut tunniuttussaavagut – isumannaallisaanikkut qaffasinnerpaamik aammalu pinngortitamut, piorsarsimassusitsinnut najukkamilu inuiaqatigiinnut ataqqinnissuseqartumik. Inuussutissarsiutillu nammineerluni tunniussinnaasaasa akisussaassusilimmik ineriartortinnissaannut nukittorsarnissaannullu, ikorfartuiniarnermi sakkussat tigussaasut piginissaat matumani piumasaqaataavoq.

Taamaammallu massakkut anguniagaqallaqqissumik suliatigullu angusaqarusussusilimmik suliniutinut aqutsisussarsiorpugut, takornariaqarnerullu siunissaanut annertuumik pingaarutilimmik nunat tamalaat akornanni uppernarsaasersuinissamik aqutsisinnaasumik. Suliniut EU-p programmianit ”Green Transition”-imit aningaasaliiffigineqartoq eqaatsumik, ammasumik uuttorneqarsinnaasumillu uppernarsaasersuinissamut aaqqissuussinermik ineriartortitsinissamik siunertaqarpoq. Aaqqissuussineq nunat tamalaat akornanni malittarisassanut assingusuussaaq – takornariaqarnikkulli suliaqarfiup nammineerluni pisariaqartitai, ingerlanneqarnera piviusullu aallaavigineqassapput.

Takornariaqarneq akisussaassuseqarfiusoq avataanit piumasaqaateqarfigineqarfiuinnartussatut isumaqartinngilarput. Aammali ullut tamaasa takornarialerinermik suliaqartunut sammiviliisussat piviusumillu iluaqutissiisussat sakkussat atorlugit - takornariaqarnikkut inuussutissarsiornerup ilorpiaanit nukittorsarneqarnissaanut tunngassuteqartorujussuuvoq.

Suliffik pillugu Takornariaqarnikkut pitsaassutsit akisussaaffeqarnerullu nukittorsarnissaanik nunatsinni takornarialerisut qanimut suleqatigalugit, Visit Greenlandip immikkoortortaqarfiani Destination Development & Cruisemut suliniutinut aqutsisutut ilannguffigissavatit. Nuna tamakkerlugu periusissiat suliniutissatut tigussaasunngortinnissaanni suleqatigiit qitiusumik atuuffeqarput, uppernarsaasersuinerullu aallartinneqarnissaanut illit qitiusumik inissisimassaatit.

Uppernarsaasersuinermut suliniutip ingerlanneqarnissaa aallaqqaataanit naammassinissaanut – ineriartortinneraninngaanniit pilersaarusiornissaanut, atuutilersillugulu sulianut piviusunut atorneqalernissaa akisussaaffigissavat. Taamatut akisussaaffeqalernermi soqutigisaqaqatigiit siammasissut, matumani suliffeqarfiit takornarialerisut, inuussutissarsiutinut suliassaqarfinnut kattuffiit oqartussallu qanimut suleqatigineqassapput. Ataqatigiissaarinermik, oqaloqatigiinnernik ingerlatsisuuneq, aningaasaqarnikkut aqutsineq ataavartumillu uppernarsaasersuinerit suliassarissavatit.

Periusissiornikkut siunnerfilimmik ataatsimoortumillu isiginnittaaseqarluni eqqarsarsinnaanermik atorfik piumasaqaateqarfiuvoq – kisianni aamma annikitsualunnut tapissuussaatit sulianillu piviusunik naammassisaqarluarsinnaassaatit. Ineriartortitsineq ingerlatsinerullu paarlakaajaallugit naleqqussarfigisarlugit sulinissat iluarisimaarlugu sulisinnaassaatit akisussaaffimmillu tigusisinnaassuseqarlutit, suliallu ingerlarnganik ingerlatsiutigalutit siuariartornermik aqutsinnaassaatit.

Pingaarnertut suliassatit tassaapput:

● Takornariaqarnermi uppernarsaasersuinermik suliniummik ineriartortitsillunilu ingerlatsineq

● Suliniutip ingerlanera tamaat siuariartornissamik, ataqatigiissaarinissamik pitsaassusilimmillu ingerlatsinissamik qulakkeerinninnissaq

● Takornarialerisunik, oqartussanik inuussutissarsiuteqartunillu allanik suleqateqarnermik pilersitsillunilu nukittorsaanissaq

● Aningaasaqarnermik malinnaaffiginninnissaq, nalunaarusiortarnissaq allattugaatitigullu uppernarsaasersuinissaq

● Suliniutip inernerinik saqqummiussisarnissaq peqataatinneqartunullu piginneqataalersitsinissaq peqataatitsilernissarlu

Illit pillutit

Angusaqarusuttuullutit suleqateqallaqqissuuvutit, ukkassiffiusumik angusaqarusussuseqarluarlutit allanik suleqateqarsinnaallutit – kiisalu namminersullaqqissuullutit suliassavillu aallartinneraninngaanniit naammassinissaanut akisussaaffeqarlutit naammassinnittarlutit. Suliat qaffasissumik pitsaassusillit tunniunnissaat pingaartitaraat, pilersitsisuuneq, naleqqussallaqqissuseq annikitsualunnullu tappissuuneq suliffigisimasanni ilisimaneqaatigaat.

Suliniutinik annertunerusunik aqutsinermik aammalu immikkoortut suliat aqqusaagassat tamarmik isumannaatsumik aqqusaartorneqarnissaannik aqutsinermik misilittagaqarnissat naatsorsuutigaarput. Akisussaassuseqartumik ineriartortitsineq pissusissamisoortussatut pingaartitaraat, ESG-milu tunngavinnut piujuartitsillunilu suliniutinut paasisimasaqarlutit. Ataqatigiissaarillaqqissuuvutit, siuariartortitsisinnaallutit suleqatigiinnerillu pitsaasumik ingerlassinnaavatit – aamma soqutigisaqaqatigiit amerlallutillu pisariaqartitaasa paasinissaat ajornakusooraluarpata.

Taakku saniatigut periusissiornikkut ineriartortitsineq aammalu piviusumi atortuulersitsineq nikerartumik suliffigissallugit iluarisimaartarpat aammalu nunatsinni inuiaqatigiinni pissutsinut piorsarsimassutsikkullu pisut ataqatigiinnerannik paasisimannittuuvutit.

Neqeroorutigisinnaasagut

Suliniummi annertuumi nunatsinni akisussaassuseqartumik takornariaqarnerup ineriartortinnissaanut pingaaruteqarluinnartumik inissisimasumi, Project Manageritut qitiusumik atuuffeqarnissat neqeroorutigisinnaavarput. Periusissiornikkut suliaqarneq takornarianillu qanimut suleqateqarneq pitsaasumik oqimaaqatigiisitsiffiusoq ulluinnarni suliffigilissavat – piviusumi allanngueqataanissannut periarfissiiffiusoq!

Suleqatigiit tunniusimasut akimullu suleqatigiittartut Nuummi inissisimasut ilannguffigissavatit, matumani suleqatigiinneq, sulianut ilinniarsimassuseq tunniusimanerlu pingaartinneqarluinnarput.

Project Manageritut atorfik 2027-imi decembarip tungaanut piffissami killilimmi atorfiuvoq, piginnaasallu naapertorlugit akissaasersuisoqassalluni.

Piaarnerpaamik atorfinittoqarnissaa kissaatiginartinneqarpoq, suleqatissarpulli eqqortoq utaqqeqqaarusupparput. Qinnuteqaatit ataavartumik nalilersorneqartarput, taamaammat piaarnerpaamik qinnuteqaatit Linda Kleistimut, Head of Destination Development & Cruise mailimut linda@visitgreenland.com-imut nassiuguk.

Suliniaqatigiiffik pillugu paasisaqarnerugit uani.