Aningaasaqarnermut Naalakkersuisoqarfik Aqutsisunut allattoqarfiup saaffiginnittarfiani pikkorissumik allatsissarsiorpoq

Aningaasaqarnermut Naalakkersuisoqarfik Aqutsisunut allattoqarfiup saaffiginnittarfiani pikkorissumik allatsissarsiorpoq

Torersoq, akiligassanik isumaginnissinnaasoq, sullissisinnaasoq, ulapaarfimmi tamakkiisumik takunnissinnaallunilu qungujulasinnaasoq. Illiuppat taava immaqa suleqatitaarissavatsigit. 

Aqutsisunut allattoqarfik naalakkersuisoqarfimmi ingerlatsinermut tunngatillugu arlalinnik suliaqartarpoq kiisalu Naalakkersuisunik naalakkersuisoqarfimmilu pisortamik sullissisarluni. Pingaarnertut ”Saaffiginnittarfittut” taagukkatsinni sulissaatit, aammali naalakkersuisoqarfimmi pisortap ilaannikkullu Naalakkersuisutta suliassittassavaatsit.

Saaffiginnittarfiup immikkoortortaqarfiani aqutsisoq qullersarissavat.

Illit pillutit

Allaffimmiutut ilinniarsimasuuvutit, ajornanngippallu ilinniagartuutut ilinniarsimasuullutit, aamma ajornanngippat namminersorlutik oqartussani kommunimiluunniit allattoqarfimmi sulinermik misilittagaqaruit pitsaassaaq.

F2, IRIS, Ledelsesinfo aamma Web-Tas ilisimagukkit pitsaassaqaaq, aamma Word Excelilu atornissaat sungiusimagukkit pitsaassaaq.

Tamakkiisumik takunnissinnaalluarlutillu pilersaarusiorsinnaassaatit, tupaallattoqannginniassammat piffissarlu eqqorlugu suliassat naammassineqassammata. Torersuutitsinissat pingaartissavat. Arlaannik isumaginninnissaq pisariaqartillugu akisussaaffimmik tigusinissat annilaangagissanngilat. Nalornileraangavit aperiinnartarlutit.

Suliffimmi persuarsiorfiunngitsumi, suliassiisunik qanimut suleqateqarfiusumi tunniusimasunillu sulisulimmi sulisinnaavutit. Sullissilluarnissaq ilinnut pissusissamisoorluinnarpoq. Suleqatinnut ikiuukkumavutit.

Marlunnik oqaaseqartuuguit iluaqutaassaqaaq.

Atorfik pillugu

Pingaartumik uku suliarissavatit:

• Allakkanik naalakkersuisoqarfiup mailianut ataatsimoorussamut nassiussanik agguaaneq kiisalu ulluinnarni naalakkersuisoqarfimmi nutaarsiassanik ”Ullumi pisussat – Dagen i dag” suliaqarneq

• Naalakkersuisoqarfiup politikkikkut suliassanik tunniussinissaanik qulakkeerinneqataaneq

• Naalakkersuisoqarfiup saqqummersitaanik nassiussineq

• Naalakkersuisumik naalakkersuisoqarfimmilu pisortamik sullisseqataaneq

• Naalakkersuisoqarfimmi nalinginnaasumik toqqorsivimmi toqqorsisarnermik nalunaarsuisarnermillu aammalu toqqorsiviup torersuunissaanik qulakkeerinninneq

• Naalakkersuisup akeqanngitsumik ajunngitsorsiaanik nalunaarutiginninneq

• Allaffimmi atortunik inniminniineq

• Naalakkersuisoqarfimmi naatsorsuinermi ilitsersuutinik pigisallu allattorsimaffiannik nutarterineq

• Suliassat allat

Tamatuma saniatigut pisariaqartillugu IRIS-imi akiligassanik suliaqarnermi, Web-Tasimi akuerisassanik, angalanernik inniminniinermik angalanermilu naatsorsuutinik kiisalu naatsorsuutilerinermi suliassanik annikitsunik naligiissaarinernillu suliaqarnermi ikiuuttassaatit.

Naalakkersuisoqarfimmi pisortap immikkut suliassai

Naalakkersuisoqarfimmi pisortamik sullissinermut atatillugu immikkut suliassaqarpoq. Tassa imaappoq 

Naalakkersuisoqarfimmi pisortap ullorsiutaanut, ataatsimiinneranut, angalaneranut sinniisutullu suliassaanut tunngatillugu suliassat assigiinngitsut pilersaarusiornerlu tamakkiisumik takunniffigisinnaassavatit, aamma 

ullup suliffiusup iluamik ingerlanissaanut suliamullu pikkoriffeqarluni sulinissamut iluaqutaasumik nammineerlutit suliassanik assigiinngitsunik annikitsunik suliaqartassaatit.

• Isumaqatigiissutinik aqutsinermi suliassanilu allani il.il. peqataaneq

• Suliniutinut annernut atatillugu naalakkersuisoqarfimmi pisortap toqqaannanngitsumik suliassaanik isumaginninneq

• Ataatsimiinnerni atortussanik/atortussanik ataatsimiinnermeersunik isumaginninneq taakkulu toqqorsimasuutiginissaannik allagaataasivimmiinnissaannillu isumaginninneq

• Ataatsimiinnernik, ataatsimeersuarnernik sulinermullu atatillugu angalanernik pilersaarusiornermi piareersarnermilu ikiuunneq

• Nalinginnarmik akissusiorfigineqartariaqartunik allakkanik suliffimmilu allakkianik il.il. suliaqarneq

• Naalakkersuisoqarfimmi pisortap akuuffigisaani anguniagassatut pilersaarutinik aamma suliniutinut piffissaliussanik isumaginninneq

Aqutsisunut allattoqarfimmi sulinermi pisariaqartillugu suliassaq apeqqutaatinnagu ikiuuttoqartarpoq.

Naalakkersuisoqarfiup suiaassuseq, inuianni pinngorfiup, upperisap innarluuteqarnerluunniit siuarsarusuppai. Taamatuttaaq inuunermi misilittagaqarneq inuttullu inerisimaneq iluaqutitut isigaavut, taamaammat qassinilluunnit ukiullit qinnuteqarnissaannut kajumissaarusuppavut.

Akissarsianut atorfinitsinneqarnermullu tunngatillugu pissutsit

Akissarsiatigut atorfeqartitaanermilu atugassarititaasut, tassunga ilanngullugit atorfininnermut soraarnermullu atatillugu angalaneq pequtillu nutserneri tunngasut atorfininnermi Namminersorlutik Oqartussat kattuffiullu ilaasortaaffigisap isumaqatiginninniarsinnaatitaasup akornanni isumaqatigiissutit malillugit aalajangerneqassapput.

Naalagaaffimmi atorfillit – isumaqatigiissut apeqqutaalluni – Namminersorlutik Oqartussani atorfininnerminnut atatillugu akissarsiaqarnatik sulinngiffeqarsinnaatitaapput. Taamatuttaaq Namminersorlutik Oqartussani suliniarluni kommunimit nunallu immikkoortuanit akissarsiaqarnani sulinngiffeqarnissaq pillugu qinnuteqaatit akuereqqullugit Naalagaaffimmit innersuussutigineqarput. 

Aapparisaq inooqataasorluunniit Namminersorlutik Oqartussani atorfinitsinneqartup sulinngiffeqarnerani aalajangersakkaniipput aamma.

Najugaq

Inissiamik innersuussisoqanngilaq. Qinnuteqartoq Namminersorlutik Oqartussani atorfeqarnermini atorfimmut atatillugu ineqareersimappat sulisunut atatillugu ineqarsinnaatitaanini attatiinnassavaa. Atorfimmut atatillugu ini atorfeqarnermut tunngavoq, taamaalillunilu atorfeqarnerup unitsinnerani qimanneqassalluni.

Paasissutissat sukumiinerusut

Atorfik pillugu paasissutissat sukumiisut immikkoortortaqarfimmi aqutsisup Judithe Rosing e-mailikkut jros@nanoq.gl saaffigineratigut imaluunniit immikkoortortaqarfimmi pisortap Preben Rasmussenip prer@nanoq.gl-imut saaffigineratigut pissarsiarineqarsinnaapput. Namminersorlutik Oqartussat pillugit uani paasisaqarnerusinnaavutit www.naalakkersuisut.gl.

Qinnuteqaat

Qinnuteqaat CV ilanngullugu, soraarummeernermut uppernarsaatit, karakterinut takussutissat ilanngussallu allat ”qinnuteqaat nassiuguk” toorlugu kingusinnerpaamik 9. august 2026-mi tigunissaannut qilanaarpugut.

Piaartumik atorfinitsitsisoqassaaq, tamanna isumaqatigiissutigineqarumaarpoq.

Aningaasaqarnermut Naalakkersuisoqarfiup assigiinngiiaassuseq nukittussutitut isigaa aamma piukkunnartut soqutiginnittut tamarmik inuttut tunuliaqutaat apeqqutaatinnagu qinnuteqarnissaminnut kajumissaarneqarput. Qinnuteqaativit atuarnissaanut qilanaarpugut.

Qinnuteqaatit, CV, ilinniarnermut pikkorissarnermullu uppernarsaatit kiisalu allagaatit attuumassuteqartut allat”Qinnuteqaat nassiuguk” toorlugu nassiutikkit.

Qinnuteqaatinik e-mailikkut tigusaqarneq ajorpugut.