Meeqqat Angerlarsimaffianni Sarliami, Ilulissaniittumi pisortaq

Soqutigisinnaaviuk allanartumi, ineriartortitsiffiusumi pissarsiassaqarnarfiusumilu sunniuteqarluarlutit suliffeqarnissat? Taava immaqa una atorfik ilinnut soqutiginaateqarsinnaavoq. 

Ulloq unnuarlu angerlarsimaffimmut Sarliaq-mut Isumaginninnermut aqutsisoqarfik ulloq 1. januar 2027-mi imaluunniit immikkut isumaqatigiissuteqarnikkut aallartittussamik pisortassarsiorpoq.

Meeqqat Angerlarsimaffiat Sarliaq pillugu: 
Meeqqat Angerlarsimaffiat Sarliaq tassaavoq meeqqanut inuusuttuaqqanullu 0-niit 18-t tikillugit ukiulinnut ulloq unnuarlu paaqqinniffiusoq. Meeqqat tassani najugaqartut tassaanerusarput perioriartornerminni isumassorneqarnermikkut sumiginnarneqarsimasut angerlarsimaffiup avataanut innissinneqarnikut. 
Taamaattumik pineqartut assigiinngitsorpassuartigut unammilligassaqartarput.

Meeqqat Angerlarsimaffiat Sarliaq meeqqanut 20-nut immikkoortortani pingasuusuni inisimasuutitaqarpoq. Perorsaanermut tunngatillugu piumasaqaatit sakkortupput. Ulluinnarni ingerlatsinermi piumasaqaatit ikigisassaanngittaqaat. Siunnerfeqarluartumik sinaakkusersorneqarluarsimasumillu suleriaaseqartoqartarpoq, aammalu attaveqaatit isumaqatigiissusiorsinnaanerlu aallaavigalugit ingerlatsiniartoqarfiulluni. 

Ineriartortitsilluni suliniutit assigiinngitsut aallartisarneqarnikuupput, tamatumanilu siunertarineqarluni perorsaanermi periutsit pitsanngorsaavigineqartuarnissaat. Meeqqat Angerlarsimaffiat Sarliaq pisortassarsiorpoq taakkartorneqartut toqqammavigalugit ineriartortitseqqissinnaasumik, piginnaaneqarluaannarani perorsaanermi siunniussat toqqammavigalugit suliniuteqarusuttumik.

Neqeroorutigaarput: 

• Sulisunik assigiinngisitaartunik immikkullu piginnaaneqartunik suleqateqalernissat

• Ingerlatsinermi ineriartortitsinermilu sunniuteqarluarlutit inissisimanissat

• Suliffeqarfik ineriartortitsiviusoq ilinniartitsinermillu pingaartitsisoq suliffigilissavat

• Perorsaanermi ingerlatsinermilu unammilligassat ineriartortitsinissallu sammisarissavatit

• Isumaginninnermut aqutsisoqarfik – ingammillu Ulloq Unnuarlu Inissitsiterinermullu Immikkoortortaqarfimmik suleqateqartassaatit

• Ulloq unnuarlu angerlarsimaffinni allani pisortaasut sulianut tunngatillugu isumasiorsinnaallugillu ikorfartoqatigisassavatit

• Ukiumoortumik pisortat isumasioqatigiinnerinut ataatsimeersuarnerannullu peqataasassaatit

Naatsorsuutigaarput: 

• Perorsaasutut ilinniagaqarsimassasutit

• Pisortatut misilittagaqarnissat kissaatiginarsinnaavoq, qanilaartoq aammalu suliakkiinissamut piginnaaneqarluartoq

• Inatsisit toqqammaviusut ilisimasaqarfigilluassavatit

• Ingerlatsinermik aningaasatigullu aqutsinermik misilittagaqarluartoq

• Inuunerminik nuannarinnittoq aammalu inunnik allanik akuersaartuunermigut attaveqallaqqittoq

• Pisortatut misilittagaqarluartoq aammalu suliassanik agguaasillaqqissoq

• Pisortatut sulisut suleqatigisinnaaneranik misilittagaqartutit

• Namminersorlutik Oqartussat ulloq unnuarlu angerlarsimaffiinik allanik suleqateqarnissamut piumassuseqartoq

• Piumassuseqartoq ulloq unnuarlu angerlarsimaffinnut immikkoortortaqarfiup suleqatiginissaanut

• Ulloq unnuarlu meeqqanut inuusuttuaqqanullu angerlarsimaffinnut tunngassuteqartuni misilittagalik.

Tamatuma saniatigut danskisut kalaallisullu oqaaseqartuunissat aammalu nunatta kulturianik inuiaqatigiivinillu paasinnilluartuunissat kissaatiginartutut isigaagut.

Paasissutissat sukumiinerusut
Tunngaviusumik sapaatip akunneranut nal.ak. 40-t suliffiupput.

Atorfik pillugu suli sukumiinerusumik paasisaqarusukkuit tikilluaqqusaavutit imm.pisortamut Sorlannguaq Mørch, oqar. +(299) 34 64 30 imaluunniit e-mail; somo@nanoq.gl aqqutigalugu paasiniaanissamut.

Akissarsiat atorfeqarnermilu aalajangersakkat 
Akissarsiat atorfeqarnermilu aalajangersakkat, ilanngullugit sulilernermi soraarnermilu pisattat ilanngullugit angallanneqarnissaanut aalajangersakkat tassaapput Namminersorlutik Oqartussat illillu soqutigisaqaqatigiiffittut isumaqatigiinniarsinnaatitaasup akornanni illit atorfininnerpit nalaanni isumaqatigiissutaasimasut.

Ineqarneq 
Atorfeqarnernut tunngatillugu inissaqartinneqassaatit tamakkununnga nalinginnaasumik aalajangersagaasartut naapertorlugit. Ineqarnermut isertermullu akiliutit akilerneqartassapput tamakkununnga maleruaqqusat naapertorlugit. Atorfininnermut tunngatillugu inissaqartinneqarneq atuutsissaaq atorfeqarnerpit nalaani, aammalu atorfimmit soraarnermut tunngatillugu qimanneqartussaassalluni.

Inigisamut akiliut taassumalu pitsaassusaanut tunngatillugit apeqqutaapput inigisassap pisoqaassusaa, pigineqarnera il.il. Ineqalivinnissamut piffissaq annertujaaq utaqqisoqarsinnaasarpoq, taamaattumillu utaqqiisaasumik ineqartitsisoqarsinnaasarluni, soorlu najugaqatigiiffinni, hotellit inissiaataani, tamakkulu akileraarusiisarnerni nalilittut akileraaruserneqartarput.

Qinnuteqarfissaq 
Qinnuteqarnermi ilinniarsimasat pillugit paasissutissat, pillagaasimannginneq pillugu paasissutissat, suliffigisimasanit oqaaseqaatit nassiunneqassapput, ulloq unnuarlu angerlarsimaffinnut immikkoortortaqarfiup pisariaqartikkuniuk attaveqarsinnaatitaassalluni. Tamatuma saniatigut meeqqanut pinerlussimannginnermut uppersaat pissarsiariniarneqartussaavoq.

Qinnuteqarnissamut ulloq killigititaq tassaavoq 4. december 2026, Ataavartumik oqaloqatiginninnerit ingerlanneqassapput.