Allaffimmi suleqatissarsiorpugut – Aqutsinikkut allattoqarfik

Naalakkersuisut Siulittaasuata Naalakkersuisoqarfia allaffimmi fuldmægtigimik pissarsiorpoq. Akisussaassuseqartumik aammalu sullarissumik sulisussarsiorpoq. Suliassat erseqqissumik sinaakkutillit iluanni pitsaasumik ingerlatsisinnaasumik, suliassani paasissutissaararpassuarnut tappissumik aammalu suleqatigiuminartumik sulisussarsiorpoq.

Naalakkersuisoqarfik pillugu

Naalakkersuisut tassaapput Kalaallit Nunaanni Namminersornerullutik oqartussat aqutsisuisa qullersaat. Pisortaqarfik aqutsisoqarfinnut allanut atasunik immikkoortunut assigiinngitsunut akisussaaqataavoq. Naalakkersuisut Siulittaasuata Naalakkersuisoqarfia immikkoortunut ukununnga aggulussimavoq: Aqutsinikkut Allattoqarfik, Naalakkersuinermik ingerlatsineq pillugu allaffik, Inatsisilerinermut allaffik, Tunngaviusumik Inatsiseqalernissamut immikkoortortaqarfik kiisalu Sulisoqarnermut Ineriartortitsineq.

Atorfik aaqqissuussaanikkut Aqutsinikkut Allattoqarfimmi inissisimavoq.

Suliassat

Allaffimmi fuldmægtigitut allattoqarfiup ullormut ingerlatsinerani pingaarutilimmik inissisimalissaatit. Suliassat pingaarnerit makkuussapput:

• Naalakkersuisut sullinnerat, tassunga ilanngullugu ataatsimiinnerni oqaluuserisassat aammalu ataatsimiinnerni imaqarniliornerit

• Aningaasaqarnermut aqutsineq aammalu allaffissornikkut suliassat

• Angalanernut inniminniinerit aammalu aaqqissuussinerit

• Suliassanik aalajangersimasunik suliarinninneq

• Pisortatigoortumik tikeraartoqarnermi allanilu ikiuunneq

Naatsorsuutigisagut

• Allaffissornikkut ilinniagaqarsimaneq

• Suliassanik assingusunik misilittagaqarneq

• Aningaasaqarnermut aqutsinermut ilisimasaqarneq

• Suliassanik amerlasuunik piffissallu ulapaarfiusinnaasut iluanni pitsaasumik ingerlatsisinnaaneq

• Eqaatsumik aammalu alanngorartunik suliaqarsinnaaneq

• Kalaallisut danskisullu piginnaasaqarneq

Neqeroorutigaagut

• Suliat pissanganartut ineriartorfiusullu

• Inuttut suliatigullu ineriartortitsinissamut periarfissat pitsaasut

• Suliassat soqatuginartut assigiinngiiaartullu

• Suleqatit pimoorussisut ammasullu

Paasissutissat sukumiinerusut

Atorfik pillugu paasisaqarnerorusukkuit attavigisinnaavat: Elisabeth L. Jensen, oqarasuaat 34 67 92 imaluunniit e-mail: Ele(a)nanoq.gl

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Qinnuteqartoq uppernarsaatitalinnik piginnaasalik immikkut siunnersortitut, siunnersortit pisortaatut siunnersortaanertulluunniit isumaqatigiissutit naapertorlugit atorfinitsinneqarsinnaasarpoq.

Najugaq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 

E-mail-ikkut qinnuteqaatinik tigusineq ajorpugut.